វៀតណាម ចេញបញ្ជាឲ្យកម្ទេចចោលភ្លាម បើរកឃើញសត្វបក្សី នាំចូលដោយខុសច្បាប់

ក្រសួងកសិកម្ម និងអភិវឌ្ឍន៍ជនបទវៀតណាម កាលពីថ្ងៃអាទិត្យទី២៦ខែកុម្ភៈ បានតម្រូវឲ្យគ្រប់ខេត្ត-ក្រុងក្នុងប្រទេសវៀតណាម ទប់ស្កាត់ការជួញដូរសត្វបក្សីចូលប្រទេស ដើម្បីទប់ស្កាត់ការរីករាលដាលនៃវីរុស H5N1 បន្ទាប់ពី កម្ពុជា រាយការណ៍អំពីមេរោគនេះចំនួន២ករណី ក្នុងនោះមានម្នាក់បាត់បង់ជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបានស្នើឲ្យគ្រប់រដ្ឋធានី-ខេត្ត បង្កើនការត្រួតពិនិត្យ និងតាមដាន ជាពិសេសនៅតាមតំបន់ព្រំដែន និងកំពង់ផែសមុទ្រ ក៏ដូចជាផ្លូវទឹកផងដែរ ដើម្បីរកឲ្យឃើញ និងដោះស្រាយឲ្យបានទាន់ពេលវេលា នូវការជួញដូរ ការកាប់សម្លាប់ និងដឹកជញ្ជូនសត្វបក្សីខុសច្បាប់ទៅកាន់ប្រទេសវៀតណាម ជាពិសេសតាមបណ្តាខេត្តជាប់ព្រំដែនភាគខាងត្បូង។

នៅពេលណាដែលការដឹកជញ្ជូនសត្វ និងផលិតផលសត្វត្រូវបានរកឃើញថាដឹកជញ្ជូនខុសច្បាប់ចូលក្នុងប្រទេសវៀតណាម ត្រូវតែបំផ្លាញចោលជាបន្ទាន់។

មូលដ្ឋានក៏ត្រូវបានចាត់តាំងឲ្យដឹកនាំប៉ូលិស និងកងកម្លាំងការពារព្រំដែនរបស់ពួកគេ បើកការស៊ើបអង្កេតលើការដឹកជញ្ជូន និងជួញដូរសត្វបក្សីឆ្លងព្រំដែនផងដែរ។

ទន្ទឹមនឹងនោះ ភ្នាក់ងារឃ្លាំមើលទីផ្សារនឹងពង្រឹងវិធានការគ្រប់គ្រងចរាចរផលិតផលបសុបក្សីនៅវៀតណាម។ ចំណែកអ្នកដែលខកខានមិនបានរាយការណ៍ករណីសង្ស័យ ដែលបង្កឲ្យជំងឺគ្រុនផ្តាសាយបក្សីរាលដាលដល់ប្រទេសវៀតណាមនោះ គឺនឹងត្រូវប្រឈមមុខនឹងការដាក់ទណ្ឌកម្មយ៉ាងធ្ងន់ធ្ងរជាទីបំផុត៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ៤ចំណុចសំខាន់គួរដឹង អំពីជំងឺផ្តាសាយបក្សី H5N1