មនុស្សជាង៣​លាននាក់ រត់ចោលផ្ទះសម្បែងដើម្បីគេចពីភ្លើងសង្រ្គាម​នៅអ៊ីរ៉ង់

អង្គការសហប្រជាជាតិបានចេញសេចក្តីព្រមានអាសន្នមួយកាលពីថ្ងៃព្រហស្បតិ៍​ទី​១២​ខែ​មីនា​ឆ្នាំ​២០២៦​ថា មនុស្សរហូតដល់ទៅ​៣,២​លាននាក់ ត្រូវបានបង្ខំចិត្តបោះបង់ចោលផ្ទះសម្បែង និងភៀសខ្លួននៅទូទាំងប្រទេសអ៊ីរ៉ង់ ខណៈដែលការប្រយុទ្ធគ្នាកាន់តែរីករាលដាលខ្លាំង។

តាមការវាយតម្លៃបឋម​ចេញ​​ផ្សាយ​ដោយ​ទីភ្នាក់ងារ​ព័ត៌មាន​រ៉យទ័រ គ្រួសារចន្លោះពី​៦០ម៉ឺន​ទៅ​១​លានគ្រួសារ បានសម្រេចចិត្តរត់គេចចេញពីទីក្រុងតេហេរ៉ង់ និងទីក្រុងធំៗផ្សេងទៀត ដើម្បីទៅរកទីជម្រកសុវត្ថិភាពនៅតាមបណ្តាខេត្តភាគខាងជើង និងតំបន់ជនបទដាច់ស្រយាល។

លោក Ayaki Ito អ្នកសម្របសម្រួលផ្នែកគ្រាអាសន្ននៃទីភ្នាក់ងារជនភៀសខ្លួនអង្គការសហប្រជាជាតិ (UNHCR) ប្រចាំតំបន់មជ្ឈិមបូព៌ា បានលើកឡើងថា ចំនួនអ្នកភៀសខ្លួននេះនឹងបន្តកើនឡើងបន្ថែមទៀត ដរាបណាសង្រ្គាមនៅតែបន្តឆាបឆេះ។ លោកបានសង្កត់ធ្ងន់ថា នេះគឺជា​ការកើនឡើងនូវតម្រូវការមនុស្សធម៌យ៉ាងគួរ​​ឲ្យ​ព្រួយបារម្ភបំផុត។

អ្វីដែលកាន់តែអាក្រក់នោះគឺ វិបត្តិនេះកំពុងវាយប្រហារយ៉ាងខ្លាំងដល់ជនភៀសខ្លួនដែលមានស្រាប់នៅក្នុងប្រទេសអ៊ីរ៉ង់ ជាពិសេសគឺជនជាតិអាហ្វហ្គានីស្ថាន។ លោក Ito បានពន្យល់ថា គ្រួសារទាំងនោះ​គឺជាក្រុមដែលងាយរងគ្រោះបំផុត ព្រោះពួកគេមានស្ថានភាពរស់នៅលំបាកស្រាប់ និងខ្វះខាតបណ្តាញគាំទ្រ ដែលធ្វើឲ្យ​ស្ថានភាពមនុស្សធម៌ក្នុងតំបន់កាន់តែស្មុគស្មាញ និងដុនដាបខ្លាំង។

ដើម្បីឆ្លើយតបនឹងវិបត្តិដ៏ធំនេះ UNHCR កំពុងតែមមាញឹកក្នុងការកែសម្រួលប្រតិបត្តិការរបស់ខ្លួន និងសហការជាមួយអាជ្ញាធរក្នុងស្រុក ដើម្បីត្រៀមលក្ខណៈសម្រាប់លំហូរមនុស្សភៀសខ្លួនដែលនឹងមានកាន់តែច្រើននៅពេលខាងមុខ។ អង្គការសហប្រជាជាតិក៏បានអំពាវនាវយ៉ាងទទូចដល់ភាគីជម្លោះទាំងអស់ ឲ្យ​មេត្តាការពារអាយុជីវិតជនស៊ីវិល និងបើកផ្លូវ​ឲ្យ​ជំនួយមនុស្សធម៌អាចចូលទៅដល់អ្នកដែលកំពុងត្រូវការបំផុត។ ជាមួយគ្នានេះដែរ UN ក៏បានស្នើ​ឲ្យ​ប្រទេសជិតខាងមេត្តាបើកព្រំដែន ដើម្បីទទួលយកអ្នកដែលកំពុងស្វែងរកសន្តិសុខ ស្របតាមកាតព្វកិច្ចអន្តរជាតិ៕

ប្រែសម្រួល៖ ឈាង