ត្រាំ គំរាមកម្ទេចចោលប្រទេសអ៊ីរ៉ង់ទាំងមូល ត្រឹមមួយយប់ បើមិនចុះកិច្ចព្រមព្រៀង

បន្ទាប់ពីដាក់ឱសានវាទហើយ ដាក់ឱសានវាទទៀត ឲ្យទីក្រុងតេហេរ៉ង់បើកច្រក Hormuz និងចូលមកកាន់តុចរចាដើម្បីបញ្ចប់សង្គ្រាមនោះ ឥឡូវប្រធានាធិបតីអាមេរិក បានគំរាមទៀតហើយថា ប្រទេសអ៊ីរ៉ង់ទាំងមូល នឹងត្រូវកម្ទេចចោលត្រឹមមួយយប់ បើគ្មានកិច្ចព្រមព្រៀងមុនថ្ងៃកំណត់ទេនោះ។

ថ្លែងនៅសេតវិមានកាលពីថ្ងៃចន្ទទី៦ខែមេសាឆ្នាំ២០២៦ លោកត្រាំនិយាយថា ប្រទេសអ៊ីរ៉ង់ទាំងមូលនឹងត្រូវកម្ទេចចោល ប្រសិនបើគ្មានកិច្ចព្រមព្រៀងណាមួយត្រូវបានសម្រេច។ លោកលើកឡើងថា អាមេរិកមានផែនការទម្លាក់គ្រាប់បែកកម្ទេចស្ពាននិងរោងចក្រអគ្គិសនីគ្រប់កន្លែង នៅក្នុងប្រទេសអ៊ីរ៉ង់។

លោកបានបញ្ជាក់យ៉ាងច្បាស់ថា៖ «អ្វីដែលខ្ញុំចង់មានន័យនោះគឺ ការកម្ទេចឲ្យខ្ទេចខ្ទីទាំងស្រុងតែម្តង ហើយវានឹងកើតឡើងក្នុងរយៈពេលត្រឹមតែ ៤ ម៉ោងប៉ុណ្ណោះ ប្រសិនបើយើងចង់ធ្វើ តែយើងមិនចង់ឲ្យរឿងនោះកើតឡើងទេ។ យើងថែមទាំងអាចនឹងចូលរួមជួយពួកគេក្នុងការកសាងប្រទេសជាតិឡើងវិញទៀតផង»។

មុនសន្និសីទកាសែតនៅសេតវិមាននេះ មេដឹកនាំអាមេរិកក៏បង្ហោះសារលើ Truth Social រួចហើយដែរដោយគំរាមថា៖ «ថ្ងៃអង្គារនឹងក្លាយជាថ្ងៃរោងចក្រថាមពលនិងជាថ្ងៃស្ពាន ដែលរួមបញ្ចូលគ្នាតែមួយនៅក្នុងប្រទេសអ៊ីរ៉ង់។ ជារឿងដែលមិនធ្លាប់មានពីមុនមកសោះ!!! បើកច្រកសមុទ្រហ្នឹងភ្លាម បើមិនអ៊ីចឹងទេ ពួកឯងនឹងរស់នៅក្នុងឋាននរកមិនខាន — ចាំតែមើលទៅ!»។

ទោះបីជាយ៉ាងណាក៏ដោយ ពាក់ព័ន្ធរឿងនេះ អ៊ីរ៉ង់បញ្ជាក់ជំហរថា ខ្លួនមិនបើកច្រក Hormuz ជាថ្នូរនឹងបទឈប់បាញ់បណ្តោះអាសន្នដាច់ខាត។

មន្ត្រីអ៊ីរ៉ង់សុំមិនបញ្ចេញឈ្មោះ បាននិយាយនៅថ្ងៃចន្ទទី៦ខែមេសាឆ្នាំ២០២៦ថា ទីក្រុងតេហេរ៉ង់ បានរក្សាជំហរយ៉ាងច្បាស់រួចហើយ ដូចនេះ កុំយកបទឈប់បាញ់បណ្តោះអាសន្ន មកដោះដូរជាមួយការបើកច្រកសមុទ្រ Hormuz ឲ្យសោះ។

ដូច្នេះហើយ ពិភពលោកទាំងមូលកំពុងរង់ចាំមើលថាតើ អាមេរិកនឹងធ្វើអ្វីនៅអ៊ីរ៉ង់ ហើយប្រតិបត្តិការរបស់លោកត្រាំ បានទទួលជោគជ័យដែរឬអត់ និងថាតើអ៊ីរ៉ង់ ឆ្លើយតបវិញដោយរបៀបណា?

អត្ថបទ៖ សុខ សុវណ្ណ