សំណែនទាំងនេះ ជាប្រពៃណីកូនចៅចិន តែងសែននៅថ្ងៃទី១ ព្រោះជឿថានាំសំណាងពិត

ក្នុងពិធីបុណ្យចូលឆ្នាំប្រពៃណីចិន ឆ្នាំខាល នៅថ្ងៃចូលឆ្នាំថ្ងៃទី១ ត្រូវនឹងថ្ងៃទី៣១ ខែមករា ឆ្នាំ២០២២ សំណែន និងម៉ោងសែនទេវតា ឬកុងម៉ា ដែលកូនចៅចិនរមែងធ្វើ ហើយជឿថា ពិតជានាំសំណាងពិត មានដូចខាងក្រោម៖

ពេល​ព្រលឹម សែនវត្ថុស័ក្តិសិទ្ធិ

​វេលា​ម៉ោង​ ៦​ព្រឹក គេត្រូវធ្វើ​ពិធី​សែនអរគុណដល់ទេវតាថែរក្សាផ្ទះ ដែលបានជួយមើលថែគេហដ្ឋានពេញមួយឆ្នាំ។ ក្រៅពីនោះ គេតែងបួងសួងសុំឱ្យគ្រួសាររស់នៅនៅត្រជាក់ និងសុខសប្បាយ។ តង្វាយ​ដែល​នឹង​យក​មក​ថ្វាយ​នោះ​មាន ទៀន ទឹក សាច់​ជ្រូក ទា មាន់ បង្អែម និងផ្លែឈើ​ល្អៗ​ដូច​ជា ក្រូច​មាស ផ្លែ​ប៉ោម​ក្រហម ទំពាំង​បាយ​ជូរ ស្រា តែ ​ក្រដាស​ប្រាក់ ក្រដាស​មាស។ ការគោរពបូជាមួយនេះគេ​ប្រើ​ធូប ​៣​សរសៃ។

ពេល​ព្រឹក​​សែនវិញ្ញាណក្ខន្ធ​ដូនតា

បន្ទាប់​ពីទេវតា គឺ​បូជា​ដូនតា កុងម៉ា។ ការបូជានេះដើម្បីបង្ហាញពីការដឹងគុណ និងរំលឹកដល់ឪពុកម្តាយ ដូនតា ញាតិសណ្ដាន ដែលបានបាត់បង់ជីវិត ដោយត្រូវសែននៅម៉ោង ១០ព្រឹក ឬមិនលើសពីថ្ងៃត្រង់ឡើយ។ គ្រឿង​បូជា​មាន​សាស៊ែ អាហារ​ប្រៃ ឬ​ជា​អាហារ​ដែល​អ្នក​ស្លាប់​ចូល​ចិត្ត បង្អែម​ផ្សេងៗ ផ្លែ​ឈើ ដុត​លុយ ក្រដាស​មាស និងសម្លៀកបំពាក់ក្រដាស ដើម្បីឧទ្ទិសដល់វិញ្ញាណក្ខន្ធដែលចែកឋានទៅ។ ពិធីសែននេះគេ​ប្រើ​ធូប ​៣សរសៃដូចគ្នា។

ពេលរសៀល សែនជំនាងផ្ទះ

គេសែននៅពេលរសៀល មិនលើសពីម៉ោង ៤នោះទេ ហើយគេប្រើធូប ១ សរសៃ រួមជាមួយតង្វាយមាន ជ្រូកខ្វៃ បាយដំណើប អាហារសម្រន់ផ្សេងៗ ក្រដាសប្រាក់ ក្រដាសមាស ហើយក្រោយពេលសែនរួចរាល់ គេតែងដុតផាវ។ ការសែនមួយនេះអាចជួយបង្កើនភាពរុងរឿង និងបណ្តេញអំពើអាក្រក់ពីគ្រួសារ។

យប់ជ្រៅ សែនទេវតាទ្រព្យ

ចំពោះ​អ្នក​ដែល​ចង់​បង្កើន​លាភ​សំណាង ទ្រព្យសម្បត្តិ គេតែងតែសែនទេវតា Cai Xing Ye នៅ​ម៉ោង១១យប់ ដល់ម៉ោង ១រំលងអាធ្រាត្រ ខណៈទេវតាមួយអង្គនេះអុជធូប ៣សរសៃ។ សំណែនរួមមាន ថូផ្កាស្រស់ ជើងចង្កៀងមួយគូ ទៀនក្រហមមួយគូ ដើម celery ចំនួន ៥ ដើម អង្ករចំហុយ តែ ៥ពែង ផ្លែប៉ោមក្រហម ផ្លែពែរ ទំពាំងបាយជូ ចេក ក្រដាសប្រាក់ និងក្រដាសមាស៕

អត្ថបទ៖ សន្យា

ចុចអាន៖ ថ្ងៃសែនចូលឆ្នាំ ចិន ប្រើក្បួននេះ ដូចបូមលាភចូលដល់ផ្ទះ មានសំណាងពេញមួយជីវិត

ចុចអាន៖ ទេវតា ៣ កន្លែង ត្រូវមានគ្រឿងដង្វាយនេះ សែនចូលឆ្នាំថ្មី ទើបនាំសុខសប្បាយ និងលាភចូលពេញបរិបូរណ៍