ជប៉ុន ចាប់ផ្តើមរុករករ៉ែកម្រ ខណៈ ចិន រឹតបន្តឹងកាន់តែខ្លាំងឡើង

យោងតាមភ្នាក់ងារ Japantimes កប៉ាល់រុករករ៉ែរបស់ជប៉ុនមួយគ្រឿងបានចេញដំណើរនាថ្ងៃទី១២មករានេះ ឆ្ពោះទៅកាន់កោះផ្កាថ្មដាច់ស្រយាលមួយ ដើម្បីស្រាវជ្រាវភក់ដែលសម្បូរទៅដោយដីដ៏កម្រ និងជាផ្នែកមួយនៃការជំរុញរបស់ទីក្រុងតូក្យូ ដើម្បីទប់ស្កាត់ការពឹងផ្អែកទៅលើចិនសម្រាប់រ៉ែសំខាន់ៗ ខណៈទីក្រុងប៉េកាំងរឹតបន្តឹងការផ្គត់ផ្គង់កាន់តែខ្លាំងឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេសកកម្មរយៈពេលមួយខែរបស់កប៉ាល់សាកល្បង Chikyu នៅជិតកោះ Minamitori មានចម្ងាយប្រហែល ១,៩០០គីឡូម៉ែត្រ ភាគអាគ្នេយ៍នៃទីក្រុងតូក្យូ ដើម្បីលើកដីល្បាប់បាតសមុទ្ររ៉ែដ៏កម្រជាបន្តបន្ទាប់ ពីជម្រៅ ៦ គីឡូម៉ែត្រទៅលើកប៉ាល់មួយ។

ដំណើរសាកល្បងនេះកើតឡើងចំពេលមានភាពតានតឹងកាន់តែខ្លាំងឡើងជាមួយចិន ដែលជាអ្នកផ្គត់ផ្គង់រ៉ែដ៏កម្រធំជាងគេបំផុតរបស់ពិភពលោក និងក្តីបារម្ភកាន់តែខ្លាំងឡើងនៅក្នុងប្រទេសជប៉ុន អំពីភាពងាយរងគ្រោះនៃខ្សែសង្វាក់ផ្គត់ផ្គង់។ ទីក្រុងប៉េកាំងពីមុនបានប្រើប្រាស់ឥទ្ធិពលរបស់ខ្លួនលើរ៉ែដ៏កម្រជាឥទ្ធិពលភូមិសាស្ត្រនយោបាយ ហើយការរឹតបន្តឹងការនាំចេញថ្មីៗនេះបានជំរុញឲ្យមានការភ័យខ្លាចអំពីការរំខានដល់ការផ្គត់ផ្គង់ដែលអាចកើតមាន។

ដូច្នេះហើយ ជប៉ុន ក៏ដូចជាសម្ព័ន្ធមិត្តលោកខាងលិចដែរ បានកាត់បន្ថយការពឹងផ្អែករបស់ខ្លួនលើប្រទេសចិន ចំពោះរ៉ែសំខាន់ៗសម្រាប់ការផលិតរថយន្ត ស្មាតហ្វូន និងឧបករណ៍យោធា ដែលជាកិច្ចខិតខំប្រឹងប្រែងមួយ ដោយក្លាយជារឿងបន្ទាន់ ចំពេលមានជម្លោះការទូតដ៏សំខាន់ជាមួយទីក្រុងប៉េកាំង។

លោក Shoichi Ishii ប្រធានគម្រោងដែលគាំទ្រដោយរដ្ឋាភិបាលបានប្រាប់រ៉យទ័រថា បន្ទាប់ពីរៀបចំយ៉ាងរឹងមាំអស់រយៈពេល៧ឆ្នាំ យើងអាចចាប់ផ្តើមការធ្វើតេស្តបញ្ជាក់បានហើយ។ កប៉ាល់សាកល្បងនេះមាននាវិក និងអ្នកស្រាវជ្រាវចំនួន ១៣០នាក់ គ្រោងនឹងវិលត្រឡប់មកកំពង់ផែវិញនៅថ្ងៃទី ១៤ ខែកុម្ភៈ។

លោកក៏មានប្រសាសន៍បន្ថែមថា «ប្រសិនបើគម្រោងនេះទទួលបានជោគជ័យ វានឹងមានសារៈសំខាន់យ៉ាងខ្លាំងក្នុងការធ្វើពិពិធកម្មការផ្គត់ផ្គង់ធនធានរ៉ែដ៏កម្ររបស់ប្រទេសជប៉ុន» ដោយបន្ថែមថា ការទាញយករ៉ែសំខាន់ៗពីជម្រៅ ៦ គីឡូម៉ែត្រក្រោមនីវ៉ូទឹកសមុទ្រ នឹងជាសមិទ្ធផលបច្ចេកវិទ្យាដ៏សំខាន់មួយ។

កាលពីសប្តាហ៍មុន ចិនបានហាមឃាត់ការនាំចេញរបស់របរដែលមានគោលដៅសម្រាប់យោធាជប៉ុន ក្នុងនោះមានការប្រើប្រាស់ស៊ីវិល និងយោធា រួមទាំងរ៉ែសំខាន់ៗមួយចំនួនផងដែរ។ កាសែត Wall Street Journal បានរាយការណ៍ថា ទីក្រុងប៉េកាំងក៏បានចាប់ផ្តើមរឹតបន្តឹងការនាំចេញរ៉ែដ៏កម្រទៅកាន់ជប៉ុនកាន់តែទូលំទូលាយផងដែរ។

យ៉ាងណា ជប៉ុនបានថ្កោលទោសការហាមឃាត់ការប្រើប្រាស់ពីរយ៉ាងរបស់ចិន ប៉ុន្តែបានបដិសេធមិនធ្វើអត្ថាធិប្បាយលើរបាយការណ៍នៃការហាមឃាត់កាន់តែទូលំទូលាយ ដែលចិនមិនបានបញ្ជាក់ ឬបដិសេធនោះទេ។ ទោះជាយ៉ាងណាក៏ដោយ ប្រព័ន្ធផ្សព្វផ្សាយរដ្ឋចិនលើកឡើងថា ទីក្រុងប៉េកាំងកំពុងថ្លឹងថ្លែងវិធានការនេះដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោកស្រី Takaichi ពិចារណារៀបចំការបោះឆ្នោតសភាមុនអាណត្តិ