រថយន្តម៉ាក Jeep ពាក់ស្លាកលេខខេមរភូមិន្ទ បុករថយន្តដឹកសំរាមពីក្រោយបណ្ដាលឲ្យកម្មករពីរនាក់រងរបួសធ្ងន់

បុរសម្នាក់បើករថយន្តម៉ាកJeep ពាក់ស្លាកលេខខេមរភូមិន្ទ មួយគ្រឿង ក្នុងល្បឿនលឿនខ្វះការប្រុងប្រយ័ត្នជ្រុលបុករថយន្តដឹកសំរាម ក្រុមហ៊ុនស៊ីនទ្រី ពីក្រោយពេញ ខណៈកំពុងឈប់ប្រមូលសំរាមបណ្តាលឲ្យកម្មករពីរនាក់កំពុងប្រមូលសំរាមរបួសធ្ងន់។

ហេតុការណ៍នេះកើតឡើងកាលពីវេលាម៉ោង១និង៥០នាទីរំលងអធ្រាត្រ ឈានចូលថ្ងៃទី១៥ ខែកញ្ញា ឆ្នាំ២០២២ នៅតាមបណ្ដោយផ្លូវ២១៧ ក្បែរស្ពានដែកចំការដូង ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញរថយន្តដឹកសំរាមក្រុមហ៊ុនស៊ីនទ្រីមួយគ្រឿងពណ៌លឿង ឈប់ប្រមូលសំរាមនៅចំណុចទីតាំងកើតហេតុ ខណ:នោះគេឃើញកម្មករ៣ទៅ៤នាក់ កំពុងប្រមូលសំរាមដាក់ក្នុងរថយន្ត ហើយក៏មានរថយន្តម៉ាកJeep មួយគ្រឿងពណ៌ត្រេអ៊ីពាក់ស្លាកលេខ ខេមរភូមិន្ទ01-2-5881​បើកបរដោយបុរសម្នាក់ ធ្វើដំណើរស្របទិសដៅគ្នាក្នុងល្បឿនលឿន ក៏ជ្រុលចង្កូតទៅបុករថយន្តដឹកសំរាមពីក្រោយពេញទំហឹងបណ្ដាលឲ្យកម្មករប្រមូលសំរាមពីរនាក់កំពុងប្រមូលសំរាមខ្ទាតទៅមុខរថយន្តរងរបួសធ្ងន់ត្រូវបានបញ្ជូនទៅសង្គ្រោះនៅឯមន្ទីរពេទ្យភ្លាមៗ។ ចំណែកអ្នកបើកបររថយន្តបង្កមិនមានរងរបួសនោះទេ គ្រាន់តែរងការខូចខាតរថយន្តផ្នែកខាងមុខយ៉ាងដំណំ។

ក្រោយកើតហេតុសមត្ថកិច្ចមូលដ្ឋានបានចុះមកដល់ រួចទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកទៅរក្សាទុក រង់ចាំធ្វើការដោះស្រាយគ្នាពេលក្រោយ៕

អត្ថបទ ៖ សុខា