ក្រសួងហាមចុះបញ្ជិកាឱសថវេចខ្ចប់សម្រាប់ឱសថសម័យ និងគ្រាប់ឱសថបុរាណ

ភ្នំពេញ៖ ក្រសួងសុខាភិបាលបានធ្វើការហាមឃាត់ការចុះបញ្ជិកាឱសថវេចខ្ចប់ជាកំប៉ុង ឬដបចំនួនលើសពី១៥០គ្រាប់សម្រាប់ឱសថសម័យ និងចំនួនលើស៣០០គ្រាប់ឱសថបុរាណ និងឱសថបំប៉នសុខភាព។

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានឱ្យដឹងក្នុងលិខិតចុះថ្ងៃទី២១ ខែឧសភានេះថា ដើម្បីបង្កលក្ខណៈងាយស្រួលដល់អ្នកប្រើប្រាស់ក្នុងការរក្សាទុកដាក់ឱសថ ក្រសួងសុខាភិបាលមិនអនុញ្ញាតឱ្យចុះទិដ្ឋាការបញ្ជិកាសម្រាប់ឱសថដែលមានការវេចខ្ចប់ជាកំប៉ុង ឬដបមានចំនួនលើសពី១៥០គ្រាប់ចំពោះឱសថសម័យ និងចំនួនលើសពី ៣០០គ្រាប់ ចំពោះឱសថបុរាណ ឬឱសថបំប៉នសុខភាពដែលមានសម្រាប់ឱសថបំប៉នសុខភាព។លើកលែងការចុះទិដ្ឋាការបញ្ជិកាឱសថនោះស្ថិតក្នុងការផ្គត់ផ្គង់ប្រព័ន្ធសុខាភិបាលសាធារណៈប៉ុណ្ណោះ។

លោកស្រីបានបន្តថា ចំពោះឱសថសម្រាប់ចុះទិដ្ឋការបញ្ជិកាដែលមានការវេចខ្ចប់ជាកំប៉ុង ឬដបតម្រូវឱ្យមានសំបកប្រអប់ពីខាងក្រៅ និងមានព័ត៌មានគ្រប់គ្រាន់។

លោកស្រី ឱ វណ្ណឌីន បានអំពាវនាវដល់ប្រធានគ្រឹះស្ថានផលិតឱសថ ប្រធានគ្រឹះស្ថានអាហរ័ណនីហរ័ណឱសថ ប្រធានការិយាល័យតំណាងគ្រឹះស្ថានផលិតឱសថនៅក្រៅប្រទេសអនុវត្តតាមសេចក្តីជូនដំណឹងនេះឱ្យមានប្រសិទ្ធភាពខ្ពស់៕

អត្ថបទ៖ សំអឿន