​លោក ស៊ី ជីនពីង​ ប្រកាសបើកទំព័រប្រវត្តិសាស្ត្រថ្មី ជាមួយ លោក គីម ជុងអ៊ុន

ប្រធានាធិបតីចិន ស៊ី ជិនពីង នៅថ្ងៃ ទី៨ ខែមិថុនា បានប្រកាសថា ទំនាក់ទំនងរវាង ចិន និង កូរ៉េខាងជើង កំពុង​ស្ថិតនៅ «ចំណុចចាប់ផ្តើមប្រវត្តិសាស្ត្រថ្មីមួយ»។ ការលើកឡើងនេះ ត្រូវបានចុះផ្សាយនៅក្នុងប្រព័ន្ធផ្សព្វផ្សាយរដ្ឋរបស់កូរ៉េខាងជើង ស្របពេលលោកធ្វើដំណើរទៅដល់ទីក្រុងព្យុងយ៉ាង សម្រាប់កិច្ចប្រជុំកំពូលដ៏កម្រមួយ ជាមួយមេដឹកនាំ លោក គីម ជុងអ៊ុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងអត្ថបទអត្ថាធិប្បាយមួយ ដែលចុះផ្សាយដោយសារព័ត៌មាន Rodong Sinmun របស់កូរ៉េខាងជើង មុនពេលដំណើរទស្សនកិច្ចផ្លូវការ លោក ស៊ី ជិនពីង បានគូសបញ្ជាក់ថា នយោបាយមិនប្រែប្រួលរបស់ចិន គឺការអភិវឌ្ឍទំនាក់ទំនងជាមួយកូរ៉េខាងជើង ហើយប្រទេសទាំងពីរនឹងពង្រឹងការផ្លាស់ប្តូរគ្នាលើគ្រប់វិស័យ។ ដំណើរទស្សនកិច្ចនេះ ត្រូវបានគេមើលឃើញថា មានសារៈសំខាន់ខ្លាំងបំផុត ព្រោះវាជាការធ្វើដំណើរទៅក្រៅប្រទេសលើកដំបូងបង្អស់របស់មេដឹកនាំចិននៅក្នុងឆ្នាំនេះផងដែរ។

មិនតែប៉ុណ្ណោះ ដើម្បីទាញទីក្រុងព្យុងយ៉ាងឲ្យមកកៀកជិតបន្ថែមទៀត លោក ស៊ី ជិនពីង បានសង្កត់ធ្ងន់ថា «យើងត្រូវតែប្រឆាំងនឹងអនុត្តរភាព (ការចង់ធ្វើជាមហាអំណាចផ្តាច់មុខ) របបផ្តាច់ការ និងរាល់ការប៉ុនប៉ង ក៏ដូចជាឧបាយកលទាំងឡាយណា ដែលចង់ឲ្យមានការរស់ឡើងវិញនៃលទ្ធិយោធានិយម ដែលបង្កគ្រោះថ្នាក់ដល់សន្តិសុខ និងស្ថិរភាពក្នុងតំបន់»។

លោក ស៊ី ក៏ត្រូវបានរំពឹងថា នឹងជួបពិភាក្សាការងារជាមួយលោក គីម ជុងអ៊ុន ក្នុងកំឡុងពេលដំណើរទស្សនកិច្ចរយៈពេលពីរថ្ងៃនេះ។ នេះជាដំណើរទស្សនកិច្ចលើកដំបូងរបស់លោកក្នុងរយៈពេល ៧ ឆ្នាំមកកាន់ប្រទេសជិតខាងដ៏ឯកោមួយនេះ ចំពេលដែលសេដ្ឋកិច្ចរបស់កូរ៉េខាងជើង កំពុងមានសន្ទុះខ្លាំងឡើងវិញ តាមរយៈការកើនឡើងនៃពាណិជ្ជកម្ម និងទំនាក់ទំនងយោធាជាមួយប្រទេសរុស្ស៊ី ដែលកត្តានេះអាចជួយបង្កើនទំនុកចិត្តរបស់លោក គីម ជុងអ៊ុន ក្នុងការចរចា។

ដោយឡែក លោក John Delury សមាជិកជាន់ខ្ពស់នៃសមាគមអាស៊ី (Asia Society) បានបង្ហោះនៅលើបណ្តាញសង្គម X ថា «ដំណើរទស្សនកិច្ចរបស់លោក ស៊ី ជិនពីង គឺដើម្បីរក្សាប្រពៃណីទំនាក់ទំនងឲ្យនៅរស់រវើក ស្ថិតក្រោមលក្ខខណ្ឌខុសប្លែកគ្នាយ៉ាងខ្លាំង បើធៀបនឹងដំណើរទស្សនកិច្ចចុងក្រោយរបស់លោក»។ ជាងនេះទៅទៀត អត្ថបទរបស់លោក ស៊ី គឺដើម្បីអបអរសាទរ «ចំណងមិត្តភាពជាប្រពៃណី» រវាងទីក្រុងប៉េកាំង និងទីក្រុងព្យុងយ៉ាង ព្រមទាំងបានសង្កត់ធ្ងន់លើកិច្ចសហប្រតិបត្តិការយុទ្ធសាស្ត្រ និងលទ្ធិសង្គមនិយមពេញមួយអត្ថបទ។

យ៉ាងណាមិញ នៅមុនថ្ងៃដែលប្រមុខមេដឹកនាំចិន មកដល់ ទីក្រុងព្យុងយ៉ាងបានព្យាយាមបង្ហាញសាច់ដុំ និងឥទ្ធិពលរបស់ខ្លួន តាមរយៈការលាតត្រដាងនូវផែនការសាងសង់នាវាបំផ្លាញដែនទឹកខ្នាតយក្សទម្ងន់ ១០,០០០ តោន និងបានបញ្ជាក់ឡើងវិញនូវឋានៈរបស់ខ្លួន ជាប្រទេសដែលមានអាវុធនុយក្លេអ៊ែរ៕

អត្ថបទ ៖ សាង ស្រីល័ក្ខ