សន្តិសុខសង្គម

ចាប់ខ្លួនក្រុមលួចរថយន្ដ និងទទួលផលចោរកម្ម៣នាក់ ដកហូតរថយន្ដពីរគ្រឿងនិងម៉ូតូ១គ្រឿង

បានផុស

៤ years មុន

នៅ

ថ្ងៃអង្គារ ៣ ឧសភា ២០២២

ដោយ

កម្លាំងជំនាញផ្នែកព្រហ្មទណ្ឌ នៃអធិការដ្ឋាននគរបាលខណ្ឌបឹងកេងកង បានសហការជាមួយសមត្ថកិច្ចខេត្ដកំពង់ស្ពឺ ធ្វើការស្រាវជ្រាវស្វែងរកតាមប្រព័ន្ធGPS និងបើកប្រតិបត្តិការបង្ក្រាបករណីលួចរថយន្ដដឹកទំនិញ និងទទួលផលចោរកម្ម ដោយធ្វើការឃាត់ខ្លួនជនសង្ស័យបានចំនួន៣នាក់ ដកហូតរថយន្ដ២គ្រឿង និងម៉ូតូ១គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការស្រាវជ្រាវបង្ក្រាបនេះ បានធ្វើឡើងកាលពីវេលាម៉ោង១៣និង៣០នាទី ថ្ងៃទី០២ ខែឧសភា ឆ្នាំ២០២២ នៅចំណុចភូមិសហគមន៍ខាងលិច ឃុំភក្ដី ស្រុកបសេដ ខេត្ដកំពង់ស្ពឺ។

របាយការណ៍សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនមាន ១-ឈ្មោះ ស៊ិន សុផល ភេទប្រុស អាយុ២៩ឆ្នាំ ជនជាតិខ្មែរ ស្នាក់នៅភូមិត្រពាំងវែង ឃុំថុង ស្រុកបសេដ ខេត្ដកំពង់ស្ពឺ មុខរបរ មិនពិតប្រាកដ។ ២-ឈ្មោះ សំ មាន ភេទប្រុស អាយុ២៦ឆ្នាំ ជនជាតិខ្មែរ ស្នាក់នៅភូមិទួលឈើនាង ឃុំសង្កែសាទ ស្រុកឪរ៉ាល ខេត្ដកំពង់ស្ពឺ មុខរបរ មិនពិតប្រាកដ។ ៣-ឈ្មោះ សំ ហឿន ភេទប្រុស អាយុ៣១ឆ្នាំ ជនជាតិខ្មែរ ស្នាក់នៅភូមិទួលឈើនាង ឃុំសង្កែសាទ ស្រុកឪរ៉ាល ខេត្ដកំពង់ស្ពឺ មុខរបរ មិនពិតប្រាកដ។

របាយការណ៍បញ្ជាក់ថា ក្រោយពីឃាត់ខ្លួនជនសងស្ស័យ កម្លាំងបានដកហូតរថយន្ដដឹកទំនិញចំនួន០២គ្រឿង ម៉ាក KIA FRONTIER ពណ៌ខៀវ ពាក់ផ្លាកលេខ កំពង់ចាម ២A ៦៨៣២ និងម៉ាក់ HYUNDAI PORTER ពណ៌ស ពាក់ផ្លាកលេខ កំពង់ស្ពឺ ២ A ៦៤៧៩ និងម៉ូតូ០១គ្រឿងម៉ាក Clak ពណ៌ស ពាក់ផ្លាកលេខ កំពង់ស្ពឺ ១I ៥៨៦៩។

បច្ចុប្បន្នជនសង្ស័យទាំង៣នាក់ កំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌបឹងកេងកង ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវីធីច្បាប់៕

អត្ថបទ៖ សុខុម