ព័ត៌មានជាតិ

ឧប. សាយ សំអាល់ ណែនាំឱ្យអាជ្ញាធរខេត្តព្រះសីហនុទប់ស្កាត់ឧក្រិដ្ឋកម្មឆបោកអនឡាញជាអាទិភាព

បានផុស

៤ ខែ មុន

នៅ

ថ្ងៃសៅរ៍ ២៤ មករា ២០២៦

ដោយ

រដ្ឋមន្ត្រីក្រសួងរៀបចំដែនដី ឧបនាយករដ្ឋមន្ត្រី សាយ សំអាល់ បានណែនាំដល់អាជ្ញាធរខេត្តព្រះសីហនុ កងកម្លាំងនគរបាល រាជអាវុធហត្ថ សឹករងខេត្ត និងប្រជាពលរដ្ឋរួមគ្នាទប់ស្កាត់ឧក្រិដ្ឋកម្មឆបោកអនឡាញដែលមានក្នុងខេត្តឱ្យអស់១០០ភាគរយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ របស់រដ្ឋបាលខេត្តព្រះសីហនុ លោកឧបនាយករដ្ឋមន្ត្រី សាយ សំអាល់ បានកោតសរសើរ និងវាយតម្លៃខ្ពស់ចំពោះមន្ត្រីរាជការគ្រប់លំដាប់ថ្នាក់ មន្ទីរ អង្គភាពពាក់ព័ន្ធ និងវិស័យឯកជនដែលបានចូលរួមអភិវឌ្ឍខេត្តព្រះសីហនុនាពេលកន្លងមក។ លោកបន្ថែមដោយចាត់ទុកសន្ដិសុខ សុវត្ថិភាពសាធារណៈជាបញ្ហាចំបង អាជ្ញាធរខេត្តត្រូវរួមគ្នាបង្កាទប់ស្កាត់ Online Scam ឱ្យបាន១០០ភាគរយ មុននឹងបន្តកិច្ចការផ្សេងទៀត។

លោកថា៖ «ត្រូវមានសាមគ្គី ឯកភាពផ្ទៃក្នុងបុព្វហេតុរួមរបស់យើង ទន្ទឹមនោះអាជ្ញាធរគ្រប់លំដាប់ថ្នាក់ កងកម្លាំងនគរបាល កងរាជអាវុធហត្ថ សឹករងខេត្ត និងប្រជាពលរដ្ឋរួមគ្នាបង្កាទប់ស្កាត់ Scam Online ឪ្យបាន១០០ភាគរយ ដើម្បីធានាសន្តិសុខ សុវត្តិភាពសាធា រណៈ ជូនប្រជាពលរដ្ឋ ភ្ញៀវជាតិ អន្តរជាតិ និងអ្នកវិនិយោគិន»។

លោកបន្ថែមថាការធានាបានសន្តិសុខ សុវត្ថិភាពសាធារណៈ នោះវានឹងជួយឱ្យអាជ្ញាធរខេត្តអាចបន្តការរៀបចំកែលម្អតំបន់ឆ្នេរ ចំណតរថយន្ត បន្ទប់ទឹកសាធារណ អនាម័យ បរិស្ថានឱ្យមានសោភ័ណភាពបន្ថែមទៀត។

លោកបន្ថែមថា៖ «ព្រោះយើងមានឆ្នេរខ្សាច់ ១០៥កន្លែង ឆ្នេរថ្ម ៧កន្លែង និងព្រែក១០០ ស្របតាមសន្ទុះកំណើនសេដ្ឋកិច្ច និងការរីកចម្រើនរបស់ក្រុង ខេត្តរបស់យើង ដែលយើងទាំងអស់គ្នាត្រូវគិតគូរការពារអ្នកវិនិយោគ»។

ជាមួយគ្នានេះលោកក៏ណែនាំឱ្យគិតគូរពីបញ្ហាទឹកស្អាត អគ្គិសនី សេវាទូរស័ព្ទ និងហេដ្ឋារចនាសម្ព័ន្ធថ្មីៗបន្ថែមទៀត ដើម្បីប្រែក្លាយខេត្តព្រះសី ហនុ ជាទីក្រុងស៊ីវីល័យ ដោយក៏សាងព្រំដែនមួយសន្តិភាព មិត្តភាព កិច្ចសហប្រតិបត្តិការ និងព្រំដែនមួយមានការអភិវឌ្ឍ ដើម្បីកសាងខឿនសេដ្ឋកិច្ច បង្កើនមុខរបរជូនប្រជាពលរដ្ឋ និងមានចំណូលកាន់តែល្អនាពេលខាងមុខ៕