ចរាចរណ៍

សង្ស័យស្រវឹងស្រា បើករថយន្តបុកជញ្ជាំងសិប្បកម្មគុយទាវ ១ កន្លែង ខូចខាតម៉ូតូ-កង់ ១០ គ្រឿង និងរបួសមនុស្ស ២ នាក់

បានផុស

១ year មុន

នៅ

ថ្ងៃសុក្រ ២៣ ឧសភា ២០២៥

ដោយ

បុរសម្នាក់ សង្ស័យស្រវឹងស្រា បើករថយន្តបុកជញ្ជាំងសិប្បកម្មផលិតសរសៃគុយទាវ ១ កន្លែង បណ្ដាលឲ្យខូចខាតម៉ូតូចំនួន ៦ គ្រឿង និង កង់ ៤ គ្រឿង ព្រមទាំងរងរបួសមនុស្ស ២ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ៥ និង ៤០ នាទីល្ងាច ថ្ងៃទី ២២ ខែឧសភា ឆ្នាំ ២០២៥ ស្ថិតនៅតាមបណ្ដោយផ្លូវបេតុងថ្មី សង្កាត់ឃ្មួញ ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានប្រាប់ថា នៅមុនពេលកើតហេតុ មេឃភ្លៀងយ៉ាងខ្លាំង ហើយឃើញរថយន្ត ១ គ្រឿង ម៉ាកហ៊ីយ៉ាន់ដាយ ពណ៌លឿង មិនមានស្លាកលេខ ធ្វើដំណើរតាមបណ្ដោយផ្លូវបេតុងថ្មី ទិសដៅពីលិចទៅកើត ក្នុងល្បឿនយ៉ាងលឿន លុះបើកមកដល់ចំណុចកើតហេតុ ស្រាប់តែរថយន្តបង្កខាងលើរ៉េចង្កូតទៅផ្នែកខាងស្ដាំ ហើយបានបុកជញ្ជាំងសិប្បកម្មផលិតសរសៃគុយទាវ បណ្តាលឲ្យបាក់ទ្វារសង្កត់លើម៉ូតូចំនួន ៦ គ្រឿង និងកង់ចំនួន ៤ គ្រឿង ព្រមទាំងរងរបួសកម្មករចំនួន ២ នាក់ ផងដែរ។ ដោយឡែករថយន្តបង្កបានបោកទៅលើជញ្ជាំងជាច្រើនម៉ែត្របន្តទៀត និងដាច់កង់ម្ខាងខ្ទាតជាច្រើនម៉ែត្រ រងការខូចខាតយ៉ាងធ្ងន់ធ្ងរ។

ប្រភពព័ត៌មានដដែលបន្តទៀតថា ខណៈពេលគ្រោះថ្នាក់ភ្លាមៗ អ្នកបើកបរត្រូវប្រជាពលរដ្ឋឃាត់បានភ្លាមៗ ហើយទាក់ទងសមត្ថកិច្ចនគរបាលប៉ុស្តិ៍ឃាត់ខ្លួនយកទៅសួរនាំភ្លាមៗ។

ក្រោយពេលកើតហេតុ សមត្ថកិច្ចនគរបាលប៉ុស្តិ៍ បានទាក់ទងទៅសមត្ថកិច្ចនគរបាលជំនាញចរាចរណ៍ខណ្ឌសែនសុខ ភ្លាមៗ និងទាក់ទងទៅសមត្ថកិច្ចនគរបាលរាជធានីភ្នំពេញ ដើម្បីធ្វើការស្ទូចរថយន្តបង្កខាងលើយកទៅរក្សាទុករង់ចាំដោះស្រាយថ្ងៃក្រោយ៕

អត្ថបទ ៖ សំណាង