រដ្ឋមន្រ្តីសុខាភិបាល អះអាងថា ការប្រែប្រួលអាកាសធាតុបណ្តាលមកពីបាតុភូត អ៊ី នីណូ នាំឱ្យមានការកើនឡើងជំងឺគ្រុនឈាម

លោកសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអះអាងថា ការប្រែប្រួលអាកាសធាតុដែលបណ្តាលមកពីបាតុភូតអ៊ី នីណូ( El Niño)ដែលនាំឱ្យមានការកើនឡើងករណីជំងឺគ្រុនឈាម នៅក្នុងរដូវវស្សានេះ។

ក្នុងឱកាសដឹកនាំវគ្គភាពអ្នកដឹកនាំ និងនវានុវត្តន៍លើកទី១២២ ដែលមានការចូលរួមពីមន្រ្តីសុខាភិបាលគ្រប់ឋានានុក្រម តាមប្រព័ន្ធវីដេអូ សន្និសីទសរុបចំនួន ៣១០០នាក់ កាលពីរសៀលថ្ងៃទី៧កក្កដា លោករដ្ឋមន្ត្រីបានពន្យល់ថា បាតុភូតអ៊ី នីណូ( El Niño)នេះបានធ្វើឱ្យមានការកើនឡើងកំដៅដែលនឹងផ្តល់ឱកាសល្អដល់ការកកើតមូស ជាពិសេសមូលខ្លាញី ដែលជាភ្នាក់ងារចម្លងជំងឺគ្រុនឈាម។

លោករដ្ឋមន្ត្រីបានណែនាំដល់មូលដ្ឋានសុខាភិបាល ត្រូវយកចិត្តទុកដាក់ ក្នុងការអប់រំសុខភាព ត្រៀមខ្លួនក្នុងការបម្រើសេវាការពារ និងព្យាបាលឱ្យមានប្រសិទ្ធិភាព និងទាន់ពេលវេលា។ បន្ថែមពីនេះ មូលដ្ឋានសុខាភិបាលត្រូវចូលរួមពីសហគមន៍ និងអជ្ញាធរមូលដ្ឋានឱ្យចូលរួមក្នុងការបំបាត់ជម្រកមូសក្នុងសហគមន៍ និងបញ្ជូនអ្នកជំងឺសង្ស័យថាមានជំងឺគ្រុនឈាម ទៅកាន់មូលដ្ឋានសុខាភិបាល​សាធារណៈ នៅជិតបំផុតឱ្យបានទាន់ពេលវេលា។

បើតាមលោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍ថា គិតត្រឹមពេលនេះ មានអ្នកឆ្លងជំងឺគ្រុនឈាមប្រមាណ ១២,០០០ករណី ដែលតួលេខនេះមានប្រហាក់ប្រហែលគ្នាបើធៀបទៅនឹងរយៈពេល៦ខែដូចគ្នាកាលពីឆ្នាំ២០២៥កន្លងទៅ។ ទោះជាយ៉ាងណា លោកវេជ្ជបណ្ឌិតបានបន្តថា ក្រសួងសុខាភិបាលបាននិងកំពុងតាមដានយ៉ាងយកចិត្តទុកដាក់ និងគ្រប់គ្រងស្ថានភាពជំងឺគ្រុនឈាមឱ្យបានម៉ត់ចត់ដើម្បីទប់ស្កាត់ការរីករាលដាលឱ្យបានទាន់ពេល។

លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានមានប្រសាសន៍ថា បច្ចុប្បន្ននេះជំងឺគ្រុនឈាមបានកើតឡើងនៅទូទាំងប្រទេសពិសេសនៅតាមបណ្តារាជធានីខេត្ត ទីប្រជុំជនដែលមានប្រជាពលរដ្ឋរស់នៅកកកុញដែលមានទឹកដក់ទឹកច្រើនបង្កឱ្យមូសពងទៅជាមូសខ្លាដែលជាភ្នាក់ងារចម្លងជំងឺគ្រុនឈាម។ ម្យ៉ាងទៀតដោយសារនៅឆ្នាំនេះជាឆ្នាំដល់វដ្តនៃការផ្ទុះជំងឺគ្រុនឈាមដែលតែងតែកើតឡើងរៀងរាល់៤ ទៅ៥ឆ្នាំម្តង។

លោកវេជ្ជបណ្ឌិតបានណែនាំដល់អាណាព្យាបាល មាតាបិតា កុមារា កុមារី គ្រប់រូប រួមទាំងអាជ្ញាធរមូលដ្ឋាន សូមសកម្មចូលរួមកម្ចាត់ដង្កូវទឹក នៅតាមទីកន្លែងដែលមានទឹកដក់ ដូចជា ពាង អាងទឹក ថូផ្កា ចានទ្រជើងតុទូ ក្រឡ ធុង ខាប់ ជាដើម ដោយការផ្លាស់ប្ដូរទឹក និងលាងសម្អាតជាប្រចាំឱ្យបានយ៉ាងតិចមួយដងក្នុងមួយអាទិត្យ ឬត្រូវគ្របគម្រប ឱ្យបានជិតល្អ និងត្រូវសហការជាមួយបណ្តាញសុខាភិបាលនៅតាមមូលដ្ឋាន ដើម្បីដាក់ថ្នាំបាណកឃាដសម្លាប់ដង្កូវទឹក នៅក្នុងអាងទឹក ពាងទឹក កន្លែងដែលស្តុកទឹក ឬចិញ្ចឹមកូនត្រីប្រាំពីរពណ៌ នៅកន្លែងដែលអាចចិញ្ចឹមបាន។​ ចំពោះសម្ភារដក់ទឹកផ្សេងទៀត ដែលទុកចោលមិនប្រើប្រាស់ ដូចជាសំបក កង់ឡាន ម៉ូតូ សំបកដប កំប៉ុង ត្រឡោក ដូង ចានបាយសម្លរជ័រ កំប៉ុងជ័រ ត្រូវកប់ ដុត កំទេចចោល ឬទុកដាក់ឱ្យមានរបៀប ដើម្បីកុំឱ្យមានទឹកដក់។

ជាមួយគ្នានេះដែរប្រសិនមានសមាជិកគ្រួសារ មានរោគសញ្ញាគ្រុនក្ដៅខ្លួនខ្លាំងភ្លាមៗ ចាប់ពី ៣៩ ទៅ ៤០អង្សាសេ សូមស្វែងរកការពិគ្រោះយោបល់ និងពិនិត្យព្យាបាល ជាបន្ទាន់នៅមណ្ឌលសុខភាព ឬមន្ទីរពេទ្យដែលនៅជិតបំផុតឱ្យបានឆាប់តាមដែលអាចធ្វើទៅបាន ដើម្បីឱ្យគ្រូពេទ្យព្យាបាលឱ្យបានទាន់ពេលវេលា និងត្រឹមត្រូវនិងសូម ទូរសព្ទមកលេខ ១១៥ បើមានករណីគ្រុនក្តៅលើកុមារឬករណីជំងឺគ្រុនឈាមកើតឡើងច្រើនក្នុងភូមិឬសហគមន៍របស់ខ្លួន ៕

អត្ថបទ៖ សំអឿន