ក្រសួងអប់រំ៖ ២៥ឆ្នាំកន្លងមកនេះ រាជរដ្ឋាភិបាលកម្ពុជា បានសាងសង់អគារសិក្សាប្រមាណជា ៤ពាន់ខ្នង

លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានឱ្យដឹងថា ក្នុងអំឡុង ២៥ឆ្នាំកន្លងមកនេះ រាជរដ្ឋាភិបាលកម្ពុជា បានសាងសង់អគារសិក្សាប្រមាណជា ៤ពាន់ខ្នង។ លោកឧបនាយករដ្ឋមន្ត្រី បានឱ្យដឹងបែបនេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មី ២ខ្នង ៥បន្ទប់ និងអគារសិក្សាជួសជុលរួចរាល់ចំនួន ១០ខ្នង ស្មើនឹង២៦បន្ទប់ ក្នុងខេត្តរតនគីរី កាលពីរសៀលថ្ងៃទី២៧ ខែកមរា ឆ្នាំ២០២៦។

ក្នុងឱកាសនោះ លោកឧបនាយករដ្ឋមន្ត្រី ហង់ជួន ណារ៉ុន បានចូលរួមអបអរសាទរចំពោះការដាក់ឱ្យប្រើប្រាស់ជាផ្លូវការអគារសិក្សាថ្មី និងអគារសិក្សាជួសជុលរួចរាល់ចំនួនជាច្រើនខ្នង ក្នុងខេត្តរតនគិរី គាំទ្រថវិការួមគ្នាដោយអង្គការ ភ្លែនអន្តរជាតិកម្ពុជា អង្គការអេដ អេ អាក់ស្យុង និងមូលនិធិ Education Above All (EAA) របស់ប្រទេសកាតា ក្នុងកិច្ចសម្របសម្រួលយ៉ាងជិតស្និទ្ធរវាង មន្ទីរអប់រំ យុវជន និងកីឡា អាជ្ញាធរមូលដ្ឋាន និងសហគមន៍។ លោកថា សមិទ្ធផលទាំងអស់នេះពិតជា​បំពេញតម្រូវការជាក់ស្តែងរបស់អ្នកសិក្សានៅតំបន់ជនបទ និងកុមារជនជាតិដើមភាគតិច ព្រមទាំងបង្ហាញពីការចូលរួមចំណែករបស់ដៃគូអភិវឌ្ឍន៍ ក្នុងការជួយសម្រាលបន្ទុករបស់រាជរដ្ឋាភិបាលកម្ពុជា និងប្រជាពលរដ្ឋនៅមូលដ្ឋាន។

បើតាមលោកឧបនាយករដ្ឋមន្ត្រី «ក្នុងអំឡុង ២៥ឆ្នាំកន្លងមកនេះរាជរដ្ឋាភិបាលកម្ពុជា បានសាងសង់អគារសិក្សាប្រមាណជា ៤ពាន់ខ្នង ហើយក្រសួងអប់រំ យុវជន និងកីឡានឹងនៅតែបន្តយកចិត្តទុកដាក់ កៀរគរធនធានថវិកា ដើម្បីបន្តសាងសង់ និងជួសជុលអគារសិក្សាបន្ថែមទៀត ឆ្លើយតបនឹងតម្រូវការនៃកំណើនសិស្សជារៀងរាល់ឆ្នាំ ជាពិសេសកំណើននៃការចូលរៀននៅកម្រិតមត្តេយ្យសិក្សា ដែលនេះសបញ្ជាក់ពីការចូលរួមចំណែកយ៉ាងសកម្មពីសំណាក់មាតាបិតា និងអាណាព្យាបាល ដែលបានបញ្ជូនកូនៗឱ្យមកទទួលការអប់រំ»។

លោកបានបន្តថា វឌ្ឍនភាពជាច្រើនក្នុងវិស័យអប់រំនៅកម្ពុជា អាចសម្រេចទៅបាន ដោយមានការចូលរួមគាំទ្រពីសំណាក់ ដៃគូអភិវឌ្ឍន៍មកពីគ្រប់មជ្ឈដ្ឋាន លោកគ្រូ អ្នកគ្រូ និងបុគ្គលិកអប់រំគ្រប់លំដាប់ថ្នាក់ ហើយនេះក៏ជាសក្ខីភាពនៃការអនុវត្តយ៉ាងខ្ជាប់ខ្ជួននូវកាតព្វកិច្ចរបស់រាជរដ្ឋាភិបាល ដើម្បីធានាផ្តល់សេវាអប់រំប្រកបដោយគុណភាព សមធម៌ និង បរិយាបន្ន។

នាឱកាសនោះដែរ លោកឧបនាយករដ្ឋមន្ត្រី បានកោតសរសើរ និងថ្លែងអំណរគុណជាថ្មី ដល់អង្គការភ្លែនអន្តរជាតិកម្ពុជា អង្គការអេដ អេ អាក់ស្យុង និងមូលនិធិ Education Above All នៃប្រទេសកាតា ដៃគូអភិវឌ្ឍទាំងអស់និងសហគមន៍ដែលបានរួមគ្នាផ្តល់ការគាំទ្រដល់ការអភិវឌ្ឍវិស័យអប់រំ ផ្តោតសំខាន់លើតំបន់ដែលមានស្ថានភាពងាយរងគ្រោះ ឬតំបន់ដែលមានជនជាតិដើមភាគតិចរស់នៅ។

លើសពីនេះ ក្រសួង នឹងនៅតែបន្តពង្រឹងការអនុវត្ត ការពង្រីក ការវិនិយោគបន្ថែម និងការពិនិត្យតាមដានជាប្រចាំ ដើម្បីធានាប្រសិទ្ធភាព និងចីរភាពនៃការផ្តល់សេវាអប់រំ ជាពិសេសការលើកកម្ពស់ និងផ្តល់ឱកាសសិក្សាពេញមួយជីវិតជូនដល់ក្រុមកុមារ និងយុវជនកម្ពុជាស្របតាមតម្រូវការទីផ្សារការងារទាំងពេលបច្ចុប្បន្ន និងអនាគត៕