អាមេរិក បើកការវាយប្រហារតាមអាកាសសម្លាប់មេដឹកនាំជាន់ខ្ពស់ ក្រុមអាល់កៃដា នៅ ស៊ីរី

លោក John Kirby អ្នកនាំពាក្យមន្ទីរបញ្ចកោណបាននិយាយកាលពីថ្ងៃចន្ទថា ខ្លួនបានធ្វើការវាយប្រហារតាមអាកាសប្រឆាំងមេដឹកនាំជាន់ខ្ពស់របស់ក្រុមអាល់កៃដា ដែលមានទីតាំងស្ថិតនៅក្នុងខេត្ត Idlib ភាគខាងជើងប្រទេសស៊ីរី កាន់កាប់ដោយកងទ័ពទួរគី និងក្រុមជីវពលឧទ្ទាមឥស្លាមជ្រុលនិយម ។

លោក Kirby បាននិយាយថា លោកមិនមានព័ត៌មានលម្អិតបន្ថែមអំពីអត្តសញ្ញាណរបស់គោលដៅនោះទេ ប៉ុន្តែយោងតាមភ្នាក់ងារ​សារព័ត៌មាន ​​SITE Intelligence Group បានឲ្យដឹងថា ការជជែកគ្នាតាមប្រព័ន្ធផ្សព្វផ្សាយដោយក្រុមឧទ្ទាមស៊ីរីបានបង្ហាញថា ការធ្វើវាយប្រហារនេះបានសម្លាប់លោក Abu al-Bara ‘al-Tunisi លោក Abu Hamza al-Yemeni និងលោក Tanzim Hurras ad -Din ជាកងជីវពលនៅភាគខាងជើងប្រទេសស៊ីរី ដែលមានទំនាក់ទំនងជាមួយក្រុមអាល់កៃដា ។

ខេត្ត Idlib នៅតែជាទីតាំងសំខាន់ចុងក្រោយរបស់ក្រុមជីវពលនិកាយស៊ុននី ក្នុងការបះបោរប្រឆាំងរដ្ឋាភិបាលស៊ីរី ។ កម្លាំងឧទ្ទាមលេចធ្លោជាងគេគឺក្រុម Hay’at Tahrir ash-Sham (HTS) ដែលបានបង្កើតឡើងក្នុងឆ្នាំ ២០១៧ ជាការរួមបញ្ចូលគ្នារវាងរណសិរ្ស Al-Nusra របស់ក្រុមអាល់កដៃដា និងកងជីវពលស្រដៀងគ្នាផ្សេងទៀត ហើយលោក Hurras ad-Din ដែលត្រូវបានកំណត់គោលដៅសម្រាប់ការវាយប្រហារកាលពីថ្ងៃចន្ទ បានបំបែកចេញពីក្រុម HTS ក្នុងឆ្នាំ ២០១៦ ដោយជឿជាក់ថាមកពីមនោគមវិជ្ជារបស់ក្រុមអាល់កៃដា ។

អ្វីជាការកត់សម្គាល់គឺថា សហរដ្ឋអាមេរិកបានគាំទ្ររណសិរ្ស Al-Nusra ក្នុងកំឡុងសង្គ្រាមស៊ីវិលស៊ីរី ដោយជឿជាក់ថា ពួកគេនឹងផ្តួលរំលំរដ្ឋាភិបាលរបស់ប្រធានាធិបតីស៊ីរីលោក Bashar al-Assad ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក ព្រមព្រៀងកាត់បន្ថយកងកម្លាំងប្រយុទ្ធនៅ អ៊ីរ៉ាក់