ខ្យងចំពុះទាកំពុងពេញប្រមូលផល តែខ្វះតម្រូវការបញ្ជាទិញដូចមុន

កោះកុង៖ ប្រជានេសាទក្នុងតំបន់សហគមន៍ពាមក្រសោប ស្រុកមណ្ឌលសីមា លើកឡើងថា ទិន្នផលអាហារសមុទ្រខ្យងចំពុះទាកំពុងពេញសាច់ប្រមូលផល ២ ខែមកនេះ ក៏ប៉ុន្តែខ្វះការបញ្ជាទិញពីក្រុមឈ្នួញដូចពេលមុនៗគ្រាជួបវិបត្តិជំងឺកូវីដ-១៩។

លោក ប៉ែន សំអាល់ ជាអ្នកនេសាទប្រមូលផលខ្យងចំពុះទានៅសមុទ្រទឹករាក់គ្រប់គ្រងដោយសហគមន៍ព្រៃកោងកាងពាមក្រសោប ឱ្យដឹងថា រដូវទាញយកផលចំណេញពីទិន្នផលខ្យងចំពុះទាផ្តើមពីខែតុលាដល់ខែឧសភាជារៀងរាល់ឆ្នាំ អ្វីដែលគួរឱ្យសោកស្តាយ គឺជិត ២ ឆ្នាំទៅហើយដែលមិនបានប្រមូល ព្រោះតែការរីករាលដាលជំងឺកូវីដ-១៩ ដល់សហគមន៍ពួកគាត់។

តំណាងប្រជានេសាទ លោក សុខ ជីនទុន អះអាងថា សម្រាប់ឆ្នាំ ២០២២ នេះ ទើបពលរដ្ឋក្នុងមូលដ្ឋាននាំគ្នាសម្រុកប្រមូលផលឡើងវិញ ទោះបីជាមានពុំមានក្រុមឈ្នួញបញ្ជាទិញច្រើនដូចពេលមុនក៏ដោយ ឱ្យតែថាលក់បានសម្រាប់យកប្រាក់ចំណូលផ្គត់ផ្គង់គ្រួសារ ទ្រាំស្តារសេដ្ឋកិច្ចជាមុនសិន។

ខ្យងចំពុះទាសព្វថ្ងៃ ក្នុង១គីឡូក្រាមថ្លៃ ១ ២០០ រៀល ទិញពីទូកលើផ្ទៃសមុទ្រតែម្តង បើធៀបនឹងពេលមិនទាន់មានការវាយលុកជំងឺកូវីដ អាចលក់បាន ១គីឡូក្រាមថ្លៃ ២ ០០០ រៀលទៅ ២ ២០០ រៀល។ គ្រាមិនទាន់កកើតជំងឺកូវីដ ប្រជានេសាទអាចរកខ្យងបានពី ៧០ ទៅ ៩០ តោនក្នុង១ឆ្នាំៗ បើគិតជាថវិកាខ្ទង់ម៉ឺនដុល្លារ។

លោក សៅ សំណាង អនុប្រធានសហគមន៍តំបន់អេកូទេសចរធម្មជាតិព្រៃកោងកាងពាមក្រសោប បានប្រាប់ “កម្ពុជាថ្មី” ថា ខ្យងចំពុះទា មានតម្រូវការច្រើន លុះត្រាតែឈ្នួញនៅប្រទេសថៃបញ្ជាទិញពីប្រជានេសាទ ទើបតម្លៃលក់អាចមានផលចំណេញគួរសម។ លោកថា សព្វថ្ងៃនេះ មានតែឈ្នួញក្នុងស្រុកទេដែលទិញយកទៅទីផ្សារ ឬអាចនាំទៅខេត្តផ្សេងៗទៀត។

កន្លងទៅ ក្រសួងបរិស្ថានធ្លាប់ចុះទស្សនកិច្ចស្រាវជ្រាវពីជីវភាពពលរដ្ឋក្នុងសហគមន៍ពាមក្រសោបម្តងទៅ២ដងហើយ ដោយសន្យាជួយរកទីផ្សារលក់ក្នុងតម្លៃសមរម្យជូនអ្នកនេសាទខ្យងចំពុះទាតាមបណ្តាសណ្ឋាគារលំដាប់ផ្កាយ និងផ្សារទំនើបធំៗនៅរាជធានីភ្នំពេញ។

ខ្យងចំពុះទា ជាអាហារមួយប្រចាំនៅខេត្តកោះកុងដែលស្ងោរជ្រលក់ជាមួយទឹកត្រីកោះកុងហូប ឆាក្រៀម ឆាកែងហឹរៗ និងច្នៃជាម្ហូបបានច្រើនមុខតាមចំណង់ចំណូលចិត្តអ្នកពិសារ។ ខ្យងចំពុះទាជាជីវៈចម្រុះកកើតឡើងវិញ គ្រាន់តែចំណោយថវិកាច្រើនបន្តិចដើម្បីទិញបង្គោលយកទៅដាំជម្រៅពី​ ៥ ម៉ែត្រទៅ ១០ ម៉ែត្រពីផ្ទៃទឹកសមុទ្រ ហើយរុំទៃសជុំវិញបង្គោលនីមួយៗតាមរយៈការយកកូនខ្យងមកទុំព័ទ្ធរហូតដល់ពេលធំធាត់ប្រមូលផលតែម្តង។

សហគមន៍អេកូទេសចរធម្មជាតិព្រៃកោងកាងពាមក្រសោប ឃុំពាមក្រសោប មានប្រជាពលរដ្ឋប្រមាណ ១១៩ គ្រួសារប្រកបរបរនេសាទខ្យងចំពុះទា ក្នុងចំណោមពលរដ្ឋសរុបចំនួន ៣៩២ គ្រួសារដែលកំពុងរស់នៅនាពេលបច្ចុប្បន្ន ក្រៅពីលក់ដូរ និងប្រកបអាជីវកម្មផ្តល់សេវាទេសចរណ៍ជូនភ្ញៀវដើរលេងកម្សាន្ត៕

អត្តបទ៖ សិរីវឌ្ឍនៈ