AFP ចុះ​ផ្សាយ​ពី​ការ​ប្ដេជ្ញា​របស់​សម្តេចធិបតី ក្នុង​ការ​បោសសម្អាតក្រុម​Scamដែលធ្វើ​ឲ្យ​ខូចឈ្មោះកម្ពុជា

ចេញ​ផ្សាយ​ថ្ងៃ​ទី​២៥​ខែ​កុម្ភៈ​ឆ្នាំ​២០២៦ ទីភ្នាក់ងារ​ព័ត៌មាន​អន្តរជាតិ AFP បាន​ដក​ស្រង់​ប្រសាសន៍​​នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត ដែល​បាន​បង្ហាញ​ពី​ការ​ប្តេជ្ញាលុបបំបាត់បណ្តាញឆបោកតាមអ៊ីនធឺណិត (Scam) ដែលកំពុងរីករាលដាល និង​ធ្វើ​​ឲ្យ​ខូចឈ្មោះ​កម្ពុជា។

សម្ដេច​បាន​​លើកឡើង​ប្រាប់​ AFP ថា «សេដ្ឋកិច្ចខ្មៅ»​នេះកំពុងបំផ្លាញកេរ្តិ៍ឈ្មោះជាតិ និងប៉ះពាល់ដល់វិស័យទេសចរណ៍ និងការវិនិយោគ។ ក្នុងកិច្ចសម្ភាសន៍ សម្តេចបានទទួលស្គាល់ថា ទោះបីជាឧស្សាហកម្មឆបោកដែលមានតម្លៃរាប់ពាន់លានដុល្លារនេះ បានជួយជំរុញវិស័យអចលនទ្រព្យ និងសំណង់ដោយប្រយោលក៏ដោយ ប៉ុន្តែរាជរដ្ឋាភិបាលមិនបានទទួលផលចំណេញពីសកម្មភាពទាំងនេះទេ។ សម្តេចបានបដិសេធថា កម្ពុជាមិនបានពឹងផ្អែកលើការឆបោកទាំងនេះឡើយ បើទោះបីជាមានការប៉ាន់ស្មានថាមានមនុស្សប្រហែល ១០០ ០០០​នាក់កំពុងធ្វើការក្នុងវិស័យនេះក៏ដោយ។

សម្តេចនាយករដ្ឋមន្ត្រីក៏បានបកស្រាយអំពីការចាប់ខ្លួន​លោក Chen Zhi ទៅកាន់ប្រទេសចិនផងដែរ។ សម្តេចធិបតីបានបញ្ជាក់ថា អាជ្ញាធរមិនបានដឹងថាបុគ្គលនេះគឺជា «មេខ្លោង» នៃអាណាចក្រឆបោកឡើយ ដោយសារកន្លងមកក្រុមហ៊ុន Prince Group ហាក់ដូចជាមានអាជីវកម្មស្របច្បាប់ធម្មតា។ សម្តេចបានពន្យល់ថា ការបញ្ជូនខ្លួន Chen Zhi ទៅប្រទេសចិន ជាជាងសហរដ្ឋអាមេរិក គឺដោយសាររូបគេត្រូវបានដកសញ្ជាតិខ្មែរវិញ បន្ទាប់ពីរកឃើញថាបានប្រើប្រាស់ឯកសារក្លែងក្លាយដើម្បីទទួលបានសញ្ជាតិ ដែលធ្វើ​​ឲ្យ​រូបគេនៅសល់តែសញ្ជាតិចិនប៉ុណ្ណោះ។

សម្តេចធិបតី ហ៊ុន ម៉ាណែត បានសង្កត់ធ្ងន់ថា អាជ្ញាធរនឹងចាត់វិធានការភ្លាមៗនៅពេលដឹងពីសកម្មភាពខុសច្បាប់ ដើម្បីបោសសម្អាត​បញ្ហាឆបោក​តាម​អ៊ីនធឺណិត និងការពារសេដ្ឋកិច្ចដ៏ស្មោះត្រង់របស់ជាតិ។ បច្ចុប្បន្ន មជ្ឈមណ្ឌលឆបោកទាំងនេះបានពង្រីកប្រតិបត្តិការរបស់ខ្លួនពីការកំណត់គោលដៅលើអ្នកនិយាយភាសាចិន ទៅកាន់ជនរងគ្រោះជុំវិញពិភពលោក តាមរយៈការបង្កើតទំនាក់ទំនងស្នេហាក្លែងក្លាយ និងការវិនិយោគរូបិយប័ណ្ណឌីជីថលជា​ដើម៕

ប្រែសម្រួល៖ ឈាង