ខេត្តថៃចំនួន៦ ជាប់ព្រំដែនកម្ពុជា ត្រូវគ្របដណ្តប់ដោយខ្យល់ពុល កម្រិតគ្រោះថ្នាក់

កាលពីថ្ងៃអាទិត្យទី១៨ខែមករាឆ្នាំ២០២៦ ប្រទេសថៃ បានបញ្ជាក់ពីការវាយប្រហារដោយខ្យល់ពុល ពោលគឺកំហាប់ភាគល្អិត PM2.5 បានគ្របដណ្តប់ខេត្តចំនួន៣៨ ក្នុងនោះមាន៦ខេត្តស្ថិតនៅជាប់ព្រំដែនកម្ពុជា។

តាមការផ្សាយរបស់ Bangkok Post ដែលដកស្រង់ទិន្នន័យពីទីភ្នាក់ងារអភិវឌ្ឍន៍បច្ចេកវិទ្យាអវកាស និងភូមិសាស្ត្រព័ត៌មានថៃ ហៅកាត់ GISTDA, ក្នុងចំណោមខេត្តទាំង៣៨នោះ គឺ Maha Sarakham ជាខេត្តដែល PM2.5 ឡើងដល់កម្រិតគ្រោះថ្នាក់ខ្លាំង (ពណ៌ក្រហម) ដោយឈានដល់ ៧៥.៦ មីក្រូក្រាមក្នុងមួយម៉ែត្រគូបនៃខ្យល់។

ចំណែកខ្យល់ពុលនៅខេត្តទាំង៣៧ទៀត បានឈានដល់កម្រិតពណ៌ទឹកក្រូច ដែលលក៏គ្រោះថ្នាក់ដល់សុខភាពដែរ ដោយ PM2.5 មានចន្លោះពី៣៧.៦ ដល់ ៧៥.៦ មីក្រូក្រាមក្នុងមួយម៉ែត្រគូបនៃខ្យល់។

ក្នុងនោះខេត្តថៃស្ថិតនៅជាប់ព្រំដែនកម្ពុជា ដែលត្រូវគ្របដណ្តប់ដោយខ្យល់ពុលមានដូចជា៖ Buri Ram, Surin, Si Sa Ket, Sa Kaeo, Ubon Ratchathani និង Chanthaburi។

សូមជម្រាបថា មួយឆ្នាំៗ ប្រជាជនថៃរាប់លាននាក់ កើតជំងឺដោយសារខ្យល់ពុល ខណៈយោងតាមទិន្នន័យក្នុងឆ្នាំ២០២៥ ប្រជាជនថៃរហូតដល់ទៅជាង ១០លាននាក់មានបញ្ហាសុខភាពធ្ងន់ធ្ងរ ដោយសារតែឥទ្ធិពល PM2.5។

ក្នុងចំណោមមនុស្សទាំងជាង១០លាននាក់នោះ ភាគច្រើនមានបញ្ហាផ្លូវដង្ហើម ដូចជាជំងឺហឺតនិងជំងឺស្ទះសួតរ៉ាំរ៉ៃ ហើយអ្នកខ្លះមានឡើងកន្ទួលលើស្បែកនិង បញ្ហាភ្នែក។ ក្នុងករណីធ្ងន់ធ្ងរបំផុត អ្នកជំងឺផ្លូវដង្ហើមខ្លះ ត្រូវការជំនួយពីម៉ាស៊ីនដកដង្ហើមជាចាំបាច់ដើម្បីរស់ ហើយខ្លះឈានដល់ការជំងឺមហារីកសួតតែម្តង៕

អត្ថបទ៖ សុខ សុវណ្ណ