ក្រសួងបរិស្ថាន រៀបចំការប្រឡងប្រណាំង អារាមមេត្រីបរិស្ថាន ជាលើកដំបូង

ក្រសួងបរិស្ថានសហការជាមួយក្រសួងធម្មការ និងសាសនា នឹងរៀបចំ “ការប្រឡងប្រណាំងអារាមមេត្រីបរិស្ថាន ឆ្នាំ២០២២” ជាលើកដំបូង ដើម្បីលើកម្ពស់កែលម្អ និងអភិវឌ្ឍន៍ ទីអារាមឱ្យមានសោភណ្ឌភាពស្រស់ស្អាតថែមទៀត។

យោងតាមសេចក្តីជូនដំណឹងរបស់ក្រសួងបរិស្ថានដែលទើបទទួលបាននៅថ្ងៃទី២៧ ខែមេសានេះបានឱ្យដឹងថា ក្រសួងសូមប្រគេន និងជម្រាបជូន ព្រះចៅអធិការវត្ត និងគណៈគ្រប់គ្រងអារាមសាសនាទាំងអស់ឱ្យបានជ្រាបថា ដើម្បីលើកកម្ពស់ការចូលរួមរបស់អារាមសាសនាទាំងអស់ឱ្យប្រតិបត្តិសកម្មភាពមេត្រីបរិស្ថាន ក្រសួងបរិស្ថាន ដោយមានការសហការជាមួយក្រសួងធម្មការ និងសាសនា នឹងរៀបចំ “ការប្រឡងប្រណាំងអារាមមេត្រីបរិស្ថាន ឆ្នាំ២០២២”។

ក្រសួងបរិស្ថាន បានបន្តថា ការប្រឡងប្រណាំងនេះនឹងជូនដំណឹង និងទទួលពាក្យប្រឡងប្រណាំង ចាប់ពីខែមេសា ដល់ ខែមិថុនា ឆ្នាំ២០២២។ ការពិនិត្យ និងចុះវាយតម្លៃដោយគណៈកម្មការអន្តរក្រសួង ក្នុងខែកក្កដា-សីហា ឆ្នាំ២០២២ ហើយពិធីប្រកាសជ័យលាភីអារាមមេត្រីបរិស្ថាន ក្នុងខែកញ្ញា ឆ្នាំ២០២២។

គួរបញ្ជាក់ថា ការប្រឡងប្រណាំងអារាមមេត្រីបរិស្ថាន ឆ្នាំ២០២២ នឹងជួយលើកកម្ពស់តម្លៃព្រះពុទ្ធសាសនា និងបរិស្ថាន ពិសេសនឹងជួយជំរុញឱ្យវត្តអារាមនីមួយៗខិតខំប្រឹងប្រែងសម្អាត កែលម្អ និងអភិវឌ្ឍន៍ឱ្យមានការរីកចម្រើន និងកាន់តែមានសោភណ្ឌភាពស្រស់ស្អាតថែមទៀត៕

អត្ថបទ៖ សំអឿន