GMAC ហ្វឹកហ្វឺនសិក្ខាកាមអំពីរបៀបពន្លត់អគ្គិភ័យនៅតាមរោងចក្រ

សមាគមរោងចក្រកាត់ដេរនៅកម្ពុជា ដែលហៅកាត់ថា GMAC បើកវគ្គហ្វឹកហ្វឺនអំពីរបៀបពន្លត់អគ្គិភ័យ នៅតាមរោងចក្រសហគ្រាស។

បើតាម GMACការធ្វើសមយុទ្ធពន្លត់អគ្គីភ័យននេះ បានធ្វើឡើងនៅបរិវេណ GMACកាលពីថ្ងៃទី១១ខែមីនាឆ្នាំ២០២២ ដូចគម្រោងដែលបានគ្រោងទុក។ 

GMACបានចាត់ទុកថា ការធ្វើសមយុទ្ធពន្លត់អគ្គិភ័យនេះ មានសារៈសំខាន់ណាស់ ហើយវាត្រូវបានធ្វើឡើងពីរដងក្នុងមួយឆ្នាំ ដើម្បីហ្វឹកហ្វឺនបុគ្គលិក ក៏ដូចជាសិក្ខាកាមដែលកំពុងចូលរួមវគ្គសិក្សានៅវិទ្យាស្ថានបណ្តុះបណ្តាលកាត់ដេរនៅកម្ពុជា(  CGTI) ឱ្យយល់កាន់តែច្បាស់អំពីរបៀបជម្លៀសខ្លួនចេញ និងអ្វីដែលអ្នកគ្រប់គ្នាគួរធ្វើនៅពេលមានអគ្គិភ័យ។

លោក ឧកញ៉ា គង់ សាង ប្រធានសមាគមរោងចក្រកាត់ដេរនៅកម្ពុជា(GMAC)បានឱ្យដឹងថា បច្ចុប្បន្នសមាគមមានសមាជិកជារោងចក្រកាត់ដេរសម្លៀកបំពាក់ចំនួន ៤៦២ ផលិតស្បែកជើងចំនួន១៣ និងផលិតផលធ្វើដំណើរចំនួន៩២។

លោក ឧកញ៉ា គង់ សាងបានបន្តថា ក្នុងឆ្នាំ២០២១កន្លងទៅ ការនំាចេញផលិតផលកាត់ដេរមានចំនួន ១១,៣៨៩.៦លានដុល្លារអាមេរិក កើនឡើងប្រមាណ ១,៥០៥លានដុល្លារអាមេរិកស្មើនឹង១៥.២ភាគរយក្នុងនោះសម្លៀកបំពាក់មានចំនួន ៨,០១៧លាន ស្បែកជើង ១,៣៩០លាន និងផលិតផលធ្វើដំណើរ ១,៤៩០លាន ក្រៅពីនេះគឺផលិតផលវាយនភ័ណ្ឌផ្សេងៗទៀត៕ សំអឿន