លទ្ធផលពិនិត្យបង្ហាញថា នាយក្រិន មានជំងឺរលាកស្រោមខួរក្បាល ខណៈតម្រូវសម្រាកព្យាបាល ២សប្តាហ៍

ក្រោយធ្វើឱ្យអ្នកគាំទ្រ និងមហាជនព្រួយបារម្ភយ៉ាងខ្លាំងអំពីស្ថានភាពសុខភាពរបស់តារាកំប្លែង នាយក្រិន ពេលនេះតារាកំប្លែង ប្រិមប្រិយ បានបញ្ជាក់លទ្ធផលពិនិត្យវេជ្ជសាស្ត្រដែលបង្ហាញថា លោកពិតជាមាន ជំងឺរលាកស្រោមខួរក្បាល ពិតមែន ខណៈក្រុមគ្រូពេទ្យបានណែនាំឱ្យលោកសម្រាកព្យាបាល និងតាមដានសុខភាពប្រមាណ ២សប្តាហ៍។

បច្ចុប្បន្ន នាយក្រិន កំពុងស្ថិតក្រោមការថែទាំយ៉ាងជិតស្និទ្ធពីក្រុមគ្រូពេទ្យ ខណៈក្រុមគ្រួសារ មិត្តរួមសិល្បៈ និងអ្នកគាំទ្រជាច្រើនក៏កំពុងផ្ញើសារលើកទឹកចិត្ត និងជូនពរឱ្យលោកឆាប់ជាសះស្បើយ ដើម្បីអាចវិលត្រឡប់មកបន្តសកម្មភាពសិល្បៈវិញក្នុងពេលឆាប់ៗខាងមុខ។

ចំណែកឯថ្លៃព្យាបាល ប្រិមប្រិយ បញ្ជាក់ថា គឺទទួលបានជំនួយពីក្រុមហ៊ុនភេសជ្ជៈ Pocari Sweat ដែលរ៉ាប់រងលើថ្លៃព្យាបាលទាំងស្រុង។

គួររំលឹកថា មុនបញ្ជូនមកព្យាបាលនៅមន្ទីរពេទ្យកាល់ម៉ែត្រ ក្នុងក្រុងភ្នំពេញ ដំបូងឡើយ នាយក្រិន បានសម្រាកព្យាបាលនៅពេទ្យឯកជនមួយ ក្នុងខេត្តបាត់ដំបង ដោយការកំណត់រោគសញ្ញាជាជំហានដំបូង គឺរលាកត្រចៀកធ្ងន់ធ្ងរ និងមានមេរោគក្នុងឈាម ដល់ថ្នាក់វង្វេងស្មារតីថែមទៀត ពោលគឺស្គាល់មុខអ្នកជុំវិញខ្លូន តែមិនស្គាល់ឈ្មោះ។ ដោយហេតុនេះ លោក ហ្វីលីព តារាសម្តែង និងជាអ្នកស្និតស្នាលនឹងនាយក្រិន ក៏សម្រេចបញ្ជូនពោះម៉ាយកម្សត់កូន ៣រូបនេះ មកកាន់មន្ទីរពេទ្យធំនៅភ្នំពេញតែម្តង ដោយមានការជួយជ្រោមជ្រែងមើលថែ ពីអតីតដៃគូសិល្បៈកំប្លែងរួមក្រុម ប្រិមប្រិយ និងតែងរាយការណ៍ពីស្ថានភាពលោកជាបន្តបន្ទាប់ ដើម្បីឱ្យសាធារណជនបានជ្រាប។

យ៉ាងណា ក្រោយលទ្ធផលបង្ហាញថា នាយក្រិន មាន ជំងឺរលាកស្រោមខួរក្បាល ក្រុមគ្រូពេទ្យតម្រូវឱ្យលោកសម្រាកព្យាបាល និងតាមដានសុខភាពប្រមាណ ២សប្តាហ៍ផងដែរ៕