ករណីកក្រើកប្រទេសឥណ្ឌាជាថ្មី! ក្មេងស្រីអាយុ​ ១៥ឆ្នាំ ត្រូវបុរស​ ៣៣នាក់ចាប់រំលោភ

ក្មេងស្រីអាយុ១៥ឆ្នាំម្នាក់ ត្រូវបានចាប់រំលោភជាច្រើនដងដោយបុរសរហូតដល់ទៅ ៣៣ នាក់ នៅក្នុងករណីវាយប្រហារផ្លូវភេទដ៏រន្ធត់ចុងក្រោយបង្អស់ នៅក្នុងប្រទេសឥណ្ឌា។

មន្រ្តីជាន់ខ្ពស់ម្នាក់និយាយថា ការវាយប្រហារនេះបានកើតឡើងនៅទីតាំងផ្សេងៗគ្នា ក្នុងស្រុក Thane នៃរដ្ឋ Maharashtra នារយៈពេល ៨ ខែចុងក្រោយនេះ។

លោក Dattatray Karale ស្នងការប៉ូលិសតំបន់ខាងកើតបាននិយាយកាលពីថ្ងៃព្រហស្បតិ៍ថា ប៉ូលិសបានចាប់ខ្លួនមនុស្សចំនួន ២៤ នាក់និងឃុំខ្លួនអនីតិជនពីរនាក់ ពាក់ព័ន្ធនឹងករណីនេះ។

ក្មេងស្រីរងគ្រោះត្រូវបានគេនិយាយថា កំពុងសម្រាកព្យាបាលនៅមន្ទីរពេទ្យរដ្ឋ។

ហ្វូងមនុស្សដែលមានកំហឹង បានប្រមូលផ្តុំគ្នានៅខាងក្រៅស្ថានីយ៍ប៉ូលិស ដែលជាកន្លែងបុរសទាំងនោះ​ កំពុងត្រូវបានឃុំខ្លួន។ នេះបើយោងតាមការចុះផ្សាយរបស់សារព័ត៌មាន Times of India។

លោក Karale និយាយថា ប៉ូលិសនៅទីក្រុង Dombivli បានទទួលសំណុំរឿងមួយកាលពីយប់ថ្ងៃពុធ ប្រឆាំងនឹងមនុស្សចំនួន ៣៣ នាក់ ដែលត្រូវបានចោទប្រកាន់ពីបទឧក្រិដ្ឋកម្មរួមមានការរំលោភសេពសន្ថវៈ រំលោភសេពសន្ថវៈម្តងហើយម្តងទៀត រំលោភបូកនិងរំលោភសេពសន្ថវៈលើអនីតិជន។

លោកបានបន្ថែមថា បទល្មើសដែលបានចោទប្រកាន់ បានកើតឡើងនៅចន្លោះថ្ងៃទី ២៩ ខែមករាដល់ថ្ងៃទី ២២ ខែកញ្ញាឆ្នាំនេះ។

រឿងហេតុបានចាប់ផ្តើម នៅពេលគូស្នេហ៍របស់ក្មេងស្រី បានចាប់រំលោភនាងកាលពីខែមករា ហើយបានថតវីដេអូទុក។ បុរសជាសង្សារបានយកវីដេអូនោះជាការគំរាមកំហែងនាង។ ក្រោយមកមិត្តភក្តិនិងអ្នកស្គាល់គ្នារបស់គាត់ បានចាប់រំលោភនាងយ៉ាងតិចពី ៤ ទៅ ៥ ដងនៅកន្លែងផ្សេងៗគ្នា។

មកទល់ពេលនេះ ប៉ូលិសកំពុងស្វែងរកជនសង្ស័យនៅសេសសល់ ខណៈអ្នកដែលបានចាប់ខ្លួនរួចហើយ នឹងត្រូវឃុំឃាំងបណ្តោះអាសន្នរហូតដល់ថ្ងៃទី២៩ខែកញ្ញា។

គួរបញ្ជាក់ថា ច្បាប់រំលោភសេពសន្ថវៈរបស់ឥណ្ឌា ត្រូវបានរៀបចំឡើងវិញបន្ទាប់ពីហេតុការណ៍ឆ្នាំ ២០១២ នៅទីក្រុងញូវដែលី ប៉ុន្តែចំនួនបទល្មើសនៅតែខ្ពស់ដដែល ដោយមានករណីរំលោភជាង ២៨,០០០ ករណីត្រូវបានរាយការណ៍ក្នុងឆ្នាំ ២០២០៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រំលោភចៅបង្កើតមានផ្ទៃពោះ​៥ខែ ទើបបែកការណ៍​