សេដ្ឋកិច្ច

ហាងឆេងមាសក្នុងស្រុក លក់ចេញ ៦៣០ ដុល្លារ មួយជី

បានផុស

៣ ខែ មុន

នៅ

ថ្ងៃសុក្រ ៦ មីនា ២០២៦

ដោយ

តម្លៃហាងឆេងមាសក្នុងស្រុកលក់ចេញ ៦៣០ ដុល្លារ ក្នុងមួយជី នៅព្រឹកថ្ងៃទី ០៦ ខែមីនា មានការធ្លាក់ចុះបន្តិច ខណៈអ្នកជំនាញអះអាងថា តម្លៃមាសនៅតែបន្តរក្សាតម្លៃខ្ពស់ ដោយសារសង្គ្រាមនៅតំបន់មជ្ឈិមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities ប្រាប់កម្ពុជាថ្មីថា តម្លៃមាសបានបន្តកើនឡើងតាំងពីដើមឆ្នាំ ២០២៦ រហូតដល់ ៦៦០០ ដុល្លារ ក្នុងមួយតម្លឹង ដោយសារតែវិបត្តិសេដ្ឋកិច្ច ភាពតានតឹងភូមិសាស្ត្រនយោបាយ និងសម្ពាធពន្ធរបស់សហរដ្ឋអាមេរិក។

លោក ឡុង សំណាង លើកឡើងថា នៅពេលសហរដ្ឋអាមេរិក និងអ៊ីស្រាអែល បើកការវាយប្រហារទៅលើប្រទេសអ៊ីរ៉ង់ កាលពីថ្ងៃសៅរ៍សប្ដាហ៍មុនបានធ្វើឱ្យតម្លៃមាសហក់ឡើង បន្ទាប់មកមានការធ្លាក់ចុះមកវិញ ដោយសារតែវិនិយោគិនមួយចំនួន បានដកលុយពីការវិនិយោគលើមាសហើយទៅវិនិយោគលើប្រេងវិញ។

លោក ឡុង សំណាង បញ្ជាក់ថា៖ «ប្លុកហ្នឹងគឺជាតំបន់ប្រេង ដែលជាពាណិជ្ជកម្មមួយដ៏ធំនៅលើពិភពលោក ហើយវាក៏ជះឥទ្ធិពលសេដ្ឋកិច្ចទៅលើបណ្ដាប្រទេសមួយចំនួន គេមើលឃើញថា បើមានបញ្ហានៅតំបន់នោះ ការរាំងស្ទះក្នុងការដឹកជញ្ជូនប្រេង កាត់បន្ថយនូវការផ្គត់ផ្គង់ ជំរុញឱ្យតម្លៃហាងឆេងប្រេងកើនឡើង»។

អ្នកជំនាញរូបនេះ បន្ថែមថា វិនិយោគិនបានដកកញ្ចប់លុយមួយចំនួនទៅវិនិយោគលើប្រេង ក្នុងឱកាសដែលអាចទាញផលចំណេញ។

លោក ឡុង សំណាង បន្ថែមថា៖ «នៅយប់ថ្ងៃចន្ទ និងព្រឹកថ្ងៃអង្គារ យើងឃើញថា តម្លៃហាងឆេងមាស តម្លៃមាសមានការធ្លាក់ចុះ ដោយសារតែមូលធននៃការជួយញដូរមាសឃើញដកសាច់ប្រាក់នៃការជួញដូរច្រើន ខណៈស្ដុកអាមេរិកមួយចំនួនក៏ថយចុះដែរ វិនិយោគិនមួយចំនួនបានលក់មាស ដើម្បីកាន់ប្រាក់ដុល្លារទៅទិញប្រេងដែលគេអាចយកផលចំណេញក្នុងរយៈពេលខ្លី»៕

អត្ថបទ៖ ឡេង ដេត