ស្លាប់ និងរបួសដោយគ្រោះថ្នាក់ចរាចរណ៍ជាង៦០នាក់ទូទាំងប្រទេស ក្នុងពេល៦ថ្ងៃ

ក្នុងរយៈពេល៦ថ្ងៃ ចាប់ពីថ្ងៃទី១ ដល់ថ្ងៃទី៦ ខែសីហា មានគ្រោះថ្នាក់ចរាចរណ៍កើតឡើងសរុប ៣៥ករណី បណ្ដាលឱ្យមានមនុស្សស្លាប់ និងរហួសសរុប ៦៦នាក់។ ក្នុងនោះអ្នកស្លាប់មាន ២២នាក់ និងរបួស ៤៤នាក់។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ។

អ្នកនាំពាក្យរងដដែល បានលម្អិតថា នាថ្ងៃទី១ ខែសីហា គ្រោះថ្នាក់ចរាចរណ៍កើតមានឡើង ៦ករណី បណ្ដាលឱ្យមានមនុស្សស្លាប់ ៣នាក់ និងរបួស ៤នាក់ នៅភ្នំពេញ កំពង់ចាម កោះកុង កំពង់ធំ បាត់ដំបង និងឧត្តរមានជ័យ ថ្ងៃទី២ មានគ្រោះថ្នាក់ ៥ករណី បណ្ដាលឱ្យមនុស្សស្លាប់ម្នាក់ និងរបួស ៧នាក់ នៅភ្នំពេញ កំពង់ស្ពឺ ស្ទឹងត្រែង កំពង់ចាម និងនៅថ្ងៃទី៣ សីហា មាន ៦ករណី បណ្ដាលឱ្យមនុស្សស្លាប់ ៧នាក់ និងរបួស ៧នាក់ នៅភ្នំពេញ កំពង់ចាម។

ដោយឡែកថ្ងៃទី៤ ទី៥ និងទី៦សីហា លោក ទូច សុឃៈ បានលម្អិតទៀតថា ថ្ងៃទី៤ មានគ្រោះថ្នាក់ចរាចរណ៍ ៦ករណី បណ្ដាលឱ្យមនុស្សស្លាប់ ៤នាក់ និងរបួស ៦នាក់ នៅភ្នំពេញ តាកែវ សៀមរាប ក្រចេះ និងបន្ទាយមានជ័យ នៅថ្ងៃទី៥ មាន ៦ករណី បណ្ដាលឱ្យមនុស្សស្លាប់ ៣នាក់ និងរបួស ១០នាក់ នៅភ្នំពេញ ព្រះសីហនុ កណ្ដាល កោះកុង និងនៅថ្ងៃទី៦សីហា  មានគ្រោះថ្នាក់ចរាចរណ៍ ៦ករណី បណ្ដាលឱ្យមនុស្សស្លាប់ ៤នាក់ និងរបួស១០នាក់ នៅភ្នំពេញ កំពង់ឆ្នាំង ស្វាយរៀង បន្ទាយមានជ័យ និងក្រចេះ៕