កីឡា

វិសាខា ប្រឈមធ្លាក់ពី Top 6 នៅពេលប៉ះ ភ្នំពេញក្រោន ថ្ងៃសៅរ៍នេះ

បានផុស

៣ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

ក្លិបបាល់ទាត់ វិសាខា និង អឹមអូអាយ កំពង់ដេវ៉ា ត្រូវប្រឹងប្រែងឲ្យខ្លាំងលើសពី ១០០ % ដើម្បីរក្សាខ្លួនឲ្យស្ថិតនៅក្នុងចំណោមក្រុមលំដាប់កំពូលទាំង ៦ (Top 6) សម្រាប់ការប្រកួតជុំទី ៣ ក្នុងការប្រជែងឯកលីគបាល់ទាត់កំពូលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិសាខា មាន ២៩ ពិន្ទុ ស្ថិតនៅលេខ ៦ ក្នុងតារាងពិន្ទុ បន្ទាប់ពីឈ្នះ ៧ ប្រកួត ស្មើ ៨ ប្រកួត និងចាញ់ ៤ ប្រកួត។ ការប្រកួតសប្តាហ៍ចុងក្រោយនៃជុំទី២ ពួកគេត្រូវធ្វើការធ្ងន់មែនទែនដោយត្រូវជួបក្រុមលេខ ២ ភ្នំពេញក្រោន វេលាម៉ោង ៦ ល្ងាច ថ្ងៃសៅរ៍ ទី២១ ខែកុម្ភៈ ឆ្នាំ ២០២៦ នៅកីឡដ្ឋានភ្នំពេញក្រោន។ ពួកគេត្រូវការឈ្នះដាច់ខាត ដើម្បីស្ថិតនៅវគ្គ Top 6 ដោយស្វ័យប្រវត្តិ។ ប្រសិនបើស្មើ ឬ ចាញ់នោះ ពួកគេប្រឈមនឹងហានិភ័យខ្ពស់។

វាពិបាកខ្លាំងណាស់សម្រាប់ វិសាខា ក្នុងជំនួបសប្តាហ៍ទី ២០ ដោយសារ ភ្នំពេញក្រោន ពុះពារគ្រប់បែបយ៉ាងដើម្បីរកឲ្យបានពិន្ទុនៅក្នុងផ្ទះរបស់ខ្លួន បន្ទាប់ពីសប្តាហ៍មុនបានចាញ់ អង្គរថាយហ្គឺរ ៣-៤។ ការរកបានពិន្ទុគឺដើម្បីឱកាសប្រជែងជើងឯកជាមួយព្រះខ័នរាជស្វាយរៀង។ ជួបគ្នាកាលពីជើងទី១ ក្រុមទាំងពីរស្មើគ្នា ១-១ នៅកីឡដ្ឋានវិសាខា។

ចំណែក ក្រុមអឹមអូអាយ កំពង់ដេវ៉ា វិញ ត្រូវមើលលទ្ធផលរបស់ វិសាខា នៅថ្ងៃសៅរ៍ មុនពេលពួកគេ ដាក់ចិត្តលេងកម្រិតណាជាមួយ អាយអេសអាយ ដង្កោសែនជ័យ នៅថ្ងៃអាទិត្យ ទី២២ ខែកុម្ភៈ។ ប្រសិនបើ វិសាខា ឈ្នះ ភ្នំពេញក្រោន នោះ កំពង់ដេវ៉ា អស់ឱកាសវគ្គ Top 6 ប៉ុន្តែប្រសិនបើ វិសាខា ចាញ់ ភ្នំពេញក្រោន គឺជាឱកាសមាសសម្រាប់ កំពង់ដេវ៉ា ហើយ។

ក្រុម អឹមអូអាយ កំពង់ដេវ៉ា មាន ២៧ ពិន្ទុ តាមពីក្រោយ វិសាខា តែ ២ ពិន្ទុប៉ុណ្ណោះ បន្ទាប់ពីឈ្នះ ៧ ស្មើ ៦ និងចាញ់ ៦ ស្ថិតនៅលេខ ៧ ក្នុងតារាង។

សូមបញ្ជាក់ថា ក្រុមស្ថិតនៅ Top 6 ដោយជោគជ័យគឺ ព្រះខ័នរាជស្វាយរៀង ភ្នំពេញក្រោន អង្គរថាយហ្គឺរ ណាហ្គាវើលដ៍ និង បឹងកេត។ នៅជុំទី៣ ក្រុមទាំង ៦ ត្រូវធ្វើការប្រកួតពីរជើងទៀតគឺក្នុងដី និងក្រៅដី សរុបចំនួន ១០ ប្រកួតម្នាក់ទៀតទើបចប់លីគកំពូលកម្ពុជារដូវកាល ២០២៥-២៦៕