នៅថៃ ដល់ថ្នាក់ពលរដ្ឋ យកកន្ទេលខ្នើយ មកដេកចាំនៅមុខការ៉ាស់សាំង តែម្តង 

ប្រជាជនថៃ ជាពិសេសកសិករតែម្តងកំពុងរងទុក្ខវេទនាព្រោះតែវិបត្តិប្រេងឥន្ធនៈ ដល់ថ្នាក់ឥឡូវនេះអ្នកខ្លះត្រូវបង្ខំចិត្តយកកន្ទេលខ្នើយ មកដេកចាំនៅការ៉ាស់សាំងតែម្តង ដើម្បីទិញឲ្យទាន់គេ។

ករណីនេះកើតឡើងក្នុងខេត្ត Kamphaeng Phet ដោយប្រជាពលរដ្ឋយ៉ាងច្រើនកុះករ បាននាំគ្នាស្ពាយធុងសាំង មកបោះជំរំនៅពីមុខស្ថានីយប្រេងឥន្ធនៈតែម្តង ដើម្បីដេកចាំចាំរថយន្តដឹកប្រេង ធ្វើដំណើរមកដល់។

តាមការផ្សាយរបស់ Amarin កាលពីថ្ងៃអាទិត្យទី២២ខែមីនាឆ្នាំ២០២៦ ពលរដ្ឋថៃ ទាំងក្មេងចាស់ប្រុសស្រី នាំគ្នាមកដេកនៅមុខការ៉ាសសាំងមួយក្នុងខេត្ត Kamphaeng Phet ដើម្បីរង់ចាំទិញប្រេង មានដល់អ្នកខ្លះនិយាយថា ពួកគេអត់ខ្លាចមូសខាំទេ ខ្លាចតែអត់បាន។

យ៉ាងណា ស្ថានីយប្រេងឥន្ធនៈទាំងឡាយ បានបិទប្រកាសអំពីវិធានការបន្ទាន់ ស្របតាមគោលការណ៍បែងចែកប្រេងជូនសាធារណជន ពោលគឺកំណត់បរិមាណប្រេងដែលអនុញ្ញាតឲ្យចាក់ក្នុងធុង ឬសម្រាប់រថយន្តនីមួយៗ មិនឲ្យលើសពី ៣ ០០០ បាតឡើយ ក្នុងមួយគ្រឿង។

ងាកទៅខេត្ត Phichit ឯណោះវិញ វត្ត Wichitraram លែងមានប្រេងម៉ាស៊ូតដើម្បីបូជាសពទៀតហើយ ដែលនេះជាទុក្ខលំបាកទាំងសម្រាប់ពុទ្ធសាសនិកនិងព្រះសង្ឃ។

ព្រះតេជព្រះគុណ Luang Phi Bom ដែលជាព្រះចៅអធិការវត្ត បានបង្ហោះសារលើបណ្តាញសង្គមថា ក្រៅពីនិមន្តបិណ្ឌបា​ត្រ ព្រះអង្គក៏ត្រូវតែរកទិញប្រេងម៉ាស៊ូតដើម្បីយកមកបូជាសពដែរ ព្រោះមេរុសម័យទំនើប គឺត្រូវប្រើប្រាស់ប្រេងម៉ាស៊ូតជាដាច់ខាត ខណៈសពមួយត្រូវប្រើប្រាស់ប្រេងម៉ាស៊ូតប្រហែល៦០លីត្រ ដើម្បីបូជាឲ្យឆេះអស់ល្អ និងមិនប៉ះពាល់បរិស្ថាន។

យ៉ាងណា មិនមែនជារឿងងាយឡើយ ស្ថានីយប្រេងមួយចំនួន មិនព្រមលក់ប្រេងដាក់ក្នុងប៊ីដុងឲ្យដាច់ខាត ហើយស្ថានីយខ្លះទៀតតម្រូវឲ្យវត្តបង្ហាញ «សំបុត្រមរណភាព» ទើបព្រមលក់ឲ្យព្រោះខ្លាចគេបោក៕

អត្ថបទ៖ សុខ សុវណ្ណ