អ្នកកាសែតអង់គ្លេសម្នាក់រៀបរាប់ពីឧបសគ្គលំបាកខ្លាំងទម្រាំទៅដល់បន្ទប់សម្ងាត់របស់លោក Zelensky

នៅក្នុងបន្ទប់សម្ងាត់មួយដែលស្ទើរតែគ្មានអ្នកដឹងនៅទីក្រុងកៀវប្រទេសអ៊ុយក្រែន លោកប្រធានាធិបតី Volodymyr Zelensky បាននិយាយទៅកាន់ប្រធានព័ត៌មានមកពីកាសែត The Economist នៅក្នុងបទសម្ភាសន៍ផ្តាច់មុខអំពីការប្រយុទ្ធប្រទេសរបស់លោក ។

The Economist ដែលជាប្រភពព័ត៌មាន និងការវិភាគជាសកលដែលគួរឲ្យទុកចិត្តបំផុតមួយរបស់ពិភពលោកបាននិយាយយ៉ាងច្រើនទៅកាន់លោក Zelensky នៅក្នុង “បន្ទាយ ឬបន្ទប់សម្ងាត់” កាលពីថ្ងៃទី ២៥ ខែមីនា ឆ្នាំ ២០២២ អំពីស្ថានភាពបច្ចុប្បន្ននៃសង្រ្គាមជាមួយរុស្ស៊ី និងអ្វីដែលជាយុទ្ធសាស្ត្រឈ្នះសម្រាប់អ៊ុយក្រែន ។

លោកស្រី Zanny Minton Beddoes ជនជាតិអង់គ្លេស និងជាអ្នកសារព័ត៌មាន The Economist បាននិយាយរៀបរាប់ពីការទៅដល់បន្ទប់សម្ងាត់មួយនេះថា “វាត្រូវចំណាយពេលជិតមួយម៉ោងសម្រាប់ពួកយើងដើម្បីទៅដល់ច្រកទ្វារនៃបរិវេណរបស់លោក Volodymyr Zelensky ដែលជាការធ្វើដំណើរខុសគ្នាទៅកាន់វិមានប្រធានាធិបតីកន្លងមក ដែលជាធម្មតាមានរយៈពេល ១០ នាទីប៉ុណ្ណោះ” ។

លោកស្រីបាននិយាយថា ផ្លូវទៅបន្ទប់សម្ងាត់ក្នុងទីក្រុងកៀវភាគច្រើនគឺក្រាលគ្រួស ហើយមិនមានការធ្វើចរាចរណ៍ច្រើនទេក្នុងប៉ុន្មានថ្ងៃមកនេះ ប៉ុន្តែផ្លូវដែលជាសរសៃឈាមកណ្តាលរបស់ទីក្រុងត្រូវបានរៀបចំឡើងវិញដើម្បីបំភាន់សត្រូវ ។

លោកស្រី Zanny បញ្ជាក់ថា ផ្លូវនេះក៏ឆ្លងកាត់ដុំថ្មធំៗប្រឆាំងរថក្រោះរបស់សូវៀត ឆ្លងកាត់ការការពារពីខ្មាន់កាំភ្លើង និងមានប៉ុស្តិ៍ត្រួតពិនិត្យជាច្រើនដើម្បីពង្រឹងសន្តិសុខកាន់តែខ្លាំង ។ យើងក៏បានផ្លាស់ប្តូរយានយន្តផងដែរ ហើយស្ថានភាពដ៏ភ័យខ្លាចនៃការត្រៀមខ្លួនក្នុងទីក្រុងកៀវគឺធ្វើឲ្យយើងនឹកឃើញដល់ខែកុម្ភៈ ឆ្នាំ ២០១៤ នៅពេលដែលកិច្ចខិតខំប្រឹងប្រែងរបស់រដ្ឋាភិបាលរុស្ស៊ីក្នុងការរក្សាអ៊ុយក្រែនក្នុងការកាន់កាប់របស់ខ្លួនបាននាំឲ្យមាន “បដិវត្តន៍” និងការស្លាប់របស់មនុស្សជាង ១០០ នាក់ ខណៈឥឡូវ​នេះរាជធានីមួយនេះក៏​កំពុង​មាន​សង្គ្រាម​ម្តង​ទៀត” ។

នៅពេលទៅដល់បន្ទប់សម្ងាត់នោះ លោកស្រី Zanny បានប្រាប់ថា “របងទ្វារលោហធាតុពណ៌សបានបើក ហើយមានដើមឈើ និងបាវខ្សាច់ ។ ជំនួយការប្រធានាធិបតីបាននិយាយថា “សូមស្វាគមន៍មកកាន់បន្ទាយរបស់យើង” ។

ជាចុងក្រោយលោកស្រីរៀបរាប់ថា មានអ្នកបាញ់ស៊ីបទាំងលើ និងក្រោម ទាំងឆ្វេង និងស្ដាំ ក៏ដូចជាប្រព័ន្ធការពារអាកាសផងដែរ ។ នៅពេលដែលទ្វារបិទ ទាហានម្នាក់បានយកទូរស័ព្ទលើតុពណ៌ក្រហម ពោលជាទូរស័ព្ទរបស់រដ្ឋាភិបាលដែលមានសុវត្ថិភាពពីសម័យសូវៀតសម្រាប់ការបញ្ជាណាមួយ ។ យើង​ត្រូវ​បានបញ្ជូន​ទៅ​ផ្លូវ​ចូល​ចំហៀង បន្ទាប់​មក​នាំ​ចូល​ទៅ​ខាង​ក្នុង​តាម​ច្រក​របៀង ហើយ​ជណ្ដើរ​មាន​សភាព​ងងឹតទម្រាំទៅដល់កន្លែង ឬបន្ទប់សម្ងាត់របស់លោក Zelensky ៕

ប្រែសម្រួលដោយ ៖ ជីវ័ន្ត

ប្រភព ៖ The Economist

ចុចអាន ៖ រុស្ស៊ី ប្រកាសជោគជ័យបញ្ចប់សង្គ្រាមដំណាក់កាលទី ១ នៅ អ៊ុយក្រែន