រុស្ស៊ី ព្រមានពលរដ្ឋខ្លួន «កុំទៅលេងស្រុកថៃ» ខ្លាចគេចាប់ខ្លួន

រដ្ឋាភិបាលទីក្រុងមូស្គូ បានចេញសេចក្តីណែនាំជាផ្លូវការមួយ ដោយព្រមានពលរដ្ឋរុស្ស៊ីទាំងអស់ឱ្យជៀសវាងការធ្វើដំណើរទៅកាន់ប្រទេសថៃ ដោយសារតែមានហានិភ័យខ្ពស់ ក្នុងការត្រូវគេ​ចាប់ខ្លួនតាមសំណើរបស់សហរដ្ឋអាមេរិក។

យោងតាម​សារព័ត៌មាន Khaosod ចុះផ្សាយ​ថ្ងៃទី​១៥ ខែ​មិថុនា ឆ្នាំ​២០២៦ ក្រសួងការបរទេសរុស្ស៊ី បានសង្កត់ធ្ងន់ថា សម្រាប់ពលរដ្ឋណា ដែលមានការសង្ស័យថា ខ្លួនអាចនឹងត្រូវអាមេរិកតាមដាន ឬចោទប្រកាន់ពីបទល្មើសផ្សេងៗ គឺមិនគួរឈានជើងចូលទឹកដីថៃទាល់តែសោះ សូម្បីតែការហោះហើរឆ្លងកាត់ ដើម្បីប្តូរជើងហោះហើរក៏ដោយ។ រុស្ស៊ីបានចោទប្រកាន់ចារកម្ម​អាមេរិកថា បានលួចបើកប្រតិបត្តិការសម្ងាត់ ដើម្បី «ប្រមាញ់» និងចាប់ខ្លួនជនជាតិរុស្ស៊ី នៅក្នុងប្រទេសថៃ ដោយមិនបានឆ្លងកាត់អាជ្ញាធរថៃឡើយ។

ការព្រមានដ៏ក្តៅគគុកនេះ បានធ្វើឡើង បន្ទាប់ពីមានករណីចាប់ខ្លួនបុរសជនជាតិរុស្ស៊ីម្នាក់ឈ្មោះ Denis Obrezko ដែលរងការសង្ស័យថាជាហេគឃ័រ (Hacker) កាលពីខែវិច្ឆិកា ឆ្នាំ២០២៥ នៅក្នុងប្រទេសថៃ ហើយត្រូវបានបញ្ជូនខ្លួនទៅកាត់ទោសនៅអាមេរិក ក្រោមលក្ខខណ្ឌនៃសន្ធិសញ្ញាបត្យាប័នរវាងថៃ និងអាមេរិក។ រុស្ស៊ីបានអះអាងថា វាជាផ្នែកមួយនៃយុទ្ធនាការដាក់ទណ្ឌកម្មយ៉ាងចាស់ដៃរបស់អាមេរិក មកលើពលរដ្ឋខ្លួន ចាប់តាំងពីសង្គ្រាមនៅអ៊ុយក្រែនបានផ្ទុះឡើងជាង ៤ឆ្នាំមុន។

ភ្លាមៗនោះដែរ ក្រសួងការបរទេសថៃ បានចេញមុខច្រានចោលការព្រមាននេះ ដោយអ្នកនាំពាក្យក្រសួងការបរទេសថៃ លោក Panidol Patchisawat បានគូសបញ្ជាក់ថា ទំនាក់ទំនងរវាងថៃ និងរុស្ស៊ី នៅតែរឹងមាំលើគ្រប់វិស័យ ហើយប្រទេសទាំងពីរត្រៀមនឹងប្រារព្ធខួប ១៣០ឆ្នាំនៃទំនាក់ទំនងការទូតនៅឆ្នាំក្រោយនេះទៀតផង។ លោកបានបន្ថែមថា កាលពីឆ្នាំកន្លងទៅ ថៃបានទទួលស្វាគមន៍ភ្ញៀវទេសចររុស្ស៊ីរហូតដល់ទៅជិត ១,៩លាននាក់ ដែលជាចំនួនច្រើនជាងគេបំផុត ក្នុងចំណោមប្រទេសនៅអឺរ៉ុប។ លោកបានបញ្ជាក់ថា «ថៃ គឺជាប្រទេសដែលមានសុវត្ថិភាព និងស្វាគមន៍ភ្ញៀវទេសចរគ្រប់ជាតិសាសន៍ ដោយគ្មានការរើសអើងឡើយ» ប៉ុន្តែទន្ទឹមនោះ ភ្ញៀវទាំងអស់ក៏ត្រូវតែគោរពច្បាប់របស់ប្រទេសថៃដូចគ្នាដែរ៕

ប្រែសម្រួល៖ ឈាង