​លោក គីម ជុនអ៊ុន បញ្ជាឲ្យពង្រឹង​​កង​​ទ័ព​ជើង​ទឹកដែល​​​មានសមត្ថភាពបាញ់​នុយក្លេអ៊ែរ ​កម្ទេច​​សត្រូវ

ប្រព័ន្ធផ្សព្វផ្សាយរដ្ឋកូរ៉េខាងជើង (KCNA) បានរាយការណ៍នៅថ្ងៃសៅរ៍ ទី៦ ខែមិថុនា ថា មេដឹកនាំកូរ៉េខាងជើង គីម ជុងអ៊ុន បានចុះទៅពិនិត្យនាវាពិឃាត Kang Kon ដើម្បីត្រួតពិនិត្យលើការធ្វើតេស្តរុករក ដោយលោក បាន​​​លើក​ឡើង​​​តម្រូវការចាំបាច់ក្នុងការលើកកម្ពស់សមត្ថភាពកងទ័ពជើងទឹក ដើម្បីទប់ស្កាត់សង្គ្រាមនុយក្លេអ៊ែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍​​នោះ​​ បាន​កើត​មាន​​ ចំពេលដែលទីក្រុងប៉េកាំង និងទីក្រុងព្យុងយ៉ាង បានប្រកាសថា ប្រធានាធិបតីចិន ស៊ី ជីនពីង នឹងអញ្ជើញទៅបំពេញទស្សនកិច្ចនៅប្រទេសកូរ៉េខាងជើង ចាប់ពីថ្ងៃទី ៨ ដល់ថ្ងៃទី ៩ ខែមិថុនា បន្ទាប់ពី ប្រធានាធិបតី ស៊ី បាន​​​ទទួលស្វាគមន៍​កិច្ចប្រជុំ​​សំខាន់​​រហូត​ដល់​ទៅ​​ពីរ​ គឺ​​ជាមួយប្រធានាធិបតីអាមេរិក ដូណាល់ ត្រាំ និងប្រធានាធិបតីរុស្ស៊ី វ្ល៉ាឌីមៀ ពូទីន កាលពីខែមុន​នេះ​​។

នៅក្នុងរយៈពេលប៉ុន្មានឆ្នាំថ្មីៗនេះ លោក គីម ជុងអ៊ុន បានប្តេជ្ញាចិត្តយ៉ាងមុតមាំ ក្នុងការពង្រឹងសមត្ថភាពកងទ័ពជើងទឹករបស់កូរ៉េខាងជើង ហើយកាលពីខែឧសភាឆ្នាំមុន លោក បានចុះត្រួតពិនិត្យការដាក់​ដំណើរការ​នាវាពិឃាត Kang Kon ដែលធ្លាប់​មាន​​បញ្ហាបច្ចេកទេស ប៉ុន្តែត្រូវបានជួសជុល និងដាក់ឲ្យដំណើរការឡើងវិញនៅមួយខែបន្ទាប់។

​សារ​ព័ត៌មាន​កូរ៉េខាងជើង KCNA បានឲ្យដឹងទៀតថា នៅក្នុងដំណើរទស្សនកិច្ចកាលពីថ្ងៃព្រហស្បតិ៍ លោក គីម ជុងអ៊ុន បានសង្កត់ធ្ងន់​លើសារៈសំខាន់នៃការអភិវឌ្ឍកងកម្លាំងជើងទឹកយ៉ាងឆាប់រហ័ស ទៅជាកងកម្លាំងមួយដែល មានសមត្ថភាព​អាចទទួលខុសត្រូវដោយជឿជាក់លើផ្នែកមួយនៃការទប់ស្កាត់សង្គ្រាម​នុយក្លេអ៊ែរ។

លោកលើកថា ការបង្កើតកងទ័ពជើងទឹកដែលអាចផ្តល់ការវាយប្រហារដ៏បំផ្លិចបំផ្លាញ ទៅលើសត្រូវទាំងនៅលើផ្ទៃទឹក និងក្រោមបាតសមុទ្រ គឺជាគោលដៅស្នូលនៃផែនការអភិវឌ្ឍន៍វិស័យការពារជាតិរយៈពេល ៥ ឆ្នាំបច្ចុប្បន្នរបស់គណបក្សកាន់អំណាច។

ដោយឡែក ចាប់តាំងពីកិច្ចប្រជុំកំពូលឆ្នាំ ២០១៩ រវាងមេដឹកនាំកូរ៉េខាងជើង និងលោក ត្រាំ បានដួលរលំជុំវិញវិសាលភាពនៃការរំសាយអាវុធនុយក្លេអ៊ែរ និងការបន្ធូរបន្ថយទណ្ឌកម្មមក ទីក្រុងព្យុងយ៉ាងបានប្រកាសម្តងហើយម្តងទៀតថា ខ្លួនជា រដ្ឋនុយក្លេអ៊ែរ «ដែលមិនអាចកែប្រែត្រឡប់ក្រោយបានឡើយ»។

មិនតែប៉ុណ្ណោះ លោក គីម ជុងអ៊ុន ក៏ទទួលបានភាពក្លាហាន និងកម្លាំងចិត្តបន្ថែមពីសង្គ្រាមនៅក្នុងប្រទេសអ៊ុយក្រែន ដោយទទួលបានការគាំទ្រយ៉ាងសំខាន់ពីទីក្រុងម៉ូស្គូ បន្ទាប់ពីបានបញ្ជូនកងទ័ពរាប់ពាន់នាក់ទៅចូលរួមប្រយុទ្ធជាមួយកងកម្លាំងរុស្ស៊ី។ កាលពីឆ្នាំមុន លោកក៏បានបង្ហាញខ្លួនរួមគ្នាជាមួយលោក ស៊ី ជីនពីង និងលោក ពូទីន នៅក្នុងពិធីព្យុហយាត្រាយោធាដ៏ប្រណីតមួយនៅក្នុងទីក្រុងប៉េកាំង ដែលនេះជាការបង្ហាញឲ្យឃើញយ៉ាងច្បាស់ពីស្ថានភាពថ្មី និងការកើនឡើងឥទ្ធិពលរបស់លោកនៅក្នុងឆាកនយោបាយសកល៕

អត្ថបទ ៖ សាង ស្រីល័ក្ខ

គីម ជុងអ៊ុន បង្ហាញរោងចក្របរមាណូថ្មី និង​ប្ដេជ្ញាបង្កើនអាវុធនុយក្លេអ៊ែរឱ្យលឿនបំផុត