ព័ត៌មានអន្ដរជាតិ

ម៉ាឡេស៊ីប្រតិកម្ម ក្រោយអាមេរិកស្នើដាក់ពន្ធ១០%ថ្មី ជុំវិញកម្លាំងពលកម្មដោយបង្ខំ

បានផុស

២ ថ្ងៃ មុន

នៅ

ថ្ងៃសុក្រ ៥ មិថុនា ២០២៦

ដោយ

ម៉ាឡេស៊ីបានប្រតិកម្មដោយនិយាយការពារវិស័យផលិតកម្ម និងការអនុវត្តកម្លាំងពលកម្មរបស់ខ្លួន បន្ទាប់ពីសហរដ្ឋអាមេរិកស្នើដាក់ពន្ធបន្ថែមថ្មី ១០% លើប្រទេសជាច្រើន រួមទាំងម៉ាឡេស៊ី ក្រោយបើកការស៊ើបអង្កេតពាណិជ្ជកម្មតាមមាត្រា ៣០១ នៃច្បាប់ពាណិជ្ជកម្ម ១៩៧៤ ពាក់ព័ន្ធនឹងពលកម្មដោយបង្ខំក្នុងខ្សែច្រវ៉ាក់ផ្គត់ផ្គង់សកល។ នេះបើតាមការចុះផ្សាយរបស់កាសែត The Star។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងវិនិយោគ ពាណិជ្ជកម្ម និងឧស្សាហកម្ម លោក Johari Abdul Ghani បាននិយាយថា អាមេរិកបារម្ភលើបញ្ហាសំខាន់ៗ២ដែលពាក់ព័ន្ធនឹងប្រទេសម៉ាឡេស៊ី៖ សមត្ថភាពផលិតកម្មលើសលុប និងពលកម្មដោយបង្ខំ។

លោក Johari និយាយថា មន្ត្រីអាមេរិកកំពុងពិនិត្យមើលថាតើប្រទេសណាដែលផលិតទំនិញលើសលុប ហើយនាំចេញទៅម៉ាឡេស៊ី រួចដឹកជញ្ជូនបន្តទៅកាន់សហរដ្ឋអាមេរិក ឬអត់។

លោកបានប្រាប់អ្នកយកព័ត៌មាននៅថ្ងៃព្រហស្បតិ៍នេះថា៖ «យើងបានអះអាង(ប្រាប់អាមេរិក)ថា ម៉ាឡេស៊ីមិនមានសមត្ថភាពផលិតលើសទេ»។ លោកបានសង្កត់ធ្ងន់ថា វិស័យផលិតកម្មរបស់ម៉ាឡេស៊ីដំណើរការលើគោលការណ៍ផ្អែកលើទីផ្សារ និងឆ្លើយតបទៅនឹងតម្រូវការសកលពិតប្រាកដ ហើយការនាំចេញរបស់ម៉ាឡេស៊ីបំពេញបន្ថែមឧស្សាហកម្មនៅក្នុងប្រទេសទាំង២ និងជួយពង្រឹងភាពប្រកួតប្រជែង។

ពាក់ព័ន្ធនឹងបញ្ហាពលកម្មដោយបង្ខំ លោក Johari បាននិយាយថា ម៉ាឡេស៊ីបានផ្តល់ឱ្យអាជ្ញាធរអាមេរិកនូវការពន្យល់លម្អិតអំពីច្បាប់ការងារ និងក្របខ័ណ្ឌអនុវត្តច្បាប់របស់ខ្លួន។ លោកបានសង្កត់ធ្ងន់ថា ប្រទេសនេះប្រកាន់ខ្ជាប់នូវស្តង់ដារដែលកំណត់ដោយអង្គការពលកម្មអន្តរជាតិ (ILO) ហើយបដិសេធគ្រប់ទម្រង់នៃពលកម្មដោយបង្ខំ។

យ៉ាងណាមិញ លោកបានទទួលស្គាល់ថា ប្រទេសម៉ាឡេស៊ីប្រឈមមុខនឹងបញ្ហាក្នុងការត្រួតពិនិត្យទំនិញនាំចូល ដែលអាចផលិតដោយប្រើពលកម្មដោយបង្ខំក្នុងប្រទេសប្រភពដើម។

គួរគូសបញ្ជាក់ថា ការិយាល័យតំណាងពាណិជ្ជកម្មសហរដ្ឋអាមេរិក (USTR) កាលពីថ្ងៃអង្គារ បានប្រកាសពីសំណើដាក់ពន្ធ ១០% ឬ ១២,៥% លើប្រទេសចំនួន ៦០ ដែលរួមមានម៉ាឡេស៊ី ឥណ្ឌូណេស៊ី និងវៀតណាមជាដើម ពាក់ព័ន្ធនឹងពលកម្មដោយបង្ខំដូចគ្នា៕