ប្រឡងជ្រើសរើសក្របខ័ណ្ឌមន្ត្រីពន្ធនាគារ សម្រាប់​ឆ្នាំ២០២៦ ធ្វើឡើងនៅវិទ្យាល័យជា ស៊ីម សន្ធរម៉ុក ជ្រើសរើសយកមន្ត្រី៥៣រូប

គណៈកម្មការប្រឡងប្រជែងជ្រើសរើសក្របខ័ណ្ឌមន្ត្រីពន្ធនាគារ សម្រាប់ឆ្នាំ២០២៦ បានដំណើរការប្រឡងប្រជែងនាព្រឹកថ្ងៃអាទិត្យ ទី២៩ ខែមីនា ឆ្នាំ២០២៦នេះ នៅ «មណ្ឌលប្រឡងវិទ្យាល័យជា ស៊ីម សន្ធរម៉ុក »មានទីតាំងស្ថិត នៅក្នុង សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។ ជាមួយនឹងបេក្ខជនប្រឡងចំនួន ២៣៩រូប ជានារីចំនួន ៩៩ រូប ស្មើនឹង ១១ បន្ទប់ ដោយត្រូវជ្រើសរើសយកចំនួន៥៣រូប។

ការប្រឡងនេះធ្វើឡើងក្រោមការអញ្ជើញកាត់វិញ្ញាសារប្រឡង ដោយលោក សន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ និងលោក ឆាយ វីរៈ អភិបាលរងរាជធានីភ្នំពេញ រួមនឹងមន្ត្រីពាក់ពន្ធ័មួយចំនួនទៀត។

មន្ត្រីរដ្ឋបាលរាជធានីភ្នំពេញ បានឱ្យដឹងថា ការប្រឡងជ្រើសរើសក្របខ័ណ្ឌមន្ត្រីពន្ធនាគារ ក្រសួងមហាផ្ទៃ សម្រាប់ឆ្នាំ២០២៦ មានបេក្ខជនសរុបចំនួន ២៣៩រូប ជានារីចំនួន ៩៩ រូប ស្មើនឹង ១១ បន្ទប់ ក្នុងនោះរួមមាន ពន្ធនាគាររាជធានីភ្នំពេញ បេក្ខជនដាក់ពាក្យ ៩២រូប (នារី ២០រូប) ស្មើនឹង ០៤បន្ទប់។ មណ្ឌលអប់រំកែប្រែទី១ បេក្ខជនដាក់ពាក្យ ៦៥រូប (នារី ០០រូប) ស្មើនឹង ០៣បន្ទប់។ មណ្ឌលអប់រំកែប្រែទី២ បេក្ខជនដាក់ពាក្យ ៨២រូប (នារី ៧៩រូប) ស្មើនឹង ០៤ បន្ទប់។ ការប្រលងនេះ ជ្រើសរើសបេក្ខជនជាប់ចំនួន៥៣រូប។ ការរៀបចំការប្រឡងមានរយៈពេល០២ម៉ោង ដោយចាប់ពីម៉ោង០៨:០០នាទី រហូតដល់ម៉ោង១០:០០នាទីព្រឹកជាមួយនិងវិញ្ញាសាប្រឡងចំណេះដឹងទូទៅ និងចំណេះដឹងវិស័យពន្ធនាគារ។

ចំពោះការប្រលងនេះបេក្ខជនត្រូវបានអនុវត្ត គឺមិនត្រូវលួចចម្លង ឬមានបំណងលួចចម្លង,មិនត្រូវពិភាក្សា ឬចម្លងគ្នា,មិនត្រូវយកអាវុធជាតិផ្ទុះចូលក្នុងមណ្ឌលប្រឡង,ហាមយកតាម និងប្រើប្រាស់ទូរស័ព្ទ វិទ្យុទាក់ទងគ្រប់ប្រភេទ និងឧបករណ៍អេឡិចត្រូនិចគ្រប់ប្រភេទដែលអាចផ្ទុកឯកសារបាន ចូលក្នុងបន្ទប់ប្រឡង។ ក្នុងករណីមេប្រយោគ ឬ អនុរក្សឆែករកឃើញ បេក្ខជននឹងត្រូវបណ្ដេញចេញពីបន្ទប់ប្រឡង។ មិនត្រូវឲ្យអ្នកដទៃប្រឡងជំនួស ឬសរសេរកិច្ចការជំនួសនៅលើសន្លឹកកិច្ចការរបស់ខ្លួន,មិនត្រូវគូសសញ្ញាសំគាល់នៅលើសន្លឹកកិច្ចការ,មិនត្រូវធ្វើសកម្មភាពណាដែលនាំឲ្យចលាចលក្នុងមណ្ឌលប្រឡង ,ហាមដាច់ខាតចំពោះការសេពគ្រឿងស្រវឹង និងជក់បារីនៅក្នុងបរិវេណមណ្ឌលប្រឡង ។រាល់ការប្រព្រឹត្តល្មើសនឹងបទប្បញ្ញត្តិខាងលើ បេក្ខជនត្រូវប្រឈមនឹងការបញ្ឈប់មិនឲ្យប្រឡង ហើយ សន្លឹកកិច្ចការរបស់បេក្ខជននោះនឹងត្រូវបានពិន្ទុសូន្យ និងទទួលកម្រិតវិន័យផ្សេងៗទៀតដែលត្រូវបានកំណត់ ដោយគណៈកម្មការកណ្ដាលរៀបចំការប្រឡង។

ការប្រឡងនឹងប្រព្រឹត្តទៅរយះពេល២ម៉ោងលើវិញ្ញាសារ ចំណេះដឹងទូទៅ និងចំណេះដឹងវិស័យពន្ធនាគារ,ជំនាញឯកទេសសុខាភិបាលរយះពេល២ម៉ោង។បេក្ខជនហាមយកសំណៅឯកសារនិងឧបកណ៏អេឡេចត្រូនិកគ្រប់ប្រភេទចូលមណ្ឌលប្រឡង៕

អត្ថបទ៖ ស្រីរ័ត្ន