ព័ត៌មានអន្ដរជាតិ

ប្រធានាធិបតីគុយបា ថា ប្រជាជនគុយបានឹងតស៊ូសាមគ្គីដល់តំណក់ឈាមចុងក្រោយ បើអាមេរិកវាយប្រហារមែន

បានផុស

២៣ វិនាទី មុន

នៅ

ថ្ងៃសុក្រ ៣ កក្កដា ២០២៦

ដោយ

ជម្លោះពាក្យសម្តី និងការរឹតបណ្តឹងប្រេងឥន្ធនៈដោយសហរដ្ឋអាមេរិកលើប្រទេសគុយបា មិនបានធូរស្រាលនៅឡើយទេ ដោយទីក្រុងវ៉ាស៊ីនតោននៅតែគំរាមគុយបាដោយប្រើកម្លាំងយោធាបន្តបន្ទាប់ ប្រឆាំងនឹងរដ្ឋាភិបាលកុម្មុយនិស្តដឹកនាំនៅគុយបា ដែលតែងតែបង្ហាញជំហរតតាំងជាមួយសហរដ្ឋអាមេរិក។

កាលពីថ្ងៃព្រហស្បតិ៍ ប្រធានាធិបតីគុយបា លោក Miguel Diaz-Canel លើកឡើងថា ប្រទេសគុយបាបានត្រៀមខ្លួនរួចជាស្រេច ដើម្បីទប់ទល់នឹងអន្តរាគមន៍យោធាណាមួយរបស់សហរដ្ឋអាមេរិក ដោយព្រមានថា ប្រជាជនគុយបានឹងការពារអធិបតេយ្យភាពរហូតដល់ដំណក់ឈាមចុងក្រោយ។ នេះបើយោងតាមបទសម្ភាសន៍ជាមួយសារព័ត៌មាន Sky News នៅថ្ងៃទី០២ ខែកក្តដា ឆ្នាំ២០២៦ ចំពេលមានការគំរាមកំហែងជាថ្មីម្តងទៀត ពីប្រធានាធិបតីអាមេរិក លោក ដូណាល់ ត្រាំ។

ប្រធានាធិបតីគុយបា លោក Miguel Diaz-Canel ។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេលអ្នកកាសែតសួរ ទាក់ទងទៅនឹងការកត់សម្គាល់ថ្មីៗរបស់លោក ត្រាំ លើកឡើងថា៖ « គុយបាកំពុងមករកយើង[សហរដ្ឋអាមេរិក]»។

លោក Diaz-Canel បានចោទប្រកាន់ទីក្រុងវ៉ាស៊ីនតោនថា បានធ្វើយុទ្ធសាស្ត្រនៃភាពវង្វេងជំរុញដោយប្រព័ន្ធផ្សព្វផ្សាយ និងសង្គ្រាមផ្លូវចិត្ត ប្រឆាំងនឹងប្រទេសគុយបា ដោយហៅវោហាសាស្ត្រនេះថា៖ « ជាការខឹងសម្បារ និងការប្រមាថដល់សេចក្តីថ្លៃថ្នូររបស់ប្រជាជនយើង និងជាការរំលោភច្បាប់អន្តរជាតិយ៉ាងធ្ងន់ធ្ងរ»។

មេដឹកនាំគុយបារូបនេះ បាននិយាយថា រដ្ឋាភិបាលរបស់លោកមិនអាចច្រានចោលការវាយប្រហាររបស់សហរដ្ឋអាមេរិកបានទេ ប៉ុន្តែកំពុងត្រៀមខ្លួនសម្រាប់លទ្ធភាពដែលអាចធ្វើបាន។

លោកលើកឡើងថា៖ « ប្រសិនបើមានការវាយប្រហារ ប្រជាជនគុយបានឹងឆ្លើយតបដោយសាមគ្គីភាព និងភាពរឹងមាំ និងការពារអធិបតេយ្យភាពរបស់យើង។ យើងមិនចង់បានសង្គ្រាមនោះទេ ប៉ុន្តែយើងមិនខ្លាចវាទេ»។

ស្តីពីទណ្ឌកម្មរបស់សហរដ្ឋអាមេរិក ដែលទីក្រុងវ៉ាស៊ីនតោនបានរឹតបន្តឹងកាលពីខែមករាជាមួយនឹងការហាមឃាត់ប្រេងឥន្ធនៈ លោក Diaz-Canel បដិសេធការចោទប្រកាន់ថា ប្រទេសគុយបាធ្វើជាម្ចាស់ផ្ទះនៃការដំឡើងយោធាចិន ឬរុស្ស៊ី ដោយនិយាយថា៖ « មិនមានមូលដ្ឋានចិនក្នុងប្រទេសគុយបាទេ»។

លោកបានពិពណ៌នាអំពីការហាមឃាត់របស់អាមេរិកអស់រយៈពេលជាច្រើនទសវត្សរ៍ថា៖ « ជាការបិទផ្លូវដ៏វែងបំផុតនៅក្នុងប្រវត្តិសាស្ត្រមនុស្សជាតិ ដោយស្តីបន្ទោសអាមេរិក ចំពោះការដាច់ចរន្តអគ្គិសនីរ៉ាំរ៉ៃ ការខ្វះខាតថ្នាំពេទ្យ និងការលំបាកផ្នែកសេដ្ឋកិច្ច។ ការហាមឃាត់ប្រេងឥន្ធនៈមានចំនួនជាឧក្រិដ្ឋកម្ម និងការប្រល័យពូជសាសន៍»៕

សម្រួល៖ ណឺ មិនា