នាយកដ្ឋានប្រឆាំងបទល្មើសបច្ចេកវិទ្យា ប្រាប់ពីល្បិចឆបោករបស់ជនអនាមិក ដែលបន្លំខ្លួនជាបុគ្គលិកធនាគារ

នាយកដ្ឋានប្រឆាំងបទល្មើសបច្ចេកវិទ្យា នៅថ្ងៃទី៦ ខែកក្កដា ឆ្នាំ២០២៦នេះ បានប្រាប់ពីល្បិចឆបោករបស់ក្រុមជនអនាមិក ដែលបន្លំខ្លួនជាបុគ្គលិកនធាគារ និងក្រើនរំលឹកដល់ពលរដ្ឋត្រូវប្រុងប្រយ័ត្នខ្ពស់ជៀសវាងបាត់បង់ប្រាក់កាក់ និងហានិភ័យនានានៅពេលក្រោយ។

ការចេញមកប្រាប់ពីល្បិចឆបោករបស់ជនអនាមិកនេះ គឺបន្ទាប់ពីនាយកដ្ឋានប្រឆាំងបទល្មើសបច្ចេកវិទ្យា សង្កេតឃើញមាន ករណីជនអនាមិកជាច្រើនបានបន្លំខ្លួនជាបុគ្គលិកធនាគារ ទាក់ទងទៅពលរដ្ឋតាមរយៈទូរស័ព្ទ ហើយក៏បាន​ប្រាប់ថា ពួកគេជាបុគ្គលិកធនាគារ។ បន្ទាប់ពីទាក់ទៅពលរដ្ឋ ពួគគេប្រាប់ថា គណនីធនាគាររបស់គាត់(របស់ពលរដ្ឋ)ត្រូវបានខូច​ហើយ ដែលតម្រូវឱ្យផ្ទេរប្រាក់ចេញសិន ដើម្បីជួសជុលគណនីធនាគារ ហើយក្រោយជួសជុលរួចពួកគេនឹងផ្ទេរប្រាក់ជូនលោក-អ្នកវិញ ក្នុងថ្ងៃដដែល។

នាយកដ្ឋានប្រឆាំងបទល្មើសបច្ចេកវិទ្យា បញ្ជាក់ថា ក្រោយមកជនអនាមិកបានតម្រូវឱ្យលោក-អ្នក ភ្ជាប់លេខតេលេក្រាម(Telegram) ដើម្បីងាយស្រួលជជែកគ្នា និងបញ្ជុះបញ្ចូលពលរដ្ឋផ្ទេរប្រាទៅគណនី​ធនាគាររបស់ជនអនាមិកនោះ តាមរយៈ​QR Code និងបន្តឱ្យផ្ទេរប្រាក់បន្ថែមទៀត ដោយជនអនាមិកនោះមិនបានផ្ទេរប្រាក់ត្រឡប់មកវិញនោះទេ។

នាយកដ្ឋានប្រឆាំងបទល្មើសបច្ចេកវិទ្យា បានក្រើនរំលឹកដល់សាធារណជន សូមមេត្តាពិនិត្យ ពិចារណាអោយបានហ្មត់ចត់ មុនសម្រេចចិត្តក្នុងការវេរលុយ ជាពិសេសសូមពិនិត្យថា តើគណនីធនាគាររបស់ខ្លួនមានបញ្ហាទេ ប្រសិនបើគណនីធនាគាររបស់ខ្លួនមានបញ្ហា ត្រូវទៅ​ធនាគារដើម្បីដោះ​ស្រាយបញ្ហាដោយផ្ទាល់ ជៀសវាងទទួលនូវហានិភ័យនានានៅពេលក្រោយ៕