ព័ត៌មានជាតិ

ក្រុមហ៊ុនតូចធំជិត ២០០ ក្រុមហ៊ុន កំពុងវិនិយោគនៅខេត្តព្រះសីហនុ

បានផុស

៤ years មុន

នៅ

ថ្ងៃសុក្រ ២៥ វិច្ឆិកា ២០២២

ដោយ

លោក ឯម ភាព អភិបាលរងខេត្តព្រះសីហនុមានប្រសាសន៍ថា គិតចាប់ពីឆ្នាំ១៩៩៤ ដល់ខែតុលា ឆ្នាំ២០២២ នៅខេត្តព្រះសីហនុមានក្រុមហ៊ុនវិនិយោគចំនួន ១៩៩ ក្រុមហ៊ុន ក្នុងនោះក្រុមហ៊ុនវិនិយោគលើវិស័យទេសចរណ៍មានចំនួន ៨៤ ក្រុមហ៊ុន និងវិនិយោគខ្នាតធំ (អភិវឌ្ឍន៍ទេសចរណ៍រយៈពេលវែង) តាមបណ្តាកោះឆ្នេរមាន ៣៣ ក្រុមហ៊ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបពិភាក្សាការងារជាមួយលោក Martin Ladner អ្នកគ្រប់គ្រងក្រុមហ៊ុន Doppelmayr Group នៃប្រទេសអូទ្រីសស្តីពីគម្រោងសម្បទានលើកន្ត្រកខ្សែរ៉កក្នុងវិស័យទេសចរណ៍កាលពីរសៀលថ្ងៃទិ២៤វិច្ឆិកា នៅសាលាខេត្តព្រះសីហនុ លោកអភិបាលរងខេត្តបានបន្តថាដោយឡែកខេត្តព្រះសីហនុ ក៏មានគម្រោងវិនិយោគទេសចរណ៍ផ្សារភ្ជាប់ និងធម្មជាតិ (ខ្នាតតូចទំហំក្រោម ១០ហិកតា) ដែលទទួលបានគោលកាណ៍វិនិយោគពីក្រសួងបរិស្ថានចំនួន ៨១គម្រោង ក្នុងនោះកំពុងដំណើរការចំនួន ៤១គម្រោង និង៤០គម្រោងទៀតកំពុងសិក្សាតាមផែនការមេអភិវឌ្ឍន៍របស់គម្រោង និងអនុវត្តនីតិវិធីច្បាប់។

លោកអភិបាលរងខេត្តបានបន្តទៀតថា ខេត្តព្រះសីហនុ ត្រូវបានរាជរដ្ឋាភិបាលចាត់ទុកជាតំបន់សេដ្ឋកិច្ចពិសេសគំរូពហុបំណង ហើយរដ្ឋបាលខេត្តចង់បានក្រុមហ៊ុនមកធ្វើការវិនិយោគលើវិស័យទេសចរណ៍នៅខេត្តព្រះសីហនុ។

ខេត្តព្រះសីហនុដែលត្រូវបានគេស្គាល់ថា ជាខេត្តមួយដ៏សំខាន់របស់ប្រទេសកម្ពុជានោះ ក្រៅពីមានកំពង់ផែអន្តរជាតិសម្រាប់ចរាចរណ៍ ទំនិញគ្រប់ប្រភេទ ក៏មានរមណីយដ្ឋាន ឬកន្លែងកំសាន្តដ៏ពេញនិយមផងដែរ គឺឆ្នេរសមុទ្រដ៏ស្រស់ត្រកាល ដែលទាក់ទាញភ្ញៀវជាតិ និងអន្តរជាតិបានយ៉ាងច្រើនក្នុងមួយឆ្នាំៗ ហើយក៏រកចំណូលចូលថវិកាជាតិផងដែរ។

បើតាមលោក ឃាង ភារម្យ អ្នកនាំពាក្យសាលាខេត្តព្រះសីហនុធ្លាប់ បានប្រាប់កម្ពុជាថ្មីថា ខេត្តព្រះសីហនុមានកោះចំនួន៣២ ដែលកំពុងស្ថិតនៅក្នុងការគ្រប់គ្រងរបស់សមត្ថកិច្ចខេត្ត ហើយក្នុងនោះមានកោះចំនួន ២០ កំពុងអភិវឌ្ឍ និងមាន ៥កោះកំពុងដំណើរការអាជីវកម្ម គឺកោះសង្សារ (កោះអូនកោះបង) កោះក្របី កោះតាកៀវ កោះឬស្សី និងមួយផ្នែកនៃកោះរ៉ុង ដែលមានសណ្ឋាគារ Royal Sand របស់ក្រុមហ៊ុន Royal Group។

ចំណែកឯកោះពស់វិញ ការអភិវឌ្ឍរបស់ក្រុមហ៊ុនកោះពស់ ខេមបូឌា អ៉ិនវេសមេនគ្រុប អិលធីឌី រួមមាន ស្ពានមួយខ្សែប្រវែង៩០០ម (សាងសង់រួច១០០ ភាគរយ) សាងសង់ភូមិគ្រឹះចំនួន១៨ខ្នងរួចរាល់ និងសាងសង់ផ្លូវប្រវែងជាង៥គីឡូម៉ែត្រ ធ្វើពីបេតុង (គិតជាភាគរយ៦០ភាគរយ) និងសំណង់ភូមិគ្រឹៈមួយចំនួន៕

អត្ថបទ៖ សំអឿន