តម្លៃប្រេងអន្តរជាតិងើបឡើងវិញ ក្រោយធ្លាក់ចុះជាង ១០ ដុល្លារកាលពីថ្ងៃចន្ទ

តម្លៃប្រេងអន្តរជាតិ​បាន​ស្ទុះងើបឡើងវិញសម្រាប់ការជួញដូរលើទីផ្សារអាស៊ីនាព្រឹកថ្ងៃអង្គារ​ (២៤ មីនា) នេះ ក្រោយពី​ធ្លាក់ចុះជាគំហុកកាលពីម្សិលមិញ ជុំវិញក្ដីរំពឹងពីភាពធូរស្រាលនៃជម្លោះរវាងអ៊ីស្រាអែល សហរដ្ឋអាមេរិក និងអ៊ីរ៉ង់​។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ពេលបិទការជួញដូរនៅថ្ងៃចន្ទ តម្លៃប្រេងកុងត្រា ម៉ាក Brent ​បានធ្លាក់ចុះ ១២,២៥ ដុល្លារ ឬ ១០,៩% មកនៅត្រឹម ៩៩,៩៤ ដុល្លារ/បារ៉ែល ខណៈ​តម្លៃប្រេងអាមេរិក ម៉ាក West Texas Intermediate (WTI) បានធ្លាក់ចុះ ១០,១០ ដុល្លារ ឬ ១០,៣% មកនៅត្រឹម ៨៨,១៣ ដុល្លារ/បារ៉ែល។

ការធ្លាក់ចុះគំហុកនេះ កើតឡើងក្រោយ​ប្រធានាធិបតីអាមេរិក លោក ដូណាល់ ត្រាំ បាននិយាយថា លោកនឹងពន្យារពេលការវាយប្រហារយោធាណាមួយប្រឆាំងនឹងរោងចក្រថាមពលអ៊ីរ៉ង់រយៈពេល ៥ ថ្ងៃ ហើយបានលើកឡើងពី «កិច្ចពិភាក្សាប្រកបដោយស្ថាបនា» ដើម្បីដោះស្រាយអរិភាពនៅមជ្ឈិមបូព៌ា។

យ៉ាងណាមិញ តម្លៃប្រេងស្ទុះងើបឡើងវិញនៅថ្ងៃអង្គារនេះ ដោយ​តម្លៃប្រេងម៉ាក Brent បាន​កើនឡើង ៣,៧៤​ ដុល្លារ ឬ ៣,៧៤% ដល់ ១០៣,៧ ដុល្លារ/បារ៉ែល ខណៈប្រេង WTI បាន​កើនឡើង ៣,៤២ ដុល្លារ ឬ ៣,៨៨% ដល់ ៩១,៥៥ ដុល្លារ/បារ៉ែល។

ការកើនឡើងវិញនេះ កើតឡើងក្រោយអ៊ីរ៉ង់បាន​ច្រានចោលការអះអាងរបស់លោក ត្រាំ ថា ​ក្រុង​តេអេរ៉ង់​បាន​ចរចាជាមួយសហរដ្ឋអាមេរិកដើម្បីឆ្ពោះទៅរកការបញ្ចប់ជម្លោះ។ អ៊ីរ៉ង់លើកឡើងថា សម្ដីរបស់​ ត្រាំ គ្រាន់តែដើម្បីក្រឡុកទីផ្សារហិរញ្ញវត្ថុប៉ុណ្ណោះ ខណៈ​កងឆ្មាំបដិវត្តន៍អ៊ីរ៉ង់បាននិយាយថា ពួកគេបានបើកការវាយប្រហារថ្មីទៅលើគោលដៅ​អាមេរិក និងបានថ្កោលទោសការ​លើកឡើងរបស់លោក ត្រាំ ពាក់ព័ន្ធនឹង​ការចរចាថាជា ​«ប្រតិបត្តិការផ្លូវចិត្តដែលហួសសម័យ​»។

គួរគូសបញ្ជាក់ថា មុនលោក ត្រាំ អះអាងពីការចរចាកាលពីថ្ងៃចន្ទ លោកបាន​គំរាមថានឹង​កម្ទេចហេដ្ឋារចនាសម្ព័ន្ធថាមពលរបស់អ៊ីរ៉ង់ ប្រសិន​បើប្រទេសនេះមិនបញ្ឈប់ការបិទច្រកសមុទ្រហ័រមូហ្ស។ ជាការឆ្លើយតប ​កងកម្លាំងឆ្មាំបដិវត្តន៍អ៊ីរ៉ង់ បាននិយាយថា ពួកគេនឹងវាយប្រហាររោងចក្រថាមពលរបស់អ៊ីស្រាអែល និងបណ្ដាប្រទេសនៅឈូងសមុទ្រពែរ្សទាំងអស់ ដែល​ហ៊ានឱ្យ​អាមេរិក​ប្រើមូលដ្ឋានទ័ពដើម្បីវាយប្រហារ។ ភាពតានតឹងបែបនេះហើយ ដែលធ្វើឱ្យ​តម្លៃប្រេងម៉ាក Brent ជួញដូរនៅតម្លៃខ្ពស់ជាង ១១០ ដុល្លារ/បារ៉ែល នាពេលកន្លងមក៕