ក្រៅពីជនសង្ស័យទទួលផលចោរកម្ម សមត្ថកិច្ចក៏បានឃាត់អ្នករារាំងពីរនាក់ទៀតដើម្បីអនុវត្តច្បាប់

ហេតុការណ៍បង្កការភ្ញាក់ផ្អើលកាលពីយប់ថ្ងៃទី៤ ខែមេសា ឆ្នាំ២០២៦ ដោយសារប្រជាពលរដ្ឋជាច្រើនបាននាំគ្នារារាំងឡោមព័ទ្ធកម្លាំងនគរបាលមិនឲ្យយកជនសង្ស័យដែលជាប់សង្ស័យពីការទទួលផលចោរកម្មចេញ ក្នុងគោលបំណងរំដោះជនសង្ស័យចេញពីការអនុវត្តច្បាប់។ ក្នុងប្រតិបត្តិការអន្តរាគមន៍ កម្លាំងសមត្ថកិច្ចនៃអធិការនគរបាលស្រុកគង​ពិ​សី សហការជាមួយកំលាំងនគរបាលស្នងការដ្ឋាននគរបាលខេត្ដព្រៃវែង​ ក្រៅពីឃាត់ខ្លួនជនសង្ស័យ កម្លាំងក៏បានឃាត់ខ្លួនអ្នកព្យាយាមរារាំង និងរំដោះជនសង្ស័យបានពីរនាក់ទៀតផងដែរ ក្នុងចំណោមអ្នករារាំងជាច្រើននាក់។

តាមរបាយការណ៍របស់ស្នងការដ្ឋាននគរបាលខេត្តកំពង់ស្ពឺ អ្នកដែលព្យាយាមរារាំងចង់រំដោះជនសង្ស័យចេញពីការបង្ក្រាបករណីចោរកម្ម និងទទួលផលចោរកម្មនេះមានឈ្មោះ ហួន​ ង៉ែត​ ភេទប្រុស​ អាយុ​ ៥៦ឆ្នាំ​ និងឈ្មោះ​ ថាត​ តេងណេង​ ភេទប្រុស​ អាយុ​ ២៦ឆ្នាំ។ ជនសង្ស័យជាអ្នករារាំងកម្លាំងនគរបាលពេលចុះប្រតិបត្តិការនេះ ក៏ត្រូវបានកម្លាំងកសាងសំណុំរឿងបញ្ជូនអនុវត្តនិតិវិធីច្បាប់ផងដែរ។

សូមជម្រាបថា ជនសង្ស័យដែលទទួលផលចោរកម្មនៅខេត្តកំពង់ស្ពឺមានឈ្មោះ កែវ​ ដារ៉ូ​ ភេទប្រុស​ អា​យុ​៣០ឆ្នាំ​ មុខរបរទិញលក់រថយន្ដ​ (អ្នកទទួលផលចោរកម្ម) ត្រូវបានកម្លាំងនគរបាលនៃស្នងការដ្ឋាននគរបាលខេត្តព្រៃវែង សហការជាមួយកម្លាំងនគរបាលស្រុកគង​ពិ​សី​ ចុះឃាត់ខ្លួនកាលពីយប់ថៃ្ងទី៤​ ខែមេសា​ ឆ្នាំ២០២៦​ នៅចំណុ​ច​ភូ​មិអង្គរោង​ ឃុំម​ហាឬស្សី​ ស្រុកគ​ង​ពិ​សី​ ខេត្ដកំ​ពង់ស្ពឺ​។

ប្រតិបត្តិការស្រាវជ្រាវ រហូតឈានដល់ការឃាត់ខ្លួននេះ ធ្វើឡើងក្រោយពីកម្លាំងនគរបាលជំនាញព្រហ្មទណ្ឌនៃស្នងការដ្ឋាននគរបាលខេត្តព្រៃវែង ទទួលបានពាក្យបណ្តឹងពីជនរងគ្រោះម្ចាស់ឡាន សហការជាមួយកម្លាំងនគរបាលនាយកដ្ឋានព្រហ្មទណ្ឌ និងនគរបាលខេត្តកំពង់ស្ពឺ បានបើកប្រតិបត្តិការស្រាវជ្រាវ ហើយឈានដល់ការចាប់ខ្លួនជនល្មើសនៅថ្ងៃទី៤ ខែមេសា ឆ្នាំ២០២៦នេះ នៅស្រុកគងពិសី ខេត្តកំពង់ស្ពឺ។

តាមចម្លើយសារភាពរបស់អ្នកទទួលទិញ ជនសង្ស័យបានលួចរថយន្ដចេញពីខេត្ដព្រៃវែង​ រថយន្ដ​ ម៉ាក​ Hy​undai ទម្ងន់​ ២,៥​តោន​ ដែលទទួ​លទិញពីជនល្មើសក្នុងត​ម្លៃ ១៦​០០​ដុ​ល្លារ ហើយគាត់បានល​ក់បន្ត២​៣​០០ដុល្លារ​ រ​ថយន្ដគ្មា​នឯក​សា​រច្បាប់ដើម​។ តាមចម្លើយសារភាពដដែល រថយន្ដដែលទិញបានពីល្មើស គឺគេបានដោះបំបែកគ្រឿងលក់​(​កាប់សាច់)​៕

អត្ថបទ៖ សុខុម