ព័ត៌មានជាតិ

ឆ្នាំនេះបណ្ដែតប្រទីបត្រូវផ្អាក តែការប្រណាំងទូក សំពះព្រះខែ អកអំបុក និងស្តង់ពិព័រណ៍ទូទៅនៅតែបន្តធ្វើ

បានផុស

៣ years មុន

នៅ

ថ្ងៃអង្គារ ១៨ តុលា ២០២២

ដោយ

ទឹកជំនន់មិនទាន់ស្រកអស់ មិនអំណោយផល ឆ្នាំនេះបណ្ដែតការតាំងប្រទីបត្រូវផ្អាក តែការប្រណាំងទូក និងសំពះព្រះខែ អកអំបុក និងការដាក់ស្តង់ពិព័រណ៍ទូទៅ ភូមិ ១ ផលិតផល ១ នៅតែបន្តធ្វើដដែល។ នេះបើតាមកិច្ចប្រជុំពិភាក្សាបន្ទាន់មួយ កាលពីព្រឹកថ្ងៃទី ១៧ ខែតុលា ឆ្នាំ ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំខាងលើមានការចូលរួមដោយ លោក អ៊ុំ រាត្រី អភិបាលខេត្តបន្ទាយមានជ័យ អភិបាលរងខេត្តទាំង ១០ អភិបាលក្រុង ស្រុក និងប្រធានមន្ទីរ អង្គភាពស្ថាប័នទាំង ៣ មានកម្លាំងអាវុធហត្ថ ស្នងការនគរបាលខេត្ត កម្លាំងយោធា មេឃុំ ចៅសង្កាត់ និងមន្ត្រីពាក់ព័ន្ធជាច្រើននាក់។

ក្នុងកិច្ចប្រជុំនោះ លោក អ៊ុំ រាត្រី មានប្រសាសន៍ថា ក្នុងឱកាសអបអរសាទរ ព្រះរាជពិធីបុណ្យ ប្រណាំងទូក បណ្ដែតប្រទីប សំពះព្រះខែ អកអំបុក និងមានស្តង់ពិព័រណ៍ទូទៅ ភូមិ ១ ផលិតផល ១

បានលើកពេលទៅ ថ្ងៃទី ២៩ និង ៣០ ខែតុលា ឆ្នាំ ២០២២ វិញ ជាពិធីបុណ្យសំពះព្រះខែ អកអំបុក ធ្វើនៅតាមដងស្ទឹងសិរីសោភ័ណ។

លុះនៅថ្ងៃទី ៤ និង ៥ ខែវិច្ឆិកា ឆ្នាំ ២០២២ ធ្វើការប្រណាំងទូក និងការដាក់ស្តង់ពិព័រណ៍ទូទៅ ភូមិ ១ ផលិតផល ១ នៅខាងក្រោយសាកលវិទ្យាល័យមានជ័យដដែល។

លោក អ៊ុំ រាត្រី បានបញ្ជាក់ឲ្យដឹងបន្តទៀតថា ឆ្នាំនេះមានទូកចូលរួមប្រណាំងចំនួន ២៦ ទូក។ ក្នុងនោះ ទូកអុំ ចែវ ខ្នាតធំ មាន ២០ ទូក និងទូកកិត្តិយសចំណុះ ៥ នាក់ ចំនួន ៤ ទូក និងចំណុះ ៣ នាក់ ចំនួន ២ ទូក។

សូមរំលឹកថា កម្មវិធីរៀបចំការប្រណាំងទូក បណ្ដែតប្រទីប និងសំពះព្រះខែ អកអំបុក និងស្តង់ពិព័រណ៍ទូទៅ ភូមិ ១ ផលិតផល ១ នៅថ្នាក់ខេត្ត រាជធានី ថ្នាក់ជាតិ បានផ្អាក ៣ ឆ្នាំកន្លងមក ដោយសារវិបត្តិសកល នៃការរីករាលដាលជំងឺកូវីដ-១៩។ ប៉ុន្តែឆ្នាំ ២០២២ នេះ ស្ថានភាពជំងឺកូវីដ-១៩ បានធូរស្រាល រាជរដ្ឋាភិបាល ក៏សម្រេចណែនាំឲ្យថ្នាក់ខេត្តរៀបចំឡើងវិញឲ្យបាន។

ក្នុងនោះ រដ្ឋបាលខេត្តបន្ទាយមានជ័យ បានណែនាំពីការត្រៀមរៀបចំទូក និងគណៈកម្មការគ្រប់គ្រងទូក ដើម្បីចូលរួមព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ឆ្នាំ ២០២២ រួចម្តងហើយ ប៉ុន្តែលើកពេលព្រះរាជពិធីវិញ ដោយសារជំនន់មិនទាន់ស្រកពីទីធ្លាសាកលវិទ្យាល័យជាតិមានជ័យ ដែលជាទីតាំងវេទិកាប្រារព្ធពិធី និងទស្សនា ក៏ដូចជាព្រឹត្តិការណ៍នានា។

លោកបានបន្ថែមថា មុនពេលពិធីប្រណាំង គ្រប់ស្រុក ក្រុង មន្ទីរ អង្គភាព បានត្រួតពិនិត្យ ជួសជុល កែលំអ តុបតែងទូកនិមួយៗ និងរៀបចំគណៈកម្មការគ្រប់គ្រងទូក ប្រវត្តិទូក រួចអស់ហើយផងដែរ៕

អត្ថបទ ៖ វ៉ាន់ ណាង