ព័ត៌មានអន្ដរជាតិ

អគ្គិភ័យនៅកណ្តាលផ្សារទំនើបមួយក្នុងប្រទេសប៉ាគីស្ថាន កើនចំនួនអ្នកស្លាប់ដល់ ៦០នាក់

បានផុស

៤ ខែ មុន

នៅ

ថ្ងៃព្រហស្បតិ៍ ២២ មករា ២០២៦

ដោយ

អាជ្ញាធរប៉ាគីស្ថានបានលើកឡើងថា ចំនួនអ្នកស្លាប់ដោយសារអគ្គិភ័យនៅកណ្តាលផ្សារទំនើបមួយក្នុងទីក្រុង Karachi បានកើនឡើងដល់ ៦០នាក់ បន្ទាប់ពីសាកសព ៣០នាក់ត្រូវបានរកឃើញនៅក្នុងហាងដែលឆេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោយតាម Al Jazeera, អាជ្ញាធរបានបានបន្ថែមថា ប្រតិបត្តិការស្វែងរក និងសង្គ្រោះនៅមជ្ឈមណ្ឌលផ្សារទំនើប Gul Plaza បានបន្តនៅថ្ងៃព្រហស្បតិ៍ ដោយក្រុមការងារកំពុងធ្វើការដើម្បីកំណត់ទីតាំងមនុស្សជាង ៨០នាក់ ដែលនៅតែបាត់ខ្លួននៅឡើយ ពីគ្រោះអគ្គិភ័យដ៏សន្ធោសន្ធៅកាលពីថ្ងៃសៅរ៍នៅក្នុងអគារពាណិជ្ជកម្មដែលប្រជុំទៅដោយមនុស្សយ៉ាងច្រើនកុះករ។

អាជ្ញាធរក្រុង Karachi South លោក Syed Asad Raza បានប្រាប់កាសែត Dialy Dawn ថា យ៉ាងហោចណាស់សាកសពចំនួន ៣០ ត្រូវបានគេរកឃើញនៅក្នុងហាងនៅជាន់ឡៅតឿ។

លោកបានបន្តថាចំនួនអ្នកស្លាប់សរុបត្រូវបានប៉ាន់ស្មានថាមានចំនួន ៦១នាក់ បន្ទាប់ពីការរកឃើញចុងក្រោយដោយបន្ថែមថាតួលេខចុងក្រោយនឹងត្រូវបានបញ្ជាក់បន្ទាប់ពី ការវិភាគ DNA ត្រូវបានបញ្ចប់។

ចំណែក សាកសពចំនួន៣០ ត្រូវបានគេរកឃើញពីហាង « Dubai Crockery» នេះបើយោងតាមស្នងការក្រុង Karachi South លោក Javed Nabi Khoso ។

លោកបន្តថា ជនរងគ្រោះបានចាក់សោក្នុងហាងក្នុងគោលបំណងការពារខ្លួន។ ចំណែកប្រព័ន្ធផ្សព្វផ្សាយក្នុងស្រុកបានរាយការណ៍ថា ជនរងគ្រោះបានភៀសខ្លួនទៅខាងក្នុងហាង បន្ទាប់ពីមានការរត់ជាន់គ្នាមួយ បានផ្ទុះឡើងនៅក្នុងផ្សារទំនើប ក្នុងអំឡុងពេលដំបូងនៃអគ្គិភ័យកាលពីថ្ងៃសៅរ៍។

តែយ៉ាងណាអាជ្ញាធរក្រុងមិនទាន់ដឹងច្បាស់ទេ ថាភ្លើងឆេះនេះបណ្តាលមកពីអ្វីឱ្យប្រាកដ។

មិនតែប៉ុណ្ណោះក្រុង Karachi South មានប្រវត្តិនៃអគ្គិភ័យដ៏សាហាវ ដែលតែងតែត្រូវបានស្តីបន្ទោសពីប្រជាជនលើស្តង់ដារសុវត្ថិភាពមិនល្អ និងមានសំណង់ខុសច្បាប់ បើទោះបីជាចំនួនអ្នកស្លាប់ខ្ពស់បែបនេះកម្រកើតមានក៏ដោយ។

កាលពីខែវិច្ឆិកា ឆ្នាំ២០២៣ អគ្គិភ័យនៅកណ្តាលផ្សារទំនើបមួយក្នុងទីក្រុងបានសម្លាប់មនុស្ស ១០នាក់ និង ២២នាក់ផ្សេងទៀតរងរបួស។

ចំណែកអគ្គិភ័យនៅរោងចក្រកាត់ដេរក្នុងទីក្រុង Karachi ក្នុងឆ្នាំ២០១២ បានសម្លាប់មនុស្ស២៦០នាក់៕

ប្រែសម្រួល៖ ណឺ មិនា