ព័ត៌មានអន្ដរជាតិ

ព្យុះនៅបង់ក្លាដែស សម្លាប់មនុស្សយ៉ាងហោចណាស់ ៥១នាក់ និងប៉ះពាល់ជាង ១លាននាក់

បានផុស

៤ ម៉ោង មុន

នៅ

ថ្ងៃចន្ទ ១៣ កក្កដា ២០២៦

ដោយ

យ៉ាងហោចណាស់ មនុស្ស ៥១នាក់ បានបាត់បង់ជីវិត និងជាង ១លាននាក់រងផលប៉ះពាល់ដោយជាប់គាំងដោយសារភ្លៀងធ្លាក់ខ្លាំង នៅប្រទេសបង់ក្លាដែសក្នុងរយៈពេលប៉ុន្មានថ្ងៃថ្មីៗនេះ។

សារព័ត៌មាន BBC ផ្សាយនៅថ្ងៃទី១៣ ខែកក្កដា ឆ្នាំ២០២៦ ឱ្យដឹងថា មនុស្សរាប់ពាន់នាក់បានបាត់បង់ផ្ទះសម្បែង ដោយសារទឹកជំនន់ភ្លាមៗ និងការបាក់ដី បន្តវាយប្រហារតំបន់ធំៗនៃប្រទេស រួមទាំងរដ្ឋធានី Dhaka ផងដែរ។

ប្រជាជនបង់ក្លាដែសកំពុងរកកន្លែងសុវត្ថិភាព។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន សិស្សានុសិស្សជាច្រើននាក់ និងគ្រូបង្រៀនម្នាក់បាត់បង់ជីវិត ពេលទឹកជំនន់បានហូរកាត់សាលារៀនរបស់ពួកគេ។

សូមបញ្ជាក់ថា បង់ក្លាដែសគឺជាប្រទេសដែលមានទំនាប និងទន្លេជាច្រើន ជារឿយៗមានភ្លៀងធ្លាក់ខ្លាំង និងទឹកជំនន់ក្នុងរដូវវស្សាប្រចាំឆ្នាំ។ ប៉ុន្តែអ្នកជំនាញព្រមានថា ការប្រែប្រួលអាកាសធាតុបានធ្វើឱ្យភ្លៀងធ្លាក់ខ្លាំង និងញឹកញាប់ជាងមុន។

ភ្លៀងធ្លាក់ខ្លាំងបានចាប់ផ្តើមជាងមួយសប្តាហ៍មុន ពេលភ្លៀងកាន់តែខ្លាំងក្នុងរយៈពេលប៉ុន្មានថ្ងៃថ្មីៗនេះ អាជ្ញាធរបានចេញការព្រមានអំពីទឹកជំនន់ បាក់ដី ជម្លៀសគ្រួសារក្នុងតំបន់ដែលមានហានិភ័យខ្ពស់ និងពន្យារពេលការប្រឡងសម្រាប់សិស្ស។

បច្ចុប្បន្នមនុស្សរាប់ពាន់នាក់ កំពុងរស់នៅក្នុងជម្រករបស់រដ្ឋាភិបាល។ គិតត្រឹមថ្ងៃអាទិត្យ មនុស្សជាង ១លាននាក់បានរងផលប៉ះពាល់ដោយភ្លៀង នេះបើយោងតាមអាជ្ញាធរ។

ក្នុងចំណោមអ្នកស្លាប់ ៥១នាក់មកដល់ពេលនេះ ២៨នាក់ គឺស្ថិតក្នុងស្រុក Cox’s Bazar ។ ស្រុកនេះគឺជាជម្រករបស់ជនជាតិរ៉ូហ៊ីងយ៉ាជាងមួយលាននាក់ ជាកន្លែងតាំងទីលំនៅជនភៀសខ្លួនធំជាងគេបំផុតរបស់ពិភពលោក។

លោក Sarder Udoy Raihan មកពីមជ្ឈមណ្ឌលព្យាករណ៍ និងព្រមានទឹកជំនន់ ប្រាប់ទីភ្នាក់ងារសារព័ត៌មាន AFP ថា ស្ថានភាពនៅភាគអាគ្នេយ៍នៃប្រទេសទំនងជានឹងប្រសើរក្នុងពេលឆាប់ៗនេះ។

ប៉ុន្តែដោយសារខ្យល់មូសុងបន្តប៉ះពាល់ដល់តំបន់ភាគឦសាន និងភាគខាងជើងនៃប្រទេសបង់ក្លាដែស លោកព្រមានថា៖ « មានលទ្ធភាពនៃទឹកជំនន់បន្ថែមទៀត»៕

សម្រួល៖ ណឺ មិនា