កីឡា

ព្រះខ័នរាជស្វាយរៀង បន្តកាន់កាប់កំពូលតារាងកាន់តែរឹងមាំ

បានផុស

៣ ខែ មុន

នៅ

ថ្ងៃចន្ទ ២ មីនា ២០២៦

ដោយ

ក្រុមព្រះខ័នរាជស្វាយរៀង កាន់តែរឹងមាំក្នុងការគ្រប់គ្រងលើកំពូលតារាងនៃលីគបាល់ទាត់កំពូលកម្ពុជា បន្ទាប់ពីរកបាន ៣ ពិន្ទុបន្ថែមសម្រាប់ការប្រកួតសប្តាហ៍ទី២១ ក្នុងវគ្គក្រុមលំដាប់កំពូលទាំង ៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខ័នរាជស្វាយរៀង បានយកឈ្នះ ក្រុម អឹមអូអាយ កំពង់ដេវ៉ា ដោយលទ្ធផល ២-០ កាលពីថ្ងៃសៅរ៍ ទី២៨ ខែកុម្ភៈ ឆ្នាំ ២០២៦ នៅពហុកីឡដ្ឋានជាតិមរតកតេជោ។ ២គ្រាប់របស់ពួកគេរកបានដោយកីឡាករ គឹម សុខយុទ្ធ និង ១គ្រាប់ទៀតជាការភ្លាត់ចូលទីខ្លួនឯងរបស់ក្រុម អឹមអូអាយ កំពង់ដេវ៉ា។

តាមរយៈជ័យជម្នះនេះ ព្រះខ័នរាជស្វាយរៀង បានបង្កើនការឈ្នះចំនួន ១៨ លើក និងចាញ់ ៣ លើក រកបាន ៥៤ ពិន្ទុ ដែលនាំមុខ ៧ ពិន្ទុ លើគូប្រជែងលេខ ២ ភ្នំពេញក្រោន ដែលមាន ៤៧ ពិន្ទុ បន្ទាប់ពីពួកគេបានត្រឹមស្មើ អង្គរថាយហ្គឺរ ០-០។ ភ្នំពេញក្រោន ហាក់ធ្វើមិនសូវបានល្អប៉ុន្មានទេមួយរយៈពេលចុងក្រោយដែលធ្វើឲ្យពួកគេកាន់តែពិបាកក្នុងការប្រជែងជើងឯកជាមួយ ព្រះខ័នរាជស្វាយរៀង។

មួយក្រុមទៀតដែលរក ៣ ពិន្ទុ គឺ បឹងកេត បន្ទាប់ពីបានយកឈ្នះ ណាហ្គាវើលដ៍ដោយលទ្ធផល ១-០។ នេះជាការសងសឹកបានសម្រេចសម្រាប់ក្រុមដែលប្រើប្រាស់ពហុកីឡដ្ឋានជាតិអូឡាំពិកជាផ្ទះមួយនេះ ពីព្រោះ២ប្រកួតមុនគឺ បឹងកេត ចាញ់១ និងស្មើ១។ ដូច្នេះ បឹងកេត មាន ៣៥ ពិន្ទុ ប៉ុន្តែឈរលេខ ៥ នៅពីក្រោម ណាហ្គាវើលដ៍ ដែលមាន ៣៥ ពិន្ទុដែរ ប៉ុន្តែចំណេញគ្រាប់បាល់ច្រើនជាងគេ។

ការប្រកួតវគ្គ Top 6 នៅសល់ ៩ ប្រកួតទៀតសម្រាប់ក្រុមនីមួយៗ។ សម្រាប់សប្តាហ៍ទី២២ ថ្ងៃអាទិត្យ ទី៨ ខែមីនា ឆ្នាំ ២០២៦ ព្រះខ័នរាជស្វាយរៀង ត្រូវប៉ះ ណាហ្គាវើលដ៍ នៅទឹកដីខេត្តកំពង់ស្ពឺ ខណៈ ភ្នំពេញក្រោន ទទួល អឹមអូអាយ កំពង់ដេវ៉ា និង បឹងកេត ទទួល អង្គរថាយហ្គឺរ។

តារាងពិន្ទុក្រុមលំដាប់ Top 6