ករណីបង្ហោះចែកចាយថា​មានការចាប់ក្មេងនៅស្រុកបាទី រដ្ឋបាលស្រុកបញ្ជាក់ថា ពុំមាននោះទេ

ក្រោយមានការផ្សព្វផ្សាយលើបណ្ដាញសង្គមពីការលួងលោមចាប់ក្មេងស្រីនៅសាលាបឋមសិក្សាចំបក់ ក្នុងមូលដ្ឋានឃុំចំបក់ ស្រុកបាទី ខេត្តតាកែវរួចមក អាជ្ញាធរស្រុកបានចេញមកបញ្ជាក់ថា ពុំមានករណីនេះកើតឡើងនោះទេ។ អាជ្ញាធរស្រុកក៏ស្នើឲ្យប្រជាពលរដ្ឋចូលរួមសហការក្នុងការផ្តល់ព័ត៌មានឱ្យបានត្រឹមត្រូវ ច្បាស់លាស់ ដើម្បីដោះស្រាយទាន់ពេលវេលា សំដៅរក្សាបាននូវសន្តិសុខ និងសុវត្ថិភាពជូនដល់ប្រជាពលរដ្ឋក្នុងមូលដ្ឋាន។

ការចេញមកបញ្ជាក់នេះ ក្រោយពីមានគណនីហ្វេសប៊ុកឈ្មោះ CHOUE SOKHENG បានបង្ហោះចែកចាយថា “មានករណីល្បួងលួងលោមក្មេងស្រីជាសិស្សនៅសាលាបឋមសិក្សាចំបក់ ស្រុកបាទី” នៅពេលថ្មីៗកន្លងទៅនេះ។

តាមរយៈសេចក្ដីបំភ្លឺព័ត៌មានកាលពីថ្ងៃទី២៧ ខែឧសភា ឆ្នាំ២០២៦ រដ្ឋបាលស្រុកបញ្ជាក់ថា បន្ទាប់ពីទទួលបានព័ត៌មានខាងលើ រដ្ឋបាលស្រុក បានណែនាំដល់អធិការដ្ឋាននគរបាលស្រុក រដ្ឋបាលឃុំចំបក់ និងប៉ុស្តិ៍នគរបាលរដ្ឋបាលឃុំចំបក់ឱ្យចុះពិនិត្យស្រាវជ្រាវករណីខាងលើ តាមរយៈការឆែកកាមេរ៉ាសុវត្ថិភាពតាមដងផ្លូវត្រង់ចំណុចកើតហេតុ និងតាមការសាកសួរលោកនាយកសាលា លោកគ្រូ អ្នកគ្រូនៅសាលាបឋមសិក្សាចំបក់ ព្រមទាំងការផ្ទៀងផ្ទាត់ចម្លើយរបស់អាណាព្យាបាលសិស្ស និងកុមារផ្ទាល់ សមត្ថកិច្ចបានធ្វើការសន្និដ្ឋានជារួមចំពោះករណីខាងលើ គឺពុំមានករណីការល្បួងលួងលោមក្មេងស្រី ដូចករណីបង្ហោះរបស់គណនីហ្វេសប៊ុក ខាងលើនេះទេ។

លោកអនុសេនីយ៍ឯក មាន វុត្ថា នាយប៉ុស្ដិ៍នគរបាលរដ្ឋបាលឃុំចំបក់ បានឲ្យដឹងនៅព្រឹកថ្ងៃទី២៨ ខែឧសភា ឆ្នាំ២០២៦នេះថា ក្រោយពីចុះសាកសួរលោកគ្រូ អ្នកគ្រូ ក្មេងស្រីជាសិស្សសាលា និងអាណាព្យាបាល គឺពុំមានករណីល្បូងលួងលោមចង់ចាប់ក្មេងស្រីនោះទេ តែអាចជាករណីលួងលោមចង់ដោះយកគ្រឿងអលង្ការមានតម្លៃ ដូចជា ក្រវិលជាដើម។

លោកនាយប៉ុស្ដិ៍ក៏បានណែនាំដល់សិស្សាអនុសិស្សតូចៗ ក៏ដូចជាលោកគ្រូអ្នកគ្រូ បើសិនបានឃើញមានជនសង្ស័យមានភិនភាគចម្លែក ឬមានការសង្ស័យសូមជួយផ្ដល់ព័ត៌មានដល់សមត្ថកិច្ចឲ្យទាន់ពេលវេលាដើម្បីអន្តរាគមន៍៕

អត្ថបទ៖ សុខុម