កុល ដាវី ចេញសារដាស់តឿនអ្នកជំពាក់បំណុល ឱ្យប្រញាប់ចេញមុខដោះស្រាយ

ភ្នំពេញ៖ តារាចម្រៀង និងសម្ដែង អ្នកនាង កុល ដាវី ថ្មីៗនេះបានបង្ហាញអារម្មណ៍ហាក់មិនសប្បាយចិត្តលើបុគ្គលមួយចំនួន ដែលមិនបានគោរពតាមកិច្ចសន្យានៃការខ្ចីប្រាក់របស់ខ្លួន ខណៈការទូទាត់សំណងនៅមិនទាន់មានដំណោះស្រាយ។

អ្នកនាង កុល ដាវី បានលើកឡើងដូច្នេះ៖ “ចង់ប្រាប់អ្នកជំពាក់លុយខ្ញុំ ខ្ញុំមិនដែលភ្លេចអ្នកទេ ខ្ញុំនឹកអ្នករាល់ថ្ងៃ មានចិត្តជួយសងផង ឱ្យចេះយកចិត្តគេដាក់ចិត្តឯងផង ពេលខ្ចីយកលុយញើស​ឈាមគេ​ទៅ​ស្រួលៗ​ណាស់ ដល់ពេលសងគេ មិនព្រមសង ចង់សួរថាក្នុងខ្លួនគិតអី?”។

ការទម្លាយរបស់អ្នកនាង កុល ដាវី នាពេលនេះ មកពីនាងអស់ភាពអត់ធ្មត់លើចរិតរបស់បុគ្គលដែលជំពាក់ប្រាក់ហើយមិនព្រមចេញមុខសងមកវិញ។ ប៉ុន្តែយ៉ាងណាមិញ កុល ដាវី មិនទាន់ទម្លាយអត្តសញ្ញាណបុគ្គលទាំងនោះឡើយ។

គួរបញ្ជាក់ថា មួយរយៈចុងក្រោយនេះ តារាអ្នកសិល្បៈមួយចំនួនបានប្រកាសផុងខ្លួនដោយការចាញ់បោកលុយ ឬឱ្យគ្នាជំពាក់ប្រាក់អស់រាប់ម៉ឺន រាប់សែនដុល្លារ ដូចជាអ្នកនាង សូដា នីតា អ្នកនាង សឿ សុធារ៉ឆា អ្នកនាងខ្ញុង ជាដើម៕

អត្ថបទ៖ ចាន់រ៉ា