ស្មាត់ជប៉ុន Ishikawa នឹងចាកចេញពី អ៊ីតាលី ផ្លាស់ទៅក្រុមម្ចាស់ជើងឯកលីគតួកគី ៤ សម័យ

ស្មាត់ឆ្នើមរបស់ក្រុមជម្រើសជាតិ ជប៉ុន កីឡាករ Yuki Ishikawa នឹងចាកចេញពីក្លិបបច្ចុប្បន្នក្នុងលីគបាល់ទះ អ៉ីតាលី Sir Susa Vim Perugia ដោយផ្លាស់ទៅកាន់ក្លិបបាល់ទះម្ចាស់ជើងឯកលីគកំពូល តួកគី ៤ សម័យនៅរដូវកាលក្រោយ។

កីឡាករ Yuki Ishikawa បានលេងនៅក្លិប Sir Susa Vim Perugia ២ រដូវកាលហើយ ដោយរាប់ពីឆ្នាំ ២០២៤ មក ខណៈនៅចុងបញ្ចប់រដូវកាលនេះ Volleytrails បានរាយការណ៍ ថា ស្មាត់ជប៉ុន វ័យ ៣០ ឆ្នាំនឹងចាកចេញពីទីនេះ ដោយផ្លាស់ទៅកាន់ក្លិប Ziraat Bankası នៃលីគ តួកគី។

ក្រុម Ziraat Bankası ត្រូវបានគេដឹង ថា ជាក្រុមខ្លាំងមួយក្នុងប្រទេស តួកគី។ ក្រុមនេះត្រូវបានបង្កើតឡើងតាំងពីឆ្នាំ ១៩៨១ ហើយពួកគេធ្លាប់បានឈ្នះជើងឯកលីគបាល់ទះ តួកគី Efeler Ligi ៤ សម័យកាល និងជើង​ឯករង ២ សម័យកាល។ ជាមួយគ្នានេះ ពួកគេក៏ធ្លាប់ឈ្នះពាន អឺរ៉ុប CEV Cup ១ លើកផងដែរ នៅរដូវកាលមុន ២០២៤-២០២៥។

គួរឱ្យដឹងផងដែរ ថា កិច្ចសន្យារបស់ Yuki Ishikawa ជាមួយ Sir Susa Vim Perugia នឹងអស់សុពលភាពនៅចុងបញ្ចប់រដូវកាល ២០២៥-២០២៦ នេះហើយ ខណៈបច្ចុប្បន្នមិនទាន់មានដំណឹងណាមួយអំពីភាគីទាំង ២ នឹងបន្តកិច្ចសន្យាថ្មីនោះទេ៕

អត្ថបទ៖ សេម កុសល