កាន់តែពិសេស ពិព័រណ៍សៀវភៅឆ្នាំនេះមានការសម្តែងល្ខោនស្រមោលស្បែក

ក្រោយអាក់ខានក្នុងអំឡុងវិបត្តិកូវីដ១៩ កាលពីពេលកន្លងទៅ ព្រឹត្តិការណ៍ពិព័រណ៍​សៀវភៅ​​នៅឆ្នាំនេះ កាន់តែពិសេសជាងមុន ដោយសារតែមានឈុតឆាកសម្តែង​សិល្បៈវប្បធម៌ខ្មែរ​ដ៏កម្រ គឺល្ខោនស្រមោលស្បែកតូច នារសៀលថ្ងៃទីពីរ ពោលគឺថ្ងៃទី១០ ធ្នូ ឆ្នាំ២០២២ ។

កម្មវិធីពិព័រណ៍សៀវភៅលើកទី៩ នឹងប្រារព្ធធ្វើឡើងរយៈពេល ៣ថ្ងៃ ក្នុង​បរិវេណបណ្ណាល័យជាតិ ចាប់ពីថ្ងៃទី៩-១១ ខែធ្នូ ឆ្នាំ ២០២២ វេលាម៉ោង ៧ព្រឹក ដល់ម៉ោង ៧ល្ងាច អាចចូលរួមដោយសេរី ។

បើតាមការបញ្ជាក់ពីកញ្ញា ងិន ម៉ិសស៊ែល អ្នកសម្របសម្រួលស្តង់ពិព័រណ៍សៀវភៅ នេះជាលើកទី១ហើយ ដែលកម្មវិធីពិព័រណ៍សៀវភៅ បានរៀបចំឱ្យមានការសម្តែងល្ខោនស្រមោលស្បែកតូច ហើយពិព័រណ៍សៀវភៅលើកទី៩នេះ មានស្តង់សៀវភៅរហូតដល់ ១៩៨ស្តង់ ចូលរួម គឺច្រើនជាងបណ្តាឆ្នាំមុនៗ ដោយក្នុងនោះក៏មានតន្ត្រីសម័យកំដរកម្មវិធី រយៈពេល ៣ថ្ងៃនេះផងដែរ។

ស្តង់ទាំងអស់នោះ មានការចូលរួមពីគ្រឹះស្ថានសៀវភៅ និងអ្នកនិពន្ធជាច្រើន ដើម្បីផ្តល់ជូនជម្រើសនៃការអាន កាន់តែសម្បូរបែប រួមមានសៀវភៅទស្សនៈ ចំណេះដឹងទូទៅ ក៏ដូចជាប្រលោមលោក រឿងផ្សេង-ល-។

ការសម្ពោធបើកកម្មវិធី ពិព័រណ៍សៀវភៅថ្នាក់ជាតិ លើកទី៩ ឆ្នាំ២០២២ ធ្វើឡើង ក្រោមប្រធានបទ “មួយថ្ងៃអាន មួយថ្ងៃដឹង” នឹងមានការចូលរួមដល់ទៅ ៣ក្រសួង ដោយមានវត្តមានរបស់បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ, បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា និងរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ៕

អត្ថបទដោយ ៖ សុធាវី