ផ្ទេរតំណែងប្រធានពន្ធនាគារខេត្តកណ្ដាល ទៅជាអគ្គនាយករង នៃអគ្គនាយកដ្ឋានពន្ធនាគារក្រសួង​មហាផ្ទៃ

លោក​ឧត្ដម​អគ្គានុរក្ស ថ្នាក់​លេខ​១ ចា​ត ស៊ី​នាង អត្តលេខ​០០៥៣ ត្រូវបាន​ដកចេញ​ពី​ប្រធាន​ ពន្ធនាគារ ​ខេត្តកណ្ដាល ឲ្យ​ទៅកាន់​មុខតំណែង​ជា​អគ្គនាយករង នៃ​អគ្គនាយកដ្ឋាន​ពន្ធនាគា​រ​ក្រសួងមហាផ្ទៃ​វិញ​ បន្ទាប់ពី​មានរឿង​អសកម្ម​ជាច្រើន​នៅក្នុង​ពន្ធនាគារ ។

នេះ​បើ​យោងតាម​អនុក្រឹត្យ​ស្តីពី​ការតែងតាំង​មន្ត្រីរាជការ លេខ​៤៧២ អនក្រ​.​ត​ត ចុះ​ថ្ងៃទី​១១ ខែតុលា ឆ្នាំ​២០២១ ដែល​ទើប​ទទួលបាន​នៅ​រសៀល​ថ្ងៃទី​២៥ ខែតុលា ឆ្នាំ​២០២១​នេះ​។

ក្នុង​សេចក្តីសម្រេច មាត្រា​១ តែងតាំង​លោក​ឧត្ដម​អគ្គានុរក្ស ថ្នាក់​លេខ​១ ចា​ត ស៊ីនាង អត្តលេខ​០០៥៣ ឲ្យ​ទៅកាន់​មុខតំណែង​ជា​អគ្គនាយករង នៃ​អគ្គនាយកដ្ឋាន​ពន្ធនាគា​រ​ក្រសួងមហាផ្ទៃ​។

ជាមួយគ្នា​នោះដែរ សម្ដេច​ក្រឡាហោម ស ខេង ឧបនាយករដ្ឋមន្ត្រីរ​ដ្ឋ​មន្ត្រី​ក្រសួងមហាផ្ទៃ​ បានចេញ​សេចក្ដីប្រកាស​ស្ដីពី​ការតែងតាំង​មន្ត្រី​ពន្ធនាគារ លេខ​២៦២៤ ប្រក ចុះ​ថ្ងៃទី​១៨ ខែតុលា ឆ្នាំ​២០២១ សម្រេច​តែងតាំង​លោក​ឧត្ដម​អគ្គានុរក្ស ថ្នាក់​លេខ​៣ ឯម និមល អត្តលេខ​០១៦៣ ឲ្យ​ទៅកាន់​មុខតំណែង​ជា​ប្រធាន​ពន្ធនាគារ​ខេត្តកណ្តាល ជំនួស​លោក​ឧត្ដម​អគ្គានុរក្ស ចា​ត ស៊ី​នាង វិញ​។

សូម​រំលឹកថា លោក ឯម និមល ជា​អនុ​ពន្ធនាគារ​ខេត្តកណ្តាល យូ​ឆ្នាំ​មកហើយ ៕

អត្ថបទ៖ ឆៃ យ៉ា​