មន្រ្តីជាន់ខ្ពស់សុខាភិបាល៖ ឆ្នាំ២០២៥ កុមារជាង ១២០០នាក់ ស្លាប់ដោយសារជំងឺផ្សេងៗ

លោក ឡូ វាសនាគីរី រដ្ឋលេខាធិការក្រសួងសុខាភិបាល បានឱ្យដឹងថា ក្នុងឆ្នាំ២០២៥ កុមារអាយុក្រោម៥ឆ្នាំចំនួន ២ ៧៨៥ ៦៧៤ នាក់ បានទៅពិនិត្យជំងឺក្រៅនៅតាមមន្ទីរពេទ្យកើនឡើង ៧,៣៧% ក្នុងនោះសម្រាកពេទ្យចំនួន ២៧៦ ៤៩០នាក់ កើនឡើង ៦,៧% ធៀបនឹងឆ្នាំ២០២៤។ ក្នុងចំណោមនោះ កុមារ ចំនួន ១ ២៥០នាក់ បានស្លាប់ដោយសារជំងឺផ្សេងៗ។

ថ្លែងក្នុងពិធីបើកសន្និបាតវិស័យសុខាភិបាល ឆ្នាំ២០២៥ និងទិសដៅការងារឆ្នាំ២០២៦ និងឆ្នាំបន្តកាលពីថ្ងៃទី២៦ មករា លោក ឡូ វាសនាគីរី បានឱ្យដឹងទៀតថា ឆ្នាំ២០២៥ មានស្ត្រីសម្រាលកូនចំនួន ២៥៣ ៣០៨ នាក់ក្នុងនោះ ៣៦,៧១% សម្រាលនៅមណ្ឌលសុខភាព ៥៦,៥៧% នៅមន្ទីរពេទ្យបង្អែក ៦,០៩% នៅសេវាឯកជនដែលរាយការណ៍ ០,៥៩% នៅផ្ទះដោយបុគ្គលិកសុខាភិបាល និង ០,០៤% (១០៣នាក់) នៅផ្ទះដោយឆ្មបបុរាណ។ ចំណែកអត្រាសម្រាលដោយបុគ្គលិកសុខាភិបាលបានធ្លាក់ចុះ៦,៣២% និងអត្រាសម្រាលនៅមូលដ្ឋានសុខាភិបាល បានធ្លាក់ចុះ ពី ៧៥,៨២% នៅឆ្នាំ២០២៤ មកនៅ ៧០,៨៩% នៃស្ត្រីមានគភ៌រំពឹងទុក។

ក្នុងឆ្នាំ២០២៥នេះដែរ មានស្ត្រីក្នុងវ័យបន្តពូជដែលបានរៀបការអាយុពី១៥-៤៩ឆ្នាំ កំពុងប្រើមធ្យោបាយពន្យារកំណើតទំនើបណាមួយមានចំនួន ៥៣០ ៣២២នាក់ តិចជាងឆ្នាំ២០២៤ ១,០១%។ ការពិនិត្យថែទាំគភ៌មុនសម្រាលលើកទី២ បានចំនួន ៣៣៧ ៤៨២ករណី កើនឡើង ៣,៦៤% និងលើកទី ៤ កើនឡើង ១,០២% ធៀបនឹងឆ្នាំ២០២៤។ រីឯការពិនិត្យថែទាំម្តាយ និងទារក ក្រោយសម្រាលលើកទី១ បានចំនួន ១៨២ ៧៩៦ នាក់ និងលើកទី២ ១៣៦ ៤១៩នាក់។

លោករដ្ឋលេខាធិការ បានបន្ថែមថា ចំពោះទារកកើតរស់ដែលបានទទួលការបំបៅដោយទឹកដោះម្តាយ នៅក្នុងម៉ោងដំបូងក្រោយកំណើតបានកើនឡើង ៣,៥៥% និងអត្រាគ្របដណ្តប់នៃវ៉ាក់សាំងបង្ការជំងឺខាន់ស្លាក់-ក្អកមាន់-តេតាណូស-រលាកថ្លើមប្រភេទបេ-រលាកសួត-រលាកស្រោមខួរ ៣ដូស សម្រេចបាន ៩៣,១៤% នៃចំនួនកុមារចំណុចអាយុក្រោម១ឆ្នាំ ។ លោកបញ្ជាក់ថា ឆ្នាំ២០២៥មានករណីអ្នកជំងឺទៅពិនិត្យជំងឺក្រៅនៅតាមមូលដ្ឋានសុខភិបាលនានាមានចំនួន ២១ ១៧៧ ៤៦៩ ករណី កើនឡើង ១៣,២៨% ធៀបនឹងឆ្នាំ ២០២៤ ក្នុងនោះករណីថ្មីពិនិត្យជំងឺក្រៅកើនឡើង ៧,៤៣%។ក្នុងនោះ៦៤,៨១% នៃចំនួន ករណីថ្មីសរុបត្រូវបានពិនិត្យនៅមណ្ឌលសុខភាព។

ចំណែកអ្នកជំងឺសម្រាកពេទ្យមានចំនួន ១ ៦៣៤ ៦៣១ នាក់ កើនឡើង ២៨,០៧% ធៀបនឹងឆ្នាំ២០២៤។ រីឯ អត្រាស្លាប់នៅមន្ទីរពេទ្យនៅក្រោម ១%។ ចំនួនករណីវះកាត់ធំ បានកើនឡើងពី ១៩៥ ៤៧១ករណី នៅ ឆ្នាំ២០២៤ ដល់ ២២០ ៩៤០ ករណី នៅឆ្នាំ២០២៥ ឬកើន ១៣,០៣%។ចំពោះអត្រាប្រើប្រាស់គ្រែបានកើនឡើង ពី ៨៦,០១% ទៅ ៩៩,៤% ខណៈដែលចំនួនគ្រែសរុបបានកើនឡើងពី ១៦ ៦៤៥ គ្រែ ទៅ ១៦ ៩២២ គ្រែ ដោយមិនបូកបញ្ចូលគ្រែអ្នកជំងឺរបេង៕

អត្ថបទ៖ សំអឿន