កីឡា

ល្បីបំផុតនៅជប៉ុន Yuki ជាតារាបាល់ទះទី១មានរូបសំណាក់នៅសារមន្ទីរ

បានផុស

១ year មុន

នៅ

ថ្ងៃព្រហស្បតិ៍ ២២ កុម្ភៈ ២០២៤

ដោយ

ប្រធានក្រុមបាល់ទះជម្រើសជាតិជប៉ុន Yuki Ishikawa ជាកីឡាករបាល់ទះមួយរូប ទទួលបានការគោរពបំផុតនៅប្រទេសជប៉ុន តាមរយៈសមត្ថភាព ទេពកោសល្យ និងសុជីវធម៌ខ្ពស់ក្នុងការរស់នៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Yuki Ishikawa ដែលកើតថ្ងៃទី១១ ខែធ្នូ ឆ្នាំ១៩៩៥ នៅទីក្រុង Okazaki ខេត្ត Aichi កម្ពស់ ១.៩២ម៉ែត្រ ទម្ងន់ ៨៤គីឡូក្រោម ជាអ្នកលេងបាល់ទះដំបូងគេមានរូបចម្លាក់នៅក្នុងប្រទេសជប៉ុន។ បច្ចុប្បន្នរូបសំណាក់របស់គេត្រូវបានដាក់តាំងនៅសារមន្ទីរ Madame Tussauds ក្នុងទីក្រុងតូក្យូ។ រូបគេជាប់ឈ្មោះអ្នកវាយផ្ដាច់កម្ពស់៣ម៉ែត្រល្អបំផុត (Best Outside Spiker) ក្នុងព្រឹត្តិការណ៍បាល់ទះពិភពលោក FIVB World Cup (២០១៥, ២០១៩), លីគបាល់ទះពិភពលោក FIVB Nations League (២០២៣), ជើងឯកបាល់ទះអាស៊ី Asian Championship (២០១៧, ២០១៩, ២០២១) និងឈ្នះពានរង្វាន់ឯកត្តជនកីឡាករឆ្នើមប្រចាំជើងឯកអាស៊ី ឆ្នាំ២០១៧, ២០២៣។ នៅខែមេសា ឆ្នាំ២០២១ Ishikawa បានក្លាយជាប្រធានក្រុមបាល់ទះជម្រើសជាតិជប៉ុន និងដើរតួជាអ្នកវាយពីក្រៅប្រអប់យ៉ាងល្អ។

Yuki Ishikawa កើតក្នុងត្រកូលគ្រួសារជាអ្នកកីឡា ដោយម្តាយគឺអ្នកស្រី Midori ជាអតីតអ្នកលេងបាល់បោះរបស់ក្រុម DENSO។ ចំណែកឪពុកគឺលោក Mikihisa ជាអតីតអ្នករត់ប្រណាំង។ ឯបងស្រី Naomi ជាអតីតអ្នកលេងបាល់ទះ ហើយប្អូនស្រីឈ្មោះ Mayu អាយុ២៣ឆ្នាំ ជាសមាជិកក្រុមបាល់ទះនារីជប៉ុន។

តាមរយៈការជំរុញទឹកចិត្តពីក្រុមគ្រួសារ Ishikawa បានចាប់ផ្តើមលេងបាល់ទះតាំងថ្នាក់ទី៤។ សមិទ្ធផលល្អបំផុតរបស់គេកាលពីយុវជនគឺទទួលបានចំណាត់ថ្នាក់ទី៨នៅក្នុងការប្រកួតបាល់ទះជើងឯកបឋមសិក្សា All Japan Volleyball Elementary។ ឆ្នាំ២០១០ រូបគេទទួលបានចំណាត់ថ្នាក់លេខ៣បាល់ទះជើងឯកអនុវិទ្យាល័យ All Japan Junior High School។ បន្ទាប់មក រូបគេត្រូវបានជ្រើសរើសជាប្រធានក្រុមបាល់ទះខេត្ត Aichi និងបានឈ្នះមេដាយប្រាក់ក្នុងព្រឹត្តិការណ៍ JOC Junior Olympic Cup ឆ្នាំដដែល។ នៅវិទ្យាល័យ Ishikawa បានក្លាយជាសិស្សដំបូងគេឈ្នះពានរង្វាន់ Triple Crown ក្នុងការប្រកួត៣ព្រឹតិ្តការណ៍រួមមាន៖ Inter-High, National Polity និង Haruko Volley រយៈពេល២ឆ្នាំជាប់គ្នា។

ចន្លោះឆ្នាំ ២០១៤-២០១៥ Ishikawa បានផ្លាស់ទៅលេងឲ្យក្រុមអុីតាលី Parmareggio Modena ប្រហែល៣ខែបន្ទាប់ពីចប់ព្រឹត្តិការណ៍អន្តរវិទ្យាល័យ All Japan Intercollegiate។ យោងតាមមន្ត្រីសមាគមបាល់ទះជប៉ុនថា រូបគេជានិស្សិតជប៉ុនទី១ដែលបានទៅលេងលីគក្រៅប្រទេសតាមរយៈសាកលវិទ្យាល័យ និងជានិស្សិតដំបូងគេដែលបានលេងនៅលីគបាល់ទះអុីតាលី។ រដូវកាល ២០១៥-២០១៦ រូបគេបានត្រឡប់ទៅជប៉ុនវិញដោយចូលរួមជាមួយក្រុមសាកលវិទ្យាល័យ Chuo។ ចុងឆ្នាំ២០១៦ រូបគេបានផ្លាស់ទៅអុីតាលីម្តងទៀតចូលរួមជាមួយក្រុម Top Volley Latina ទាំងពេលរូបគេជានិស្សិតនៅឡើយ។

បន្ទាប់ពីបញ្ចប់ការសិក្សានៅសាកលវិទ្យាល័យក្នុងខែមីនា ឆ្នាំ២០១៨ Ishikawa បានចុះហត្ថលេខាលើកិច្ចសន្យាអាជីពដំបូងជាមួយក្រុមអុីតាលី Emma Villas Siena បន្ទាប់ពីក្លិបមួយនេះបានឡើងមកនៅលីគកំពូលអ៉ីតាលី ២០១៨-២០១៩។ បន្ទាប់មក រូបគេបានផ្លាស់ទៅក្រុម Kioene Padova។ ឆ្នាំ២០២០ Ishikawa បានផ្លាស់ទៅ Allianz Milano ហើយជាក្រុមដែលរូបគេកំពុងលេងសព្វថ្ងៃ។

ឆ្នាំ២០១២ កីឡាករ Ishikawa ត្រូវបានកោះហៅឲ្យចូលរួមក្រុមជម្រើសជាតិជប៉ុនអាយុក្រោម១៩ឆ្នាំ ជាលើកដំបូង។ ពេលនោះរូបគេបានជួយក្រុមទទួលបានចំណាត់ថ្នាក់លេខ៣ជើងឯកយុវជនអាស៊ី Asian Youth Boys Volleyball Championship នៅទីក្រុងតេអេរ៉ង់ ប្រទេសអុីរ៉ង់ និងឈ្នះពានរង្វាន់ជាអ្នកវាយផ្តាច់ល្អបំផុតប្រចាំព្រឹត្តិការណ៍។

ឆ្នាំ២០១៣ Ishikawa បានចូលរួមប្រកួតជើងឯកពិភពលោកអាយុក្រោម១៩ឆ្នាំ FIVB Volleyball Boys’ U19 នៅប្រទេសម៉ិកស៊ិក។ ពេលនោះក្រុមជប៉ុនបានបញ្ចប់ក្នុងចំណាត់ថ្នាក់ទី១៧។ ឆ្នាំដដែលនោះ រូបគេបន្តប្រកួតជើងឯកពិភពលោកអាយុក្រោម២១ឆ្នាំ FIVB Volleyball Men’s U21 នៅប្រទេសតួកគី។ ជាលទ្ធផលក្រុមជប៉ុនបានបញ្ចប់ក្នុងចំណាត់ថ្នាក់ទី១០។

ឆ្នាំ២០១៤ Ishikawa បានចូលរួមជម្រើសជាតិជប៉ុនក្រុមធំជាលើកដំបូងសម្រាប់កីឡាទ្វីបអាស៊ី Asian Games នៅទីក្រុង Incheon ប្រទេសកូរ៉េខាងត្បូង។ ពេលនោះជប៉ុនបានឈ្នះមេដាយប្រាក់ បន្ទាប់ពីចាញ់ក្រុមអ៉ីរ៉ង់ ៣-១ វគ្គផ្តាច់ព្រ័ត្រ។

នៅខែកក្កដា ឆ្នាំ២០១៧ Ishikawa បានចូលរួមប្រកួតជើងឯកអាស៊ី នៅទីក្រុង Gresik ប្រទេសឥណ្ឌូណេស៊ីដោយ ក្រុមជប៉ុនបានឈ្នះមេដាយមាស ហើយរូបគេបានឈ្នះពានរង្វាន់ឯកត្តជន២គឺពានរង្វាន់ កីឡាករឆ្នើមប្រចាំព្រឹត្តិការណ៍ និងអ្នកវាយក្រៅប្រអប់ល្អបំផុត។

ឆ្នាំ២០២១ Ishikawa បានក្លាយជាប្រធានក្រុមបាល់ទះជម្រើសជាតិជប៉ុន ក្នុងការដឹកនាំចូលរួម ព្រឹត្តិការណ៍កីឡាអូឡាំពិក រដូវក្តៅឆ្នាំ២០២០ នៅទីក្រុងតូក្យូ។ ក្រុមជប៉ុនបានបញ្ចប់ក្នុងចំណាត់ថ្នាក់លេខ៧ បន្ទាប់ពីចាញ់ក្រុមប្រេស៊ីល ៣-០ ក្នុងវគ្គ៨ក្រុមចុងក្រោយ។ នៅខែកញ្ញា ឆ្នាំ២០២១ រូបគេបានដឹកនាំក្រុមជប៉ុនឲ្យឈ្នះមេដាយប្រាក់ក្នុងការប្រកួតជើងឯកអាស៊ី ហើយរូបគេបានឈ្នះពានរង្វាន់ឯកត្តជនជា អ្នកវាយក្រៅប្រអប់ល្អបំផុត។

នៅខែកក្កដា ឆ្នាំ2023 Ishikawa និងក្រុមជប៉ុនទទួលបានចំណាត់ថ្នាក់លេខ៣លីគបាល់ទះពិភពលោក FIVB Volleyball Men’s Nations League។ នៅខែសីហា ឆ្នាំ២០២៣ រូបគេបានជួយក្រុមជប៉ុនឈ្នះមេដាយមាសលើកទី១០ ជើងឯកបាល់ទះអាស៊ី និងបានឈ្នះពានរង្វាន់ឯកត្តជនជាកីឡាករឆ្នើមប្រចាំព្រឹត្តិការណ៍។

កាលនៅជាសិស្សវិទ្យាល័យ Ishikawa បានជួយក្រុមឈ្នះជើងឯក៦ដង និងឈ្នះពានរង្វាន់ឯកត្តជនចំនួន៣០។ ពេលប្រកួតជានិស្សិតឲ្យក្រុមសាកលវិទ្យាល័យបានឈ្នះជើងឯក៨ដង និងឈ្នះពានរង្វាន់ឯកត្តជនចំនួន១០។ ក្នុងនាមកីឡាករតាំងពីយុវជន រហូតពេញវ័យសម្រាប់ក្រុមជម្រើសជាតិជប៉ុនគឺឈ្នះជើងឯក២ដង ជើងឯករង៣ដង ចំណាត់ថ្នាក់លេខ៣បីដង និងឈ្នះពានរង្វាន់ឯកត្តជនចំនួន១១៕

អត្ថបទ៖ ផា រតនា