លោក ពូទីន ថ្លែង​លើក​ដំបូង ថា ការ​វាយប្រហារខ្លាំង​របស់​អ៊ុយក្រែន ព្រោះ​ចង់បង្ក​​សតិអារម្មណ៍​មិនច្បាស់លាស់លើ​កងទ័ពរុស្ស៊ី​

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានលើកឡើងកាលពីថ្ងៃ ទី២៣ ខែមិថុនា ថា អ៊ុយក្រែនកំពុងវាយប្រហារលើហេដ្ឋារចនាសម្ព័ន្ធស៊ីវិលនៅក្នុងប្រទេសរុស្ស៊ី ក្នុងបំណងបង្កអស្ថិរភាព និងភាពចលាចលដល់សង្គម​ជាតិ​​​រុស្ស៊ី​​។ នេះបើយោតាមការចេញផ្សាយពីទីភ្នាក់ងារសារព័ត៌មាន Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការថ្លែងទៅកាន់និស្សិតដែលទើបបញ្ចប់ការសិក្សាពីស្ថាប័នយោធា និងសន្តិសុខ លោក ពូទីន បានបញ្ចេញមតិជាលើកដំបូងបង្អស់ទាក់ទងនឹងការវាយប្រហារទាំងនេះ គិតចាប់តាំងពីដ្រូន របស់អ៊ុយក្រែន បានវាយប្រហារចំរោងចក្រចម្រាញ់ប្រេងមួយកន្លែងក្នុងទីក្រុងម៉ូស្គូ កាលពីសប្តាហ៍មុន។

លោក ពូទីន បានលើកឡើងនៅក្នុងកិច្ចប្រជុំដែលត្រូវបានផ្សាយតាមទូរទស្សន៍ថា «ការវាយប្រហារ​លើ​ហេដ្ឋារចនាសម្ព័ន្ធស៊ីវិល តើវាមានគោលដៅអ្វី? គឺដើម្បីបង្កអស្ថិរភាពក្នុងសង្គម នៅក្នុងស្ថានភាពនៃការវាយលុកដ៏ធំធេងបែបនេះ នៅពេលដែលប្លុក​លោក​​ខាងលិចទាំងមូល កំពុងធ្វើការឲ្យពួកគេ ហើយដ្រូនទាំងនេះកំពុងហោះចូលមកក្នុងចំនួនយ៉ាងច្រើនសន្ធឹកសន្ធាប់ ដើម្បីបង្កើតឲ្យមានអារម្មណ៍មិនច្បាស់លាស់ចំពោះ​សកម្មភាពរបស់កងកម្លាំងប្រដាប់អាវុធរុស្ស៊ី»។

ជាមួយគ្នានេះដែរ ប្រធានាធិបតី​រុស្ស៊ី​ ក៏បានបញ្ជាក់​ដែរថា កងទ័ពរុស្ស៊ីជិតគ្រប់គ្រងបានទាំងស្រុងលើទីក្រុង កូស្តង់ទីនីវកា (Kostiantynivka) ដែលជាចំណុចបង្អែកភាគខាងត្បូងនៃតំបន់ការពារ​ខ្សែក្រវាត់បន្ទាយ​​នៅក្នុងតំបន់ដូណេតស្ក៍ (Donetsk) ដែលជាតំបន់មួយ ត្រូវ​ទីក្រុងមូស្គូ​ទាមទារឲ្យទីក្រុងកៀវបោះបង់ចោល។

សូមជម្រាបជូនថា ការវាយប្រហាររបស់អ៊ុយក្រែនទៅលើរោងចក្រចម្រាញ់ប្រេង បានកើនឡើងទ្វេដង ចាប់តាំងពីដើមឆ្នាំ២០២៦ មកម្ល៉េះ ដែលបង្កឲ្យមានការតម្រង់ជួរយ៉ាងវែង និងធ្វើឲ្យតម្លៃប្រេងសាំងហក់ឡើងខ្ពស់នៅក្នុងតំបន់មួយចំនួន។ ជាក់ស្ដែង ទីក្រុងកៀវបានលើកឡើងថា គោលបំណងរបស់ខ្លួនគឺដើម្បីកាត់ផ្តាច់ប្រភពថវិកាដ៏សំខាន់សម្រាប់ផ្គត់ផ្គង់សង្គ្រាមរបស់រុស្ស៊ី និងដើម្បីបង្ហាញឲ្យប្រជាជនរុស្ស៊ីបានឃើញថា ជម្លោះនេះមិនមែនជារឿងនៅឆ្ងាយពីពួកគេទៀតនោះទេ៕

អត្ថបទ​ ៖ សាង ស្រីល័ក្ខ