WHO ប្រកាសរកឃើញជំងឺរលាកថ្លើមដ៏អាថ៌កំបាំងលើកុមារបន្ថែមទៀត

អង្គការសុខភាពពិភពលោក (WHO) បាននិយាយថា គិតត្រឹមពេលនេះករណីជំងឺរលាកថ្លើមកុមារធ្ងន់ធ្ងរដ៏អាថ៌កំបាំងនៅជុំវិញពិភពលោកបានកើនឡើងដល់ចំនួន ៣៤៨ ករណីហើយ ។

លោកស្រី Philippa Easterbrook អ្នកជំនាញខាងជំងឺរលាកថ្លើមប្រចាំនៅ WHO បានថ្លែងនៅក្នុងសន្និសីទសារព័ត៌មាននាទីក្រុងហ្សឺណែវកាលពីថ្ងៃអង្គារថា ករណីអាថ៌កំបាំងមួយចំនួននៃជំងឺរលាកថ្លើមស្រួចស្រាវក្នុងចំណោមកុមារ និងមនុស្សវ័យក្មេងដែលត្រូវបានគេរាយការណ៍នៅទូទាំងពិភពលោក ភាគច្រើនគឺនៅអឺរ៉ុប និងអាមេរិកខាងជើង ។

លោកស្រី Easterbrook បាននិយាយកាលពីសប្តាហ៍មុនថា ប្រហែល ៧០ ភាគរយនៃអ្នកជំងឺបានធ្វើតេស្តវិជ្ជមានសម្រាប់មេរោគធម្មតាឈ្មោះ Adenovirus ។ ចំណែករោគសញ្ញាមួយចំនួននៃមេរោគនោះគឺឈឺបំពង់ក និងរាគ ហើយប្រហែល ១៨ ភាគរយនៃអ្នកមានរោគសញ្ញាទាំងនេះបានធ្វើតេស្តវិជ្ជមានសម្រាប់វីរុសនេះ ។

ជាចុងក្រោអ្នកជំនាញរបស់ WHO រូបនេះបានសង្កត់ធ្ងន់ថា “ការផ្តោតគោលដៅដ៏ធំនៅសប្តាហ៍ក្រោយគឺការធ្វើតេស្ត និងតាមដានសម្រាប់ការប៉ះពាល់របស់អ្នកជំងឺពីមុន និងថាតើវាឆ្លងដូចជំងឺកូវីដ ១៩ ដែរឬយ៉ាងណា” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ជំងឺរលាកថ្លើមដ៏អាថ៌កំបាំង រកឃើញលើកុមារជិត៣០០នាក់ហើយ ទូទាំងពិភពលោក (មានវីដេអូ)