ករណីប្រទះឃើញម៉ូតូប្លុងចោលនៅភូមិត្រញាំងត្រយឹង ឃុំចំបក់ សមត្ថកិច្ចថា​ ជាករណីចោរលួចហើយយកមកប្លុងចោល

ករណីប្រទះឃើញម៉ូតូយកមកប្លុងចោលនៅភូមិត្រពាំងត្រយឹង ឃុំចំបក់ ស្រុកបានទី ជាករណីចោរលួច ខណៈជនរងគ្រោះបានដាក់ពាក្យបណ្ដឹងដើម្បីឲ្យសមត្ថកិច្ចស្រាវជ្រាវរកជនសង្ស័យ។ តាមការបញ្ជាក់ពីលោកអនុសេនីយ៍ឯក មាន វុត្ថា នាយប៉ុស្ដិ៍នគរបាលរដ្ឋបាលឃុំចំបក់ ស្រុកបាទី ខេត្តតាកែវ បានបញ្ជាក់ឲ្យដឹងនៅរសៀលថ្ងៃទី៥មេសានេះថា ករណីនេះម៉ូតូជនរងគ្រោះបានបាត់នៅយប់ថ្ងៃទី៤ ឈានចូលថ្ងៃទី៥ ខែមេសានេះ ដោយជនសង្ស័យបានលួចចេញពីភូមិបឹងលាច ឃុំចំបក់ ខណៈដែលជនរងគ្រោះទុកនៅខាងក្រោមផ្ទះ។

លោកអនុសេនីយ៍ឯក មាន វុត្ថា បន្ថែមថា ក្រោយពីជនរងគ្រោះមកដាក់ពាក្យបណ្ដឹងនៅប៉ុស្ដិ៍នគរបាលរួច ក៏មានពលរដ្ឋរាយការណ៍ថាបានប្រទះឃើញម៉ូតូមួយគ្រឿងម៉ាកឌ្រីមសង់ ស៊េរីឆ្នាំ២០២៥ ដោយមានស្នាមគាស់បំបែកគ្រាប់សោរ​យកមកប្លុងចោលនៅចំណុចវាលស្រែ ក្នុងភូមិត្រពាំងត្រយឹង ឃុំចំបក់។

ក្រោយទទួលបានព័ត៌មាន កម្លាំងនគរបាលប៉ុស្ដិ៍ក៏បានចុះទៅកន្លែងកើតហេតុ ដើម្បីធ្វើកំណត់ហេតុប្រគល់ម៉ូតូឲ្យជនរងគ្រោះវិញ ចំណែកជនសង្ស័យ កម្លាំងជំនាញកំពុងស្រាវជ្រាវតាមនិតិវិធីដើម្បីកំណត់មុខសញ្ញាចាប់ខ្លួនមកអនុវត្តតាមនិតិវិធីច្បាប់៕