គីម ជុងអ៊ុន បង្ហាញរោងចក្របរមាណូថ្មី និង​ប្ដេជ្ញាបង្កើនអាវុធនុយក្លេអ៊ែរឱ្យលឿនបំផុត

ប្រទេសកូរ៉េខាងជើង បានបើកបង្ហាញរោងចក្រផលិតសារធាតុផ្សំគ្រាប់បែកបរមាណូដ៏ថ្មីសន្លាងមួយ ដែលត្រូវគេជឿជាក់ថាជារោងចក្រចម្រាញ់វត្ថុធាតុដើមអ៊ុយរ៉ាញ៉ូមកម្រិតខ្ពស់។ នេះ​បើយោងតាម​​សារព័ត៌មាន France24 ដោយ​ដកស្រង់​ប្រភព​ពី​​​ទីភ្នាក់ងារព័ត៌មាន​រដ្ឋ​កូរ៉េ​ខាង​ជើង​ KCNA ចុះផ្សាយ​នៅ​​ថ្ងៃ​ព្រហស្បតិ៍ ទី​៤ ខែ​មិថុនា ឆ្នាំ​២០២៦។

នៅក្នុងឱកាសដាក់​បង្ហាញ​នោះ មេដឹកនាំ​កូរ៉េ​ខាង​ជើង​ លោក គីម ជុងអ៊ុន បានប្រកាសពីផែនការជម្រុញ និងពង្រីកកម្លាំងអាវុធនុយក្លេអ៊ែររបស់ជាតិឱ្យកើនឡើងយ៉ាងលឿនបំផុត ដើម្បីត្រៀមលក្ខណៈទប់ទល់នឹងការគំរាមកំហែងផ្នែកយោធាពីសំណាក់សត្រូវធំៗ គឺសហរដ្ឋអាមេរិក និងកូរ៉េខាងត្បូង។

លោក គីម ជុងអ៊ុន បានចុះពិនិត្យមើលរោងចក្រនេះផ្ទាល់ កាលពីថ្ងៃពុធ ដោយបានអះអាងថា បច្ចុប្បន្នសមត្ថភាពផលិតសារធាតុនុយក្លេអ៊ែររបស់កូរ៉េខាងជើង បានកើនឡើងទ្វេដង បើប្រៀបធៀបទៅនឹងប្រាំឆ្នាំមុន ទោះបីជាការអះអាងនេះមិនទាន់មានប្រភពឯករាជ្យណាមួយ អាចផ្ទៀងផ្ទាត់បានក៏ដោយ។ រូបថតផ្លូវការរបស់ KCNA បានបង្ហាញពីសាលដ៏ធំដែលពោរពេញទៅដោយបំពង់ដែក និងម៉ាស៊ីន​ចម្រាញ់​អ៊ុយរ៉ា​ញ៉ូម ព្រមទាំងរូបភាពលោក គីម ជុងអ៊ុន កំពុងពិភាក្សាជាមួយមន្ត្រីជាន់ខ្ពស់នៅជិតគំនូសក្រាហ្វិកមួយ ដែលគេសង្ស័យថាជាគំរូក្បាលគ្រាប់នុយក្លេអ៊ែរ។

ការលាតត្រដាងរោងចក្រថ្មីនេះ បានកើតឡើងបន្ទាប់ពីកូរ៉េខាងជើង ធ្លាប់បានបង្ហាញរោងចក្រសម្ងាត់មួយផ្សេងទៀត កាលពីខែកញ្ញា ឆ្នាំ២០២៤។ បើតាមមន្ត្រីជាន់ខ្ពស់របស់កូរ៉េខាងត្បូង មកទល់ពេលនេះ កូរ៉េខាងជើង កំពុងដំណើរការរោងចក្រចម្រាញ់អ៊ុយរ៉ាញ៉ូមសរុបចំនួនបួនកន្លែងជារៀងរាល់ថ្ងៃ។ ចាប់តាំងពីកិច្ចចរចាជាមួយអាមេរិកបានបរាជ័យកាលពីឆ្នាំ២០១៩ មក កូរ៉េខាងជើង បានបដិសេធរាល់ការចរចា ហើយងាកមកផ្តោតលើការធ្វើទំនើបកម្មអាវុធខ្លួនយ៉ាងខ្លាំងក្លា ដែលស្របទៅនឹងការបញ្ជាក់ពីទីភ្នាក់ងារថាមពលបរមាណូអន្តរជាតិថា សកម្មភាពនុយក្លេអ៊ែរនៅទីនោះកំពុងតែកើនឡើងយ៉ាងរហ័ស៕

ប្រែសម្រួល៖ ឈាង